Read bahnar I Sam 21 Bible Online

I Sam 21 - bahnar bible

I Sam 21

¹Đawit truh tơ pơlei Nŏp, tơ'bơ̆p 'bok soi tơm Ahimelek. Ahimelek hli tơtơ̆, kơdâu sơng iŏk sư, na jet: Liơ minh drô̆ ih đĕch ưh kơ đei bu kiơ̆ ih?

²Đawit tơl hăm 'bok soi tơm Ahimelek: Pơtao đei wơh inh minh tơdrong jang păng pơkă khan: 'Nĕ kơ roi ăn kơ bu băt gah tơdrong jang inh wơh ih pơm, kư̆m 'nĕ kơ ăn bu băt nơ̆r inh athei ih. Inh hlôi pơkă ăn boih kơ lu đĭch đam inh 'bơ̆t anih tơ'bơ̆p băl.

³Dang ei 'bok soi hăm đei tơmam sa ưh? Asong inh bĕ pơđăm tŏ 'bĕng mi dah tơmam kiơ 'bok soi đei kư̆m bưh.

⁴'Bok soi tơm tơl Đawit: Lăm tơpang ti inh ưh kơ đei 'bĕng hmă, mă-lei đei 'bĕng rơgoh đĕch; kư̆ mă lu đĭch đam ih ưh kơ đei jê̆ drŏ-kăn.

⁵Đawit tơl hăm 'bok soi: Kơplah nhôn lĕch năm tơblah, lu nhôn ưh kơ đei jê̆ minh 'nu drŏ-kăn ayơ ôh. Lu buăl inh wei rơgoh 'lơ̆ng; mă hơbĕn ao mă dôm lu tơmam tơblah, na mă loi thoi kơ năr âu wă pơm rơgoh ăn kơ lu sư hăm lu tơmam lu sư mă rơgoh?

⁶Thoi noh, 'bok soi tơm ăn kơ Đawit 'bĕng 'lơ̆ng rơgoh yua kơ tơ noh ưh kơ đei 'bĕng nai 'nguaih kơ 'bĕng rơgoh 'lơ̆ng mă đe 'măn lê̆ 'bơ̆t gơ'bang anăp Kră Yang, wă tơplih kơ 'bĕng 'nao plơ̆ng lăm minh năr tơplih.

⁷Lăm năr noh, đei minh 'nu đĭch đam Sôl oei tơ noh mơ̆n, đe gơ̆t lê̆ sư lăm hnam akŭm 'bơ̆t anăp Kră Yang, anăn sư Đôe bơngai Eđôm, pơgơ̆r lu bơngai wei triu Sôl.

⁸Đawit jet Ahimelek: 'Bok soi, ih hăm đei tơju đah dao ayơ? Inh ưh kơ đei chĕp ba dao dah tơju tơmam kiơ ôh, yua kơ pơtao wơh inh hăt hot dêh.

⁹'Bok soi tơm tơl: Âu 'nâu đei đao Gôliat bơngai Philistin mă đêl ih pơlôch lăm thŭng Êlah oei pôn lê̆ lăm che, lê̆ 'bơ̆t cheng êphot to; tơdah ih wă iŏk, na iŏk wăi; tơ âu ưh kơ đei dao nai. Đawit tơl: Ưh kơ đei dao nai dang đao 'nâu, pơjao ăn kơ inh.

¹⁰Đawit iung năr noh sư oei ôn kơ Sôl năm truh tơ Akis, pơtao Gat.

¹¹Lu đĭch đam Akis jet: 'Nâu hăm trŏ kơ Đawit, pơtao dêh noh dah kiơ? Hăm trŏ kơ Đawit 'nâu mă lu bơngai drŏ-kăn hơri suang khan: Sôl pơlôch rơbâu rơbâu 'nu, gah Đawit pơlôch mơjĭt-rơbâu rơbâu 'nu?

¹²Đawit tơtăm kơ nơ̆r 'nâu lăm jơhngơ̆m hli dêh kơ Akis, pơtao Gat.

¹³Đawit pơm wơnh 'bơ̆t anăp lu đe noh păng thoi bơngai sem brem, Đawit chhơ̆ tơ lu 'măng păng lê̆ đak hai ro tơ sŏk kang sư.

¹⁴Akis khan kơ lu đĭch đam sư: To lu iĕm hăm 'bôh bơngai noh wơnh, yua kơ kiơ lu iĕm chông ba sư truh tơ inh?

¹⁵Tơ anih inh âu ưh kơ đei bơngai wơnh hă, na lu iĕm chông ba bơngai 'nâu truh tơ inh wă kơ sư pơyeh inh hă? Na liơ bơngai thoi âu mă mơ̆t lăm hnam inh?