Read bahnar I Sam 16 Bible Online

I Sam 16 - bahnar bible

I Sam 16

¹Kră Yang khan kơ Samuel: Ih oei sơ'ngon kơ Sôl dĭng truh dang yơ? Inh achăng lê̆ sư boih, ưh pă ăn sư pơm pơtao bơngai Isơrael dơ̆ng. Tuh bĕ đak rơmă 'bĕnh kơ trôm hơke na ih năm; Inh wơh ih năm tơ'bơ̆p 'bok Jese Betlehem; yua lăm lu kon sư, Inh đei rơih iŏk minh 'nu wă pơm pơtao.

²Samuel tơl: Liơ inh gơh năm tơ noh? Dah Sôl băt, sư gô pơlôch inh. Kră Yang khan: Ih dui ba minh pơm rơmo akăn adruh, na khan: Inh pơyơ̆r tơmam soi 'buh ăn kơ Kră Yang.

³Ih krao Jese dai năm mơ̆n. Inh gô bơtho ăn kơ ih băt tơdrong kiơ ih gô pơm, Inh tơ'bôh ăn kơ ih bơngai bu ih gô tuh đak rơmă wă pơk sư pơm pơtao bơ̆jang kơ Inh.

⁴Samuel pơm kiơ̆ dôm tơdrong Kră Yang bơtho khan kơ sư, năm truh tơ pơlei Betlehem. Lu kră pơlei tơkan sơng sư. Lu sư hli na apinh: Ih năm tơ âu ba tơdrong hiôk-hian dah kiơ?

⁵Na sư tơl: Hiôk-hian Inh truh tơ âu wă pơyơ̆r tơmam soi 'buh kơ Kră Yang; hơmet bĕ kơdih akâu mă 'lơ̆ng rơgoh păng kư̆m wang năm tơ âu hơdai inh. Sư kư̆m krao wơ̆n Jese lu kon drŏ-nglo sư hơmet akâu kơdih rơgoh 'lơ̆ng na kư̆m năm tơ anih pơyơ̆r.

⁶Wă Jese hăm lu kon sư truh, Samuel 'bôh Êliap, na tơchĕng lăm to khan: 'Nâu boih bơngai mă wă tuh đak rơmă đơ̆ng Kră Yang mă oei dơ̆ng 'bơ̆t anăp Sư.

⁷Mă-lei Kră Yang khan kơ Samuel; 'Nĕ kơ lăng akâu rŏ hơbŏ tih bơngai noh, Inh ưh kơ iŏk sư. Inh ưh kơ lăng kiơ thoi kon bơngai lăng, kon bơngai lăng gah 'nguaih; mă-lei Kră Yang lăng 'bôh lăm jơhngơ̆m.

⁸Jese krao Abinađap păng athei sư năm 'bơ̆t anăp Samuel; mă-lei Samuel khan: Kră Yang kư̆m ưh kơ rơih iŏk bơngai 'nâu.

⁹Jese athei Samma năm 'bơ̆t anăp Samuel mă-lei Samuel khan: Kră Yang kư̆m ưh kơ rơih iŏk bơngai 'nâu mơ̆n.

¹⁰Jese athei tơpơh 'nu kon drŏ-nglo sư kơdih năm 'bơ̆t anăp Samuel lei-lăi thoi noh; na Samuel khan kơ Jese thoi âu: Kră Yang ưh kơ rơih iŏk minh 'nu bơngai bu lăm đe noh.

¹¹Đơ̆ng noh, Samuel apinh Jese dơ̆ng: Kon drŏ-nglo ih đĭ dôm noh boih hă? Jese tơl thoi âu: Oei pă minh 'nu kon hơdruch inh, mă-lei sư oei wei triu. Samuel khan: Wơh bĕ bơngai năm krao sư. Lu bơ̆n gô 'bôh sư 'mơ̆i na sŏng sa.

¹²Na, Jese năm wơh bơngai năm krao iŏk sư. Muh măt akâu jăn sư hơbŏ 'lơ̆ng. Kră Yang khan kơ Samuel: 'Nâu boih; iung bĕ tuh đak rơmă kơ sư.

¹³Samuel iŏk hơke đak rơmă, tuh ăn kơ Đawit mă oei tơm măt lu 'nhŏng oh sư. 'Bơ̆t noh hloi Yang Bơhngol 'Lơ̆ng Kră Yang oei hơdai Đawit ling-lang hloi. Samuel iung brŏk tơ Rama.

¹⁴Yang Bơhngol 'Lơ̆ng Kră Yang lĕch đơ̆ng Sôl; Kră Yang wơh minh 'nu yang kơnê̆ pơm kơ đon sư hơwơ̆l hơwang hli tơrơ.

¹⁵Lu đĭch đam sư roi: Đei minh 'nu yang kơnê̆ mă Kră Yang 'Bok Kei-Dei wơh truh pơm kơ đon pơtao hơwơ̆l hơwang.

¹⁶Apinh pơtao wơh lu nhôn chă kơ ih minh 'nu gơh reh tĭng-nĭng, tơdah layơ Kră Yang 'Bok Kei-Dei wơh yang kơnê̆ truh tơ ih, na bơngai ei gô reh brŏ, na ih gô oei hiôk hơđơ̆ng.

¹⁷Sôl tơl hăm lu đĭch đam sư: Năm bĕ chă kơ inh minh 'nu bơngai reh brŏ hơgei, đơ̆ng noh chông ba sư năm tơ inh âu.

¹⁸Minh 'nu lăm lu đĭch đam sư khan: Inh 'bôh minh 'nu kon drŏ-nglo Jese, bơngai Betlehem; sư reh brŏ hơgei dêh, sư minh 'nu bơngai tơblah nuih, pơma dơnuh hơgei păng muh măt sư hơbŏ 'lơ̆ng. Kră Yang oei hơdai sư.

¹⁹Sôl wơh bơngai năm tơ Jese, na khan: Ăn bĕ kơ inh Đawit, kon drŏ-nglo ih, bơngai mă wei triu.

²⁰Jese rôp minh pơm aseh iĕ iŏk 'bĕng sik minh kơdŭng akar, minh pơm kon bơbe oei mŏm, hơtŏk kơpal kơdŭ aseh iĕ athei kơ Đawit kon drŏ-nglo sư, chĕp ba ăn kơ Sôl.

²¹Đawit truh tơ Sôl, păng jang hloi kơ sư. Sôl 'mêm kơ sư dêh mah iŏk ăn kơ sư chĕp tơmam blah.

²²Na Sôl wơh bơngai năm khan kơ Jese: Inh apinh ih ăn kơ Đawit oei tơ âu tơgŭm inh; yua kơ sư pơm kơ jơhngơ̆m inh hiôk.

²³Na mưh Kră Yang 'Bok Kei-Dei ăn yang kơnê̆ mơ̆t pơm kơ Sôl hli, na Đawit iŏk brŏ tĭng-nĭng reh, pơlung Sôl pran hiôk, na yang kơnê̆ noh lĕch đơ̆ng sư.