Read bahnar I Sam 18 Bible Online

I Sam 18 - bahnar bible

I Sam 18

¹Đawit pơma dơnuh hăm Sôl đang boih, Jônathan păng Đawit pơm buăl juăt yua, kơ Jônathan 'mêm kơ Đawit dêh thoi akâu sư kơdih.

²Năr noh, Sôl iŏk Đawit oei hloi tơ noh, ưh kơ ăn sư brŏk tơ hnam 'bă sư dơ̆ng.

³Jônathan pơgơ̆p hăm Đawit, yua kơ sư 'mêm kơ Đawit nhen thoi akâu sư kơdih.

⁴Jônathan plôh ao tai sư pơhrŭk ăn kơ Đawit, hăm ao tơblah sư hai, ăn đao, hră păng tơlei tơ̆n sư.

⁵Đawit lơ 'măng năm blah, mă tơ anih ayơ ayơ Sôl wơh sư năm, tơblah jei sư ngăl. Sôl pơjao ăn kơ sư pơgơ̆r linh, kon pơlei păng lu đĭch đam Sôl lăp đon kơ Đawit pơgơ̆r lu sư.

⁶Đang kơ Đawit pơlôch bơngai Philistin, wih brŏk hăm lu linh sư, na lu bơngai drŏ-kăn rim kơ pơlei bơngai Isơrael lĕch năm sơng Sôl, hơri suang, teh hơgơ̆r iĕ hăm brŏ tĭng-nĭng păng jreo nơ̆r hiôk chơt.

⁷Lu bơngai drŏ-kăn suang hơri pơdrơ̆ng băl khan: Sôl pơlôch rơbâu, rơbâu 'nu gah Đawit pơlôch mơjĭt-rơbâu rơbâu 'nu,

⁸Sôl blĕk dêh kơ dôm lu nơ̆r hơri 'nâu ưh kơ lăp jơhngơ̆m sư, sư khan: Đe khan Đawit pơlôch mơjĭt-rơbâu rơbâu 'nu, mă-lei gah inh khan rơbâu rơbâu 'nu đĕch; oei pă minh tam mă gơh pơm pơtao đĕch!

⁹Iŏk đơ̆ng năr noh, Sôl klai kơ Đawit dêh,

¹⁰Năr đơ̆ng rŏng, Kră Yang 'Bok Kei-Dei ăn Yang kơnê̆ mơ̆t lăm Sôl; sư hli tơrơ pơma kư̆ kă lăm hnam sư, thoi bơngai wơnh, na Đawit reh brŏ thoi krô hmă. Sôl chĕp minh hlak tơju tơ ti sư.

¹¹Sôl hrang Đawit, na khan: Inh gô pơ̆ng ih tơ tơnăr. Mă-lei Đawit pĕch kơ tơju 'bar wơ̆t.

¹²Sôl hli kơ Đawit, yua kơ Kră Yang oei hơdai hăm Đawit, na achăng lê̆ sư.

¹³Sôl wă puh tơweh Đawit ataih kơ sư, jao ăn kơ Đawit wei pơgơ̆r minh-rơbâu 'nu linh tơblah. Đawit ngăl chông linh năm tơblah.

¹⁴Đawit năm tơblah mă tơ yơ yơ kư̆m jei sư ngăl yua kơ Kră Yang oei hơdai hăm sư.

¹⁵Sôl 'bôh Đawit năm tơblah jei sư ngăl, na Sôl rai hli dêh.

¹⁶Mă-lei đĭ-đăng bơngai Isơrael păng bơngai Juđa 'mêm kơ Đawit, yua kơ sư pơgơ̆r lu sư tơblah.

¹⁷Sôl pơma dơnuh hăm Đawit: 'Nâu Mêrap kon drŏ-kăn kơdră inh. Inh gô ăn kơ ih oei pơm akăn mă-lei ih athei mă nuih tơblah ăn kơ Kră Yang. Sôl tơchĕng lăm jơhngơ̆m khan: Tơpang ti inh ưh kơ gơh pơrăm sư, mă-lei lê̆ kơ tơpang ti lu kon pơlei Philistin pơrăm sư noh trŏ hloh.

¹⁸Đawit tơl khan: Ơ pơtao Inh âu bu? Adrĕch adrung inh bu, krung kơtum 'bă inh noh kiơ lăm bơngai Isơrael kiơ na pơk inh pơm ŏng pơtao?

¹⁹Na, truh tơ khei 'năr Mêrap, kon drŏ-kăn Sôl, wă ăn kơ Đawit oei, na pơtao tă ăn kơ Adriel oei bơngai đơ̆ng pơlei Mêhôta.

²⁰Mă-lei Mikai, kon drŏ-kăn Sôl, hưch kơ Đawit. Sôl băt tơdrong noh, na jơhngơ̆m sư lăp đon.

²¹Sư tơchĕng khan: Inh gô ăn sư oei kơ Đawit, pơm thoi hơđong wă kơ Đawit 'leh lăm ti bơngai Philistin. Thoi noh Sôl pơma dơnuh 'măng mă 'bar hăm Đawit: Ih gô pơm ŏng inh.

²²Na Sôl athei lu đĭch đam sư: Iĕm năm pơma hơdar hăm Đawit: Ih hăm 'bôh pơtao lăp đon kơ ih păng đĭ-đăng lu đĭch đam pơtao kư̆m 'mêm kơ ih mơ̆n; thoi noh na pơm bĕ ŏng pơtao.

²³Lu đĭch đam Sôl roi dơ̆ng dôm lu nơ̆r ei hăm Đawit. Đawit tơl khan: Pơm ŏng pơtao, iĕm tơchĕng tơdrong iĕ đĕch ah? Inh minh 'nu bơngai dơnuh hin păng răm-'băm.

²⁴Lu đĭch đam Sôl roi ăn dơ̆ng kơ pơtao dôm nơ̆r Đawit tơl.

²⁵Sôl khan kơ lu sư: Lu iĕm năm roi kơ Đawit; Pơtao ưh kơ đei apinh minh tơdrong kiơ ôh, kăl kơ minh-hrĕng tŏ kơ̆l tơmam drŏ-nglo bơngai Philistin, wă kơ pơm 'mong tơwih kơ lu bơngai ayăt kơ sư. Na Sôl chă đon wă pơm ăn kơ Đawit puh hiong lăm tơpang ti kon pơlei Philistin.

²⁶Wă Lu đĭch đam roi ăn dơ̆ng dôm lu nơ̆r 'nâu kơ Đawit mơ̆ng, na Đawit chu kiơ̆ adrol kơ tơm năr pơkă wă pơm ŏng pơtao, adrol kơ năr pơkă.

²⁷Đawit năm hăm lu linh sư năm blah pơlôch 'bar-hrĕng 'nu lu bơngai Philistin. Sư chĕp ba tơm kơ̆l tơmam drŏ-nglo ăn kơ pơtao wă kơ gơh pơm ŏng pơtao. Thoi noh, Sôl kư̆m ăn Mikal, kon drŏ-kăn sư kơ Đawit pơm akăn.

²⁸Wă Sôl lăng băt Kră Yang oei hơdai hăm Đawit, Mikal kon drŏ-kăn Sôl hưch 'mêm kơ Đawit

²⁹Sôl rai hli kơ Đawit dơ̆ng păng đĭ chăl arih pơtao ayăt hăm Đawit.

³⁰Rim wơ̆t lu kră pơgơ̆r kon pơlei Philistin ngăl năm tơblah, hăm bơngai Isơrael na Đawit tơblah hloh kơ đĭ-đăng lu đĭch đam Sôl; thoi noh, anăn sư đe ư-ang rai dêh.