Read bahnar I Sam 2 Bible Online

I Sam 2 - bahnar bible

I Sam 2

¹Hana krao apinh păng khan: Jơhngơ̆m inh chơt hiôk lăm Kră Yang; Kră Yang pơm ăn kơ jơhngơ̆m inh hiôk chơt. 'Bơ̆r inh pơma pơgreh khan kơ lu bơngai ayăt kơ inh. Inh chơt hiôk Ih dŏng pơklaih inh.

²Ưh kơ đei bu 'lơ̆ng rơgoh thoi Kră Yang ôh, Ưh kơ đei bu nai thoi Ih; ưh kơ đei tơmo ayơ pĕng lu nhôn thoi Kră Yang 'Bok Kei-Dei.

³Thôi, 'nĕ pă pơma pơang dêh. 'Nĕ pă ăn tơdrong pơang lĕch đơ̆ng 'bơ̆r ih; Yua kơ Kră Yang bơih 'Bok Kei-Dei băt đi; Sư boih kŏng pơtŏ lăng đĭ tơdrong bơ̆n jang.

⁴Hră lu bơngai kơtang tơgơ̆ bơih, mă-lei lu bơngai tơrăn oei đei jơhngơ̆m pran kơtang.

⁵Lu bơngai phĭ jơnap athei jang kơ đe wă kơ đei tơmam sa. Mă-lei lu bơngai pơngot pă đei pơngot dơ̆ng. Drŏ-kăn hơwŏng tơpŭ đei tơpơh 'nu kon, Mă-lei drŏ-kăn đei kon lơ bơih oei sơ'ngon.

⁶Kră Yang ăn lôch păng ăn arih; Sư tơhuŏng bơngai lăm pơlei bơngai lôch păng gô tơiung hơtŏk arih dơ̆ng.

⁷Kră Yang ăn kơ đe dơnuh, Păng tơiung đe mơdrŏng; Sư tơjur đe păng kư̆m pôk hơtŏk mơ̆n.

⁸Sư rô̆ tơiung bơngai dơnuh đơ̆ng 'mui teh; Sư pơdơ̆ng tơiung lu bơngai kơ'bah đơ̆ng lăm 'mui tơnuh, Wă kơ lu sư dơ̆ng hơdai hăm lu bơngai yŏng pơgơ̆r. Păng kư̆m ăn oei lăm anih đe pơyom. Jrăng plei teh noh đơ̆ng Kră Yang, Păng kơpal jrăng noh sư pơdơ̆ng bơih plei teh.

⁹Sư wei-lăng jơ̆ng lu bơngai kiơ̆ Sư tơpăt; Mă-lei lu bơngai kơnê̆ sư gô tơlơ̆ lê̆ lăm măng mu. Kon bơngai ưh kơ kĕ ôh yua tơdrong pran kơdih.

¹⁰Ơ! Kră Yang; Ih gô pơrăm lu bơngai ayăt hĕch hoch đĭ. Đơ̆ng plĕnh Sư gô ăn grơ̆m re pơrăm lu đe noh; Kră Yang gô sek tơlang kơ đĭ-đăng bơngai. Sư gô ăn tơdrong pran kơtang kơ pơtao Sư Păng ăn tơdrong kĕ jei kơ bơngai mă Sư đei hling đak pơgang 'bâu phu.a

¹¹Đơ̆ng noh Êlkana wih brŏk tơ pơlei sư tơ Rama, kon hơ'lơ̆p noh oei tơ noh bơ̆jang kơ Kră Yang 'bơ̆t anăp Hêli 'bok soi.

¹²'Bar 'nu kon drŏ-nglo Hêli jing bơngai kơnê̆ tơpă, bre sư ưh kơ băt hli yom kơ Kră Yang.

¹³Tơdrong juăt lu 'bok soi pơm hăm kon pơlei thoi âu; tơdah đei bu wă pơyơ̆r tơmam soi, lu đĭch đam 'bok soi năm kơplah đe oei pai 'nhĕm, ti sư chĕp chơ'mŏng chơkrơ pêng tŏ hơnĕnh.

¹⁴Sư 'bet lăm gŏ glah, gŏ 'bŭng, gŏ 'bei, dah lăm gŏ teh. 'Nhĕm sĕch ayơ mă đom tơ chơ'mŏng chơkrơ, 'bok soi gô iŏk kơ sư kơdih. Noh tơdrong lu sư pơm hăm kon pơlei Isơrael bơngai bu mă năm tơ pơlei Silô.

¹⁵Mă adrol kơ wă 'buh rơmă, lu đĭch đam 'bok soi truh khan kơ bơngai wă pơyơ̆r tơmam soi noh, Ăn bĕ 'nhĕm sĕch noh kơ 'bok soi wă phang, yua kơ sư ưh kơ wă iŏk 'nhĕm mă iĕm pai hơtŭk sĭn, sư wă iŏk 'nhĕm oei hơdrih đĕch.

¹⁶Tơdah đei bơngai noh khan kơ sư, gô đei 'buh lê̆ rơmă sư adrol 'mơ̆i, na ih gơh iŏk mơ̆ng kơ ih wă, sư khan ưh, ih athei ăn hrei âu hloi, tơdah ưh kơ ăn, kơnh inh gô hơđuh iŏk.

¹⁷Noh tơdrong yoch bre kon drŏ-nglo âu tih tơpă 'bơ̆t anăp Kră Yang. Yua kơ lu sư pơjăm tơmam soi pơyơ̆r kơ Kră Yang lăng ưh kơ gĭt.

¹⁸Gah Samuel bơ̆jang 'bơ̆t anăp Kră Yang, sư oei 'lơ̆p, hrŭk ao Êphôt đe tanh hăm brai se.

¹⁹Rim sơnăm mĕ sư tanh ăn kơ sư minh blah ao tai iĕ, năm ba kơ Samuel, năm hơdai klo sư năm wă pơyơ̆r tơmam soi lăm rim sơnăm.

²⁰Hêli sơkat pŭn hiôk ăn kơ Êlkana hăm akăn sư khan, apinh Kră Yang ăn kơ ih kon hơ'lơ̆p păng bơngai drŏ-kăn âu đei kon hơ'lơ̆p plơ̆ng wă tơplih kơ kon sư mă pơjao boih kơ Kră Yang. Đơ̆ng noh bre sư wih brŏk tơ hnam bre sư.

²¹Kră Yang mơnat kơ Hana, na đei anăp tơpŭ pêng 'nu kon drŏ-nglo păng 'bar 'nu kon drŏ-kăn. Kon tơdăm anăn Samuel rai wơ̆ 'lŏ 'bơ̆t anăp Kră Yang.

²²Hêli đĭ kră dêh sư kơtơ̆ng kơ tơdrong bre kon drŏ-nglo sư pơm kơ đĭ-đăng lu bơngai Isơrael păng tơdrong lu kon sư 'bĭch hơdai hăm bre bơngai drŏ-kăn bơ̆jang 'bơ̆t anih 'măng Bơsŭn Anih Akŭm.

²³Sư khan kơ bre kon sư, Liơ lu iĕm pơm tơdrong thoi noh? Inh kơtơ̆ng đe roi pơđâu lăm kon pơlei kơ tơdrong măr iĕm đei pơm.

²⁴'Nĕ pă pơm thoi noh, ơ bre kon drŏ-nglo inh, ưh kơ 'lơ̆ng ôh tơdrong inh kơtơ̆ng lu kon pơlei Kră Yang roi pơdah rai să.

²⁵Tơdah minh 'nu bơngai pơm yoch hăm bơngai nai, Kră Yang 'Bok Kei-Dei pơm 'long sơlam bre sư; mă-lei tơdah pơm yoch hăm Kră Yang, bu mă gơh krao tơgŭm sư? Mă-lei bre sư ưh kơ wă mơ̆ng ôh nơ̆r 'bă lu sư; Thoi noh Kră Yang pơlôch bre sư.

²⁶Samuel rai wơ̆ 'lŏ lăm akâu; pơm ăn kơ Kră Yang hăm kon bơngai bơ̆n lăp đon.

²⁷Đei minh 'nu bơngai đơ̆ng Kră Yang 'Bok Kei-Dei năm tơ Hêli păng khan kơ sư, Kră Yang khan boih thoi âu, hăm trŏ kơ Inh đei tơ'bôh bơih Inh kơdih kơ hnam 'bok ih kơplah lu sư oei lăm char Êyiptơ pơm đĭch Pharaôn?

²⁸Inh đei rơih iŏk 'bok sư bơih 'bok ih đơ̆ng lăm adrĕch bơngai Isơrael ăn kơ sư pơm 'bok soi Inh, tŏk tơ chơnang soi Inh, soh pơgang 'bâu phu, hrŭk ao Êphôt 'bơ̆t anăp Inh; Inh kư̆m ăn bơih kơ adrĕch ih dôm tơmam soi 'buh đơ̆ng adrĕch lu bơngai Isơrael.

²⁹Thoi yơ mă ih pơjăm tơmam soi 'buh păng tơmam soi phe 'ba pơyơ̆r kơ Inh, tơdrong noh Inh tơtă bơih? Liơ mă ih chu yom kơeng kơ kon ih hloh kơ chu yom kơ Inh păng sa dôm lu tơmam soi wă kơ bek păng tơmam soi 'lơ̆ng hloh đơ̆ng lu kon pơlei Isơrael Inh pơyơ̆r?

³⁰Lei na Kră Yang 'Bok Kei-Dei khan. Inh pơkă bơih hăm hnam ih păng hnam 'bok ih gô bơ̆jang kơ inh ling-lang hloi. Mă-lei dang ei Kră Yang khan: Ưh kơ lei ôh. Inh gô pơyom kơ bơngai bu mă pơyom kơ Inh, bơngai bu mă pơjăm Inh, Inh kư̆m gô pơjăm sư.

³¹'Nâu, đơ̆ng âu tơ anăp Inh gô pơtôch lê̆ lu bơngai oei đơ̆ng pran kơtang đơ̆ng adrĕch ih, hăm lu bơngai đơ̆ng adrĕch 'bok ih. Thoi ei wă ưh kơ đei bu arih dĭng kră lăm adrĕch ih.

³²Ih gô 'bôh đei tơdrong rŭng răng lăm adrĕch Ih, mă khan đei pơm 'lơ̆ng kơ lu bơngai Isơrael ră mă-lei kư̆m oei ưh kơ đei bu arih dĭng kră lăm adrĕch ih dơ̆ng.

³³Inh gô oei lê̆ minh 'nu đơ̆ng lăm adrĕch iĕm, wă kơ oei bơ̆jang tơ chơnang soi inh, mă-lei bơngai noh arih pơmat-tat chhŭr nuih lăm jơhngơ̆m. Yua kơ lu kon hơ'lơ̆p păng lu bơngai nai gô lôch kơ đao gưm.

³⁴Tơdrong âu gô truh kơ 'bar 'nu kon drŏ-nglo ih Hopni păng Phinêhas wă tơbăt kơ ih; dôm tơdrong gô trŏ thoi Inh đei khan bre sư gô lôch lăm minh năr.

³⁵Na inh gô rơih chă kơ Inh kơdih minh 'nu 'bok soi tơnăp tơpăt, bơngai noh gô pơm lăp kơ jơhngơ̆m Inh; Inh gô ăn kơ sư đei minh adrĕch 'lơ̆ng tơpăt wă kơ pơm 'bok soi ling-lang hloi hăm bơngai mă Inh đei hling đak pơgang 'bâu phu.

³⁶Bơngai bu mă oei arih lăm adrĕch ih gô năm apinh minh hlak jên hu păng minh tơpei 'bĕng, na khan, Inh wă apinh ih, tơmơ̆t inh lăm lu 'bok soi wă kơ inh đei 'bĕng sa.