Read bahnar I Sam 19 Bible Online

I Sam 19 - bahnar bible

I Sam 19

¹Sôl pơđâu chă đon hăm Jônathan, kon drŏ-nglo sư păng lu đĭch đam sư wă pơlôch Đawit mă-lei Jônathan, kon drŏ-nglo Sôl, 'mêm dêh kơ Đawit.

²Jônathan roi ăn kơ Đawit băt Sôl, 'bă inh, chă wă pơlôch ih. Thoi noh, pơgê dơning ih lĕch kơdâu tơ anih mă hlơp na ôn tơ noh.

³Inh gô năm dơ̆ng răp lăng 'bă inh 'bơ̆t anih chŭn mă ih ôn noh păng roi kơ 'bă inh gah ih gô lăng sư pơma thoi yơ, đơ̆ng noh inh roi ăn kơ ih băt.

⁴Thoi noh, Jônathan pơma dŏng Đawit khan kơ 'bă sư: Apinh ih 'nĕ pơm tơdrong yoch hăm Đawit, đĭch đam ih, yua kơ sư ưh kơ đei pơm tơdrong yoch kiơ hăm ih, mă đei tơgŭm tơdrong jang tih ăn kơ ih dơ̆ng.

⁵Sư hŭt akâu kơdih na mă pơlôch bơngai Philistin, yua kơ sư na Kră Yang đei ăn kơ bơngai Isơrael tơblah jei ngăl. Ih 'bôh boih păng chơt hiôk; lei na khan wă pơlôch pơrăm bơngai ưh kơ pơm yoch wă pơlôch Đawit tơdrong ưh kơđei?

⁶Sôl mơ̆ng nơ̆r Jônathan roi na sư pơkă khan: Inh pao anăn Kră Yang mă arih ling-lang, Đawit gô ưh kơ lôch ôh!

⁷Na, Jônathan krao Đawit, roi ăn dôm lu nơ̆r ei kơ sư, na chông ba Đawit năm tơ Sôl, na Đawit oei bơ̆jang kơ Sôl thoi adrol ki dơ̆ng.

⁸Đei tơdrong tơblah dơ̆ng, Đawit năm blah kon pơlei Philistin, pơm blah ăn kơ lu bơngai Philistin thuơ tih tơpă, lu sư kơdâu đi,

⁹Kră Yang ăn yang kơnê̆ mơ̆t lăm Sôl kơplah sư oei ngôi lăm hnam chĕp tơju tơ ti sư; 'bơ̆t Đawit oei reh brŏ tĭng-nĭng.

¹⁰Sôl iŏk tơju wă hrăng kơtĭt Đawit tơ tơnăr, mă-lei Đawit pĕch, tơju Sôl 'bơm tơ tơnăr. Đawit kơdâu hloi măng noh.

¹¹Sôl wơh bơngai năm răp tơ hnam Đawit wă kơ pơgê đơ̆ng rŏng noh gơh pơlôch sư hloi, mă-lei Mikal akăn Đawit roi ăn kơ sư băt: Tơdah măng 'nâu ih ưh kơ kơdâu klĕnh, na pơgê dơning đe gô pơlôch ih.

¹²Mikal tơjur Đawit trong 'măng-'mŏk; sư kơdâu klĕnh păng hlôi hloi,

¹³Na, Mikal iŏk rup man tơ'bĭch kơpal giơng, iŏk 'long kơn sŏk bơbe hơgơn kơ̆l, tơsu ao kơ akâu rup.

¹⁴Na Sôl wơh bơngai năm rôp Đawit, na Mikal khan: Klo inh bơlŏ.

¹⁵Sôl wơh dơ̆ng bơngai năm ngôi tơ Đawit, na khan kơ lu sư: Athei hiŏng sư hăm giơng noh ba tơ inh tơ âu: Lê̆ inh pơlôch sư.

¹⁶Lu bơngai sư wơh năm tơ noh 'bôh rup man tơ'bĭch kơpal giơng, đei 'long kơn păng sŏk bơbe dan ala kơ̆l rup man noh.

¹⁷Sôl pơma hil kơ Mikal: Liơ e gơh hơlĕnh kơ inh thoi noh, lê̆ bơngai ayăt kơ inh kơdâu klĕnh? Mikal tơl 'bă sư: Na sư khan kơ inh: Ăn kơ inh lĕch, dah ưh, inh gô pơlôch e.

¹⁸Kơplah noh, Đawit kơdâu klĕnh sư năm tơ Samuel tơ Rama, roi ăn kơ Samuel dôm tơdrong mă Sôl pơm kơ sư. Na Đawit hăm Samuel năm, oei tơ Naiôt.

¹⁹Đei bơngai roi ăn kơ Sôl băt kơ. Đawit oei tơ Naiôt lăm pơlei Rama.

²⁰Sôl wơh bơngai năm rôp Đawit; na lu sư 'bôh minh khŭl bơngai khan lê̆ adrol oei suang pơma khan lê̆ adrol păng Samuel pơgơ̆r lu bơngai ei, Yang Bơhngol 'Lơ̆ng Kră Yang 'Bok Kei-Dei mơ̆t pơm kơ lu sư lu sư kư̆m suang pơma khan lê̆ adrol mơ̆n.

²¹Lăp Sôl băt, na sư wơh lu bơngai nai plơ̆ng dơ̆ng; lu sư kư̆m suang pơma khan lê̆ adrol lei lai thoi lu bơngai noh hei. Sôl wơh dơ̆ng lu bơngai năm khŭl mă pêng, lu sư kư̆m suang pơma khan lê̆ adrol.

²²Na Sôl năm akâu sư kơdih truh tơ pơlei Rama; truh tơ anih sơlŭng mong đak Sêku, na sư jet: Samuel păng Đawit oei tơ yơ? Đe tơl khan: Măr sư oei tơ Naiôt lăm pơlei Rama.

²³Sư năm hloi tơ Naiôt lăm pơlei Rama; Yang Bơhngol Kră Yang 'Bok Kei-Dei kư̆m mơ̆t tơ sư, sư kư̆m suang pơma khan lê̆ adrol dĭng truh tơ Naiôt lăm pơlei Rama,

²⁴Sư kư̆m plôh lê̆ ao sư kơdih, suang pơplŏng pơma khan lê̆ adrol 'bơ̆t anăp Samuel, na pơtao suang pơ̆k 'bĭch hloi tơ teh akâu hoh prăt măng lăm măng noh. Kơlih kơ thoi noh na, đei nơ̆r khan: Sôl kư̆m wang mơ̆t hơdai lu bơngai khan lê̆ adrol mơ̆n hă?