Read bahnar I Sam 17 Bible Online

I Sam 17 - bahnar bible

I Sam 17

¹Kon pơlei Philistin krao akŭm lu linh sư wă tơblah lu sư akŭm tơ Sôkô, lăm dêh Juđa păng kơđông sư tơ Êphes Đamim, sơlam Sôkô păng Asêka.

²Sôl păng lu bơngai Isơrael kư̆m akŭm băl mơ̆n pơm kơđông lăm thŭng Êlah na dă lu linh sư wă tơblah hăm lu kon pơlei bơngai Philistin.

³Kon pơlei Philistin dơ̆ng 'bơ̆t groi pah âu; gah lu bơngai Isơrael dơ̆ng 'bơ̆t groi pah to; pŭng-lŭng sơlam lu sư.

⁴Đei minh 'nu bơngai tih kơjung lĕch đơ̆ng kơđông Philistin, anăn sư Gôliat, đơ̆ng pơlei Gat; sư kơjung pêng hlok minh hơđa.

⁵Sư yơ̆l môk kơlăm kong hu rang tơ kơ̆l sư, hrŭk ao hơkar ka kong rang, trăp dang tơdrâu-jĭt kĭ,

⁶jơ̆ng pơ̆n chuă hăm kong, sơngiĕng hlok đao hăm kong.

⁷Gôliat kư̆m đei tơju, pla dư tih tŏ khơng đe tanh brai, kơnhŏng tơju trăp loi kơ tơpơh kĭ.

⁸Gôliat, sư dơ̆ng krao ôr lu bơngai Isơrael khan: Yua kơ kiơ lu iĕm 'maih tơblah? Inh âu bơngai tih kơjung nuih kơtang lăm lu linh Philistin, lu iĕm đĭch đam Sôl dah kiơ? Rơih bĕ minh 'nu đơ̆ng lăm lu iĕm jur năm tơblah inh âu.

⁹Tơdah tơblah hăm inh jei sư păng sư pơlôch inh, lu nhôn gô pơm đĭch đam lu iĕm; mă-lei tơdah inh pran hloh kơ sư na inh pơlôch sư, lu iĕm gô pơm đĭch đam lu nhôn păng awih awăn kơ lu nhôn.

¹⁰Bơngai Philistin pơma hơno dơ̆ng: Tơpă, lăm năr 'nâu inh pơma pơlong lăng lu linh bơngai Isơrael; tơlĕch minh 'nu bơngai wăi, na lu bơ̆n tơblah băl.

¹¹Sôl păng lu bơngai Isơrael mơ̆ng dôm lu nơ̆r bơngai Philistin, pơma noh jơhngơ̆m lu sư hli tơrơ dêh.

¹²Na, Đawit, kon drŏ-nglo Jese bơngai Êphrat, oei lăm pơlei Betlehem dêh Juđa; sư đei tơhngam 'nu kon drŏ-nglo, lăm chăl Sôl, Jese sư bơngai kră mă đe pơyom.

¹³Pêng 'nu kon drŏ-nglo Jese kiơ̆ boih Sôl năm tơblah. Anăn pêng 'nu kon drŏ-nglo ei: Kon kơdră Êliap, kon mă 'bar Abinađap păng kon mă pêng Samma.

¹⁴Đawit kon hơdruch, pêng 'nu 'nhŏng sư kiơ̆ Sôl.

¹⁵Mă-lei Đawit kư̆m brŏk năm đơ̆ng anih Sôl, brŏk tơ pơlei Betlehem wei triu 'bă sư.

¹⁶Gôliat bơngai Philistin năm lĕch pơgê kơsơ̆, pơjăm linh bơngai Isơrael thoi noh lăm puăn-jĭt năr.

¹⁷Na Isai khan kơ Đawit, kon drŏ-nglo sư: Dăm kon e iŏk minh kơthŭnga 'ba mi hơdrĕng păng mơjĭt tŏ 'bĕng âu, kơdâu năm ba truh tơ kơđông chĕp ba ăn kơ lu đe 'nhŏng e.

¹⁸Dăm kon e chĕp mơjĭt tŏ 'bĕng đak toh âu ăn kơ lu bơngai pơgơ̆r wei-lăng rơbâu 'nu linh, năm lăng lu đe 'nhŏng e hăm oei liĕm akâu dah ưh păng e kư̆m brŏk chĕp ăn kơ 'bă minh tơdra yă kiơ gah lu sư.

¹⁹Lu 'nhŏng oei hơdai hăm Sôl păng đĭ-đăng lu linh bơngai Isơrael tơ lăm pŭng-lŭng Êlah, wă tơblah hăm lu linh kon pơlei Philistin.

²⁰Pơgê dơning đơ̆ng hrôih, Đawit lê̆ triu sư ăn kơ minh 'nu bơngai wei, iŏk tơmam na yak năm, thoi 'bă sư pơkă boih. Lăp sư truh tơ anih na kơplah noh hloi lu linh lĕch năm tơblah păng jreo re drŭt tơblah.

²¹Bơngai Isơrael păng lu kon pơlei Philistin sư dă wă tơblah, 'bar pah linh tơklă băl muh măt.

²²Đawit ming lê̆ tơmam sa sư pơjao kơ minh 'nu bơngai wei tơmam, kơdâu truh tơ anih wă tơblah. Truh jet gia pêng 'nu lu đe 'nhŏng sư hăm oei liĕm kâu dah ưh.

²³Kơplah sư oei pơma dơnuh hăm 'nhŏng sư, Gôliat, sư bơngai Philistin oei tơ pơlei Gat, đơ̆ng khŭl linh Philistin sư lĕch năm pơma pơjăm pơjuă thoi ki, na Đawit kơtơ̆ng đĭ sư pơma.

²⁴Đĭ-đăng lu linh bơngai Isơrael 'bôh Gôliat hli tơrơ, chă kơdâu ôn.

²⁵Lu Sư khan tơduă: Lu iĕm hăm 'bôh bơngai noh to sư lĕch năm? Sư wă pơjăm che bơle kơ bơngai Isơrael, tơdah bơngai bu kĕ pơlôch sư, na pơtao gô apah mŭk tơmam lơ, rôp ăn kon adruh sư ăn kơ bơngai noh oei păng ưh kơ đei iŏk thuê̆ ăn rơngei kơ hnam 'bă.

²⁶Đawit jet lu bơngai ngôi jê̆ sư: Đe gô apah kiơ kơ bơngai gơh pơlôch bơngai Philistin 'nâu păng wă kơ huay pă pơjăm lu bơngai Isơrael dơ̆ng? Lu bơngai Philistin 'nâu, lu bơngai ưh kơ chu kăt tơdra akar, sư bu, na mă pơ̆n pơjăm lu linh Kră Yang 'Bok Kei-Dei arih ling-lang?

²⁷Linh roi kơ Đawit tơmam apah noh: Bu gơh kĕ pơlôch sư na gô apah tơmam trŏ thoi đei roi boih.

²⁸Mă-lei Êliap 'nhŏng kơdră sư, hil kơ Đawit pơma apinh thoi noh, na khan: E năm chă kiơ tơ âu? E achăng lê̆ lu triu bơ̆n lăm tơmăn glă ăn kơ bu lăng? Inh băt jơhngơ̆m e pơang pơma kơchu lăm jơhngơ̆m. Truh tơ âu e wă lăng tơblah ah.

²⁹Đawit tơl: Inh đei pơm kiơ? 'Noh inh wă apinh lăng đĕch!

³⁰Sư weh ataih đơ̆ng 'nhŏng sư, apinh dơ̆ng lu bơngai nai minh nơ̆r thoi 'noh hei, na đe tơl kư̆m thoi adrol hei.

³¹Đei bơngai kơtơ̆ng nơ̆r Đawit pơma, na plơ̆ roi ăn kơ Sôl băt; Sôl krao sư.

³²Đawit khan kơ Sôl: Apinh 'nĕ ăn bơngai bu mă hli kơ bơngai Philistin noh! Inh đĭch đam pơtao gô năm tơblah hăm sư.

³³Sôl găn Đawit: Ih ưh kơ kĕ wă tơblah hăm bơngai Philistin, yua kơ ih minh 'nu bơngai oei 'lơ̆p, sư 'noh bơngai juăt kơ tơblah đơ̆ng oei 'lơ̆p sơ̆.

³⁴Đawit tơl roi kơ Sôl: Kơplah inh wei triu 'bă inh, dah đei dăm-brang, chơgơu wă rôp sa triu đơ̆ng lăm khŭl triu,

³⁵na inh druh, teh sư, pơdŭng iŏk triu đơ̆ng 'bơ̆r sư tơdah sư ôr bruh tơ inh, inh rôp sŏk kang sư, teh pơlôch sư.

³⁶Inh pơlôch boih dăm-brang păng chơgơu, thoi noh na bơngai Philistin to ưh kơ chu kăt tơdra akar tăm dơ̆ng inh kư̆m gô teh pơlôch sư thoi sem brem noh mơ̆n; yua kơ sư pơjăm lu linh Kră Yang 'Bok Kei-Dei mă arih ling-lang.

³⁷Đawit khan dơ̆ng: Kră Yang pơklaih boih inh đơ̆ng dăm-brang păng đơ̆ng chơgơu, Sư kư̆m gô pơklaih inh mơ̆n đơ̆ng ti bơngai Philistin to noh, Sôl drơ̆ng: Năm bĕ, hơpơi Kră Yang oei hơdai hăm ih!

³⁸Sôl iŏk ao tơblah sư pơhrŭk ăn kơ Đawit, pơyơ̆l ăn môk kơlăm kong păng pơhrŭk ăn ao mam.

³⁹Đawit tơ̆n đao Sôl tơ kơiĕng, 'nguaih, kơ ao tơblah na pơtơ̆p nơnăm, mă-lei ưh kơ gơh yua kơ ưh kơ juăt; sư khan kơ Sôl: Inh ưh kơ chĕp đao 'nâu yua kơ inh ưh kơ juăt yak ưh kơ gơh, Đawit plôh lê̆ ao ei.

⁴⁰Đawit chĕp minh pơm 'long jra, chă dônh rơih iŏk pơđăm tŏ tơmo iêl hlăng tơter thong đak, tah lăm kơdŭng chơbĭ sư wei triu 'băk rim năr păng tơ'bla tơlei akar tơ ti sư, lĕch năm tơ anăp bơngai Philistin noh.

⁴¹Bơngai Philistin noh kư̆m lĕch năm tơ jê̆ Đawit rai wă jê̆ đei bơngai chĕp đao nơnăm adrol.

⁴²Bơngai Philistin noh lăng tơ Đawit, pơjăm hloi, 'bôh sư oei mơlôh akâu jăn muh măt sư 'lơ̆ng.

⁴³Bơngai Philistin khan kơ Đawit: Inh ưh kơ sĭ kơ kŏ na ih chĕp 'long băl năm tơ inh? Bơngai Philistin yua anăn yang lu sư na hiap Đawit.

⁴⁴Bơngai Philistin hơnganh: Năm tơ âu wăi, inh gô ăn sĕch ih kơ lu sem păr păng lu sem bri sa.

⁴⁵Đawit khan kơ bơngai Philistin: Ih chĕp đao, năm blah inh, gah inh; inh yua anăn Kră Yang Tih Hloh, noh Kră Yang 'Bok Kei-Dei lu linh bơngai Isơrael, mă lu iĕm pơjăm pơjuă.

⁴⁶Năr 'nâu Kră Yang gô pơjao ih lăm tơpang ti inh, inh gô pơlôch ih, kăt kơ̆l ih păng bơngai Philistin lôch ăn kơ sem păr păng lu sem bri sa sĕch lu linh bơngai Philistin. Jơ̆p-jang kơ teh đak gô băt kơ bơngai Isơrael đei Kră Yang 'Bok Kei-Dei;

⁴⁷Đĭ lu bơngai tơ âu gô 'bôh Kră Yang ưh kơ dŏng pơklaih păng đao dah păng tơju yua kơ Kră Yang jơ̆ yŏng kơ tơblah păng Sư gô jao lu iĕm lăm tơpang ti lu nhôn.

⁴⁸Kơplah bơngai Philistin iung, năm sơng jê̆ Đawit, Đawit hăt hot kơdâu năm tơ anăp wă tơblah hăm bơngai Philistin.

⁴⁹Đawit 'bot ti lăm kơdŭng sư, iŏk minh găr tơmo tah tơ lăm tơlei akar tơ'bla sư tăr wăr tơmo, 'bơm 'bơ̆t klĕng bơngai Philistin, tơmo mơ̆t đom lăm klĕng, Gôliat pơ̆k kơmŭ brum muh măt tơ teh.

⁵⁰Lei na Đawit blah Gôliat bơngai Philistin jei sư, hăm hră tơ'bla, hăm minh găr tơmo. Sư pơlôch Gôliat bơngai Philistin ưh kơ đei hăm đao lăm ti sư.

⁵¹Na Đawit kơdâu juă kơpal akâu bơngai Philistin iŏk đao sư toh đơ̆ng hơnglop, 'bet pơlôch sư, păng kăt kơ̆l sư hloi. Kon pơlei Philistin 'bôh bơngai pran tih kơjung sư lôch bơih, na kơdâu.

⁵²Lu linh bơngai Isơrael păng bơngai Juđa iung jreo, tơkĕch, druh kon pơlei Philistin truh tơ trong mơ̆t pơlei Gat păng tơ 'măng jang pơlei Ekrôn. Lu bơngai Philistin jĭ rơka pơ̆k lôch 'bĕnh kơ trong đơ̆ng Saraim truh tơ pơlei Gat păng Êkrôn.

⁵³Kon pơlei Isơrael đang đơ̆ng druh puh kon pơlei Philistin boih, na hơlơ̆k brŏk blah iŏk pơrăm kơđông sư.

⁵⁴Đawit dônh iŏk kơ̆l bơngai Philistin chĕp ba truh tơ Jêrusalem; mă-lei gah ao mam, môk kơlăm đao tơju Gôliat lê̆ lăm bơsŭn sư.

⁵⁵Sôl 'bôh Đawit năm blah bơngai Philistin, na jet Apne yŏng pơgơ̆r linh: Ơ Apner, bơngai tơdăm mơlôh noh kon drŏ-nglo bu? Apner tơl khan: Ơ pơtao inh arih sot! Inh ưh kơ băt.

⁵⁶Pơtao khan kơ sư: Apinh lăng drŏ-nglo tơdăm mơlôh noh kon bu.

⁵⁷Wă, Đawit pơlôch bơih lu bơngai Philistin wơ̆t brŏk, Apner sơng sư, chông ba sư năm 'bơ̆t anăp Sôl, Đawit oei chĕp kơ̆l bơngai Philistin tơ ti sư.

⁵⁸Sôl pơma dơnuh hăm Đawit: Ơ dăm mơlôh, ih kon bu? Đawit tơl: Inh kon Jese, đĭch đam pơtao, oei tơ pơlei Betlehem.