Read bahnar I Sam 15 Bible Online

I Sam 15 - bahnar bible

I Sam 15

¹Samuel khan kơ Sôl: Kră Yang wơh inh boih tuh ăn kơ ih đak rơmă, pơdơ̆ng ih pơm pơtao kon pơlei Isơrael sư. Thoi noh dang ei mơ̆ng bĕ nơ̆r Kră Yang.

²Kră Yang Tih Hloh khan: Inh 'blŏk đơ̆ng tơdrong Amalek pơm kơ lu bơngai Isơrael, găn trong năm kơplah lĕch hlôi đơ̆ng dêh Êyiptơ.

³Thoi noh, na năm bĕ blah kon pơlei Amalek păng pơlôch pơđĭ lu sư sem dơrong lu sư. Lu iĕm ưh kơ gơh mơnat kơ lu sư, athei pơlôch đĭ drŏ-nglo drŏ-kăn, păng lu 'lơ̆p lu nge oei mŏm, rơmo triu, lăk-đa păng aseh iĕ.

⁴Na, Sôl krao pơpôi akŭm kon pơlei pơla tơ pơlei Têliam. Đei 'bar-rơbâu 'nu linh yak jơ̆ng păng mơjĭt-rơbâu 'nu bơngai Juđa.

⁵Sôl năm blah kon pơlei Amalek păng răp lu linh lăm thong.

⁶Sôl kư̆m wơh bơngai năm tơbăt ăn kơ kon pơlei Kênit: Lu iĕm athei weh bĕ, tơklah lĕch bĕ đơ̆ng kon pơlei Amalek, wă kơ lu nhôn huay kơ pơlôch iĕm hơdai hăm lu sư, yua kơ lu iĕm pơm 'lơ̆ng kơ kon pơlei Isơrael kơplah lu sư 'nao lĕch hlôi đơ̆ng dêh Êyiptơ. Thoi noh, na kon pơlei Kênit tơklah lĕch đơ̆ng kon pơlei Amalek.

⁷Sôl blah lu bơngai Amalek đơ̆ng Hawila truh tơ Sur tơ gah hơlĕch kơ dêh Êyiptơ jei sư.

⁸Sư rôp arih Agak, pơtao lu bơngai Amalek; đơ̆ng noh iŏk đao pơlôch pơđĭ lu kon pơlei pơla.

⁹Sôl păng kon pơlei achăng mơnat kơ Agak, kư̆m ưh kơ đei pơlôch lu sem dơrong mă 'lơ̆ng hloh lăm lu khŭl rơmo dah triu, rong mă bek, kon triu păng dôm lu sem dơrong 'lơ̆ng hloh, mă-lei pơlôch pơđĭ dôm lu kon sem kiơ kơnê̆ păng ưh kơ gĭt.

¹⁰Kră Yang khan kơ Samuel:

¹¹Inh hmach dêh pôk boih Sôl pơm pơtao; yua kơ sư achăng lê̆ Inh, ưh kơ pơm kiơ̆ nơ̆r Inh. Samuel blĕk krao khan kơ Kră Yang prăt măng.

¹²Pơgê năr đơ̆ng rŏng, sư năm tơ'bơ̆p Sôl, đei bơngai năm roi kơ Samuel: Sôl hlôi năm tơ Karmel boih, pơdơ̆ng tơmo wă tơ'blŏk kơ sư; đơ̆ng noh na wih jur tơ Gilgal.

¹³Samuel năm tơ'bơ̆p Sôl; Sôl kơkuh kơ sư: Hơpơi kơ Kră Yang ăn pŭn hiôk kơ ih! Inh pơm kiơ̆ boih dôm nơ̆r đơ̆ng Kră Yang tơtă.

¹⁴Samuel jet sư: Thoi noh na triu bơbe hmoi krao ôr kơtơ̆ng truh tơ đon inh, hăm inh kơtơ̆ng rơmo hmoi, noh kiơ?

¹⁵Sôl tơl: Kon pơlei đei 'mêm rôp dui ba, lu sem dơrong mă 'lơ̆ng, triu bơbe păng rơmo đơ̆ng bơngai Amalek; dui ba sem dơrong 'lơ̆ng hloh triu păng rơmo, wă pơyơ̆r sư pơm tơmam soi ăn kơ Kră Yang 'Bok Kei-Dei ih; lu sem dơrong oei đei nhôn pơlôch pơđĭ boih.

¹⁶Samuel khan kơ Sôl: Thôi! Gô Inh roi ăn kơ ih dôm tơdrong Kră Yang khan boih kơ inh măng âu Sôl tơl: Roi bĕ.

¹⁷Samuel roi khan: Ih adrĕch iĕ ưh kơ hơnhŏ pơm kơ̆l kơ adrĕch adrung bơngai Isơrael dah kiơ? Kră Yang tuh đak rơmă ăn kơ ih pơm pơtao lu bơngai Isơrael.

¹⁸Na, Kră Yang wơh ih năm na khan: Năm bĕ pơlôch đĭ lu bơngai pơm yoch to, noh kon pơlei Amalek păng tơblah hăm lu sư dĭng truh kơ lu iĕm pơlôch đĭ lu sư.

¹⁹Liơ ih ưh kơ chu pơm kiơ̆ nơ̆r Kră Yang khan? Liơ ih năm mơ̆t blah tơgar iŏk, pơm dôm tơdrong kơnê̆ 'bơ̆t anăp Kră Yang?

²⁰Sôl tơl nơ̆r Samuel: Mă-lei inh pơm kiơ̆ nơ̆r Kră Yang khan, inh năm pơm keh boih nơ̆r tơtă Kră Yang wơh inh năm pơm; inh chĕp ba Agak, pơtao bơngai Amalek păng pơlôch pơđĭ lu kon pơlei Amalek.

²¹Kon pơlei đei rơih iŏk lăm lu tơmam mă đei blah tơgar iŏk, triu bơbe păng rơmo, sem dơrong 'lơ̆ng hloh gah tơmam trŏ kơ pơlôch, wă pơyơ̆r ăn kơ Kră Yang 'Bok Kei-Dei ih tơ Gilgal.

²²Samuel khan: Kră Yang lăp đon kơ pơyơ̆r tơmam soi 'buh noh hloh kơ chu yom kơ nơ̆r Sư dah ưh? Chu yom kiơ̆ nơ̆r 'lơ̆ng hloh kơ tơmam soi, mơ̆ng pơm kiơ̆ 'lơ̆ng hloh kơ rơmă triu tơno.

²³Hơngah ưh kơ pơm kiơ̆ noh kư̆m yoch thoi bơngai pơjâu hơlĕnh; Pơang kư̆m yoch thoi kơkuh kơ rup yang. Yua kơ đơ̆ng ih achăng lê̆ nơ̆r Kră Yang, na sư kư̆m achăng lê̆ ih ưh kơ ăn kơ ih pơm pơtao.

²⁴Sôl chu iŏk nơ̆r Samuel khan: Inh đei pơm yoch boih ưh kơ wă chu nơ̆r Kră Yang tơtă păng đơ̆ng nơ̆r ih bơtho khan. Inh hli kơ lu kon pơlei na mơ̆ng pơm kiơ̆ nơ̆r lu sư.

²⁵Dang ei, apinh ih mơnat kơ tơdrong yoch inh, jơ̆ inh dơ̆ng hăm wih kiơ̆ inh, na inh gô drap kơkuh 'bơ̆t anăp Kră Yang.

²⁶Samuel khan hăm Sôl: Inh ưh pă wih tơ jê̆ ih dơ̆ng; yua kơ ih achăng lê̆ nơ̆r Kră Yang, na Kră Yang kư̆m achăng lê̆ ih, ưh kơ pă wă ih pơm pơtao lu bơngai Isơrael dơ̆ng.

²⁷Samuel wih rŏng wă năm, Sôl rôp tơdrơi ao sư, na ao hiah hloi.

²⁸Samuel khan kơ sư: Năr 'nâu Kră Yang kư̆m hek teh đak Isơrael đơ̆ng ih kư̆m thoi noh mơ̆n, na pơjao ăn kơ bơngai nai đơ̆ng, trŏ hloh kơ ih.

²⁹Hloh kơ noh Kră Yang arih ling-lang lu bơngai Isơrael ưh kơ pơma hơlĕnh, kư̆m ưh kơ tơplih nơ̆r; yua kơ ưh kơ trŏ kơ kon bơngai na mă tơplih nơ̆r!

³⁰Sôl apinh lung: Inh đei yoch; mă-lei apinh ih pơyom kơ inh 'bơ̆t anăp lu đe kră wei-lăng kon pơlei inh păng 'bơ̆t anăp lu bơngai Isơrael; apinh ih wih jơ̆ inh dơ̆ng na inh gô kơkuh kơ Kră Yang 'Bok Kei-Dei ih.

³¹Samuel wih jơ̆ dơ̆ng Sôl kiơ̆ thoi sư pơkă; na Sôl drap kơkuh kơ Kră Yang.

³²Samuel khan: Chông ba Agak, pơtao bơngai Amalek năm tơ inh: Agak năm hơdar hơdêh truh tơ sư, tơchĕng lăm to khan: Tơdrong lôch pơmat-tat hlôi boih.

³³Mă-lei Samuel khan: Dah đao ih pơm boih kơ bơngai drŏ-kăn hiong kon thoi yơ, na mĕ ih kư̆m gô hiong kon thoi noh mơ̆n. Đang kơ pơma, Samuel pơlôch hloi Agak 'bơ̆t anăp Kră Yang tơ Gilgal.

³⁴Na, Samuel wih brŏk tơ Rama; gah Sôl brŏk tơ hnam sư kơdih tơ Gibêah.

³⁵Samuel ưh pă 'bôh Sôl dơ̆ng truh tơ năr sư lôch; yua kơ sư sơ'ngon dêh gah tơdrong jang Sôl; gah Kră Yang hmach dêh đei pơk Sôl pơm pơtao lu bơngai Isơrael.