Read bahnar I Sam 22 Bible Online

I Sam 22 - bahnar bible

I Sam 22

¹Đawit weh đơ̆ng noh, năm ôn lăm hơgơp tơmo tơ pơlei Ađulam lu đe 'nhŏng sư păng đĭ-đăng kơ hnam dơnŏ 'bă sư băt, na jur năm tơ sư,

²Kŭm đei lu bơngai pơmat-tat, lu bơngai hre đom păng lu bơngai đei jơhngơ̆m ơh sơ'ngon kư̆m wang jur akŭm hơdai hăm sư, na sư pơm kơ̆l lu đe ei; thoi noh lu sư đei dang puăn-hrĕng 'nu bơngai.

³Đơ̆ng noh Đawit năm tơ pơlei Mispa lăm dêh Môap, na sư pơma dơnuh hăm pơtao Môap: Apinh ih asong ăn kơ lu mĕ 'bă inh năm oei hơdai hăm ih dĭng truh tơ inh băt dôm tơdrong kiơ Kră Yang 'Bok Kei-Dei gô pơm ăn kơ inh.

⁴Thoi noh Đawit chông ba mĕ 'bă sư năm truh 'bơ̆t anăp pơtao Môap, na măr sư oei hơdai hăm pơtao đĭ kơ măng năr Đawit ôn tơ noh.

⁵Mă-lei, Gat bơngai khan lê̆ adrol, khan kơ Đawit: Ih 'nĕ pă ôn tơ hơgơp tơmo âu; năm bĕ tơ dêh Juđa; Đawit năm truh tơ bri Hêrêt.

⁶Sôl băt kơ lu bơngai chă 'bôh tơ'bơ̆p Đawit hăm lu bơngai kiơ̆ sư. Kơplah noh Sôl oei ngôi ala yơ̆p 'long hla prai tơ Gibêah, ti sư chĕp tơju, gah lu đĭch đam sư oei tăp dăr kơ sư.

⁷Sôl pơma kơ lu đĭch đam sư mă oei tăp dăr kơ sư: Ơ lu adrĕch bơngai Bênjamin mơ̆ng bĕ. Hăm trŏ kơ kon Jese gô ăn đĭ kơ lu iĕm, chŭn păng lu pơgar hơmu hă? Sư gô pơk ăn kơ iĕm pơm kơ̆l rơbâu 'nu bơngai păng hrĕng 'nu bơngai hă?

⁸Liơ đĭ-đăng kơ lu iĕm pơm đon ayăt kơ inh? Yua kơ kiơ lu iĕm ưh kơ roi ăn kơ inh băt kon drŏ-nglo inh pơgơ̆p pơkă pơm buăl hăm kon drŏ-nglo Jese? Yua kơ kiơ ưh kơ đei bơngai bu 'mêm mơmat kơ inh, roi ăn kơ inh băt lê̆ adrol kon drŏ-nglo inh hlôi pơm ăn kơ đĭch đam inh ayăt hăm inh, chă đon pơrăm inh, thoi sư oei pơm dang ei?

⁹Đôe bơngai Eđôm, wei pơgơ̆r lu đĭch đam Sôl tơl thoi âu: Inh 'bôh kon drŏ-nglo Jese năm tơ pơlei Nŏp, mơ̆t lăm hnam Ahimelek, kon drŏ-nglo Ahitup;

¹⁰Ahimelek krao apinh Kră Yang tơgŭm păng đei ăn tơmam sa kơ sư, kư̆m ăn kơ sư tơju Gôliat, bơngai Philistin.

¹¹Pơtao wơh bơngai năm krao Ahimelek, kon drŏ-nglo Ahitup, jơ̆ 'bok soi tơm hăm đĭ-đăng hnam dơnŏ 'bă sư, pơm 'bok soi mă oei lăm pơlei Nŏp; đĭ-đăng kơ lu sư năm tơ pơtao.

¹²Sôl khan: Ơ kon drŏ-nglo Ahitup, mơ̆ng bĕ. Sư tơl: Ô, đei inh âu.

¹³Sôl khan dơ̆ng: Yua kơ kiơ ih pơm đon hăm kon drŏ-nglo Jese mă ayăt hăm inh? Ih asong ăn kơ sư 'bĕng sa, na ăn kơ sư minh hlak tơju, krao apinh Kră Yang 'Bok Kei-Dei tơgŭm sư, wă kơ sư tung blah inh, chă đon wă pơrăm inh, thoi sư oei pơm năr 'nâu?

¹⁴Ahimelek tơl pơtao: Na, lăm lu đĭch đam ih, bơngai bu tơnăp dang Đawit. Ih pơk sư pơm ŏng ih, yŏng lu bơngai gak ih păng gơh pơyom hloh kơ đĭ-đăng lăm hnam pơtao ih?

¹⁵Hăm trŏ kơ 'nao năr 'nâu đĕch inh krao khan, apinh Kră Yang 'Bok Kei-Dei ăn kơ sư? Tơpă inh ưh kơ đei pơm thoi noh! Apinh pơtao 'nĕ kơ ngeh minh nơ̆r ayơ ăn kơ đĭch đam pơtao dah ăn kơ bơngai bu lăm hnam 'bă inh; yua kơ bơngai mă đĭch đam pơtao ưh kơ băt kơ tơdrong kiơ, tŏ sĕt dah lơ, gah tơdrong noh.

¹⁶Pơtao tơl: Ahimelek, tơpă ih păng lu hnam dơnŏ ih gô lôch!

¹⁷Pơtao khan kơ lu bơngai pơm đam kơ'yĕng sư dơ̆ng jê̆ sư thoi âu: Năm pơlôch bĕ, lu 'bok soi đơ̆ng Kră Yang yua kơ lu sư tơgŭm Đawit, băt kơ sư ôn mă ưh kơ roi kơ inh băt; mă-lei lu đĭch đam pơtao ưh kơ pơ̆n wă pơlôch lu 'bok soi đơ̆ng Kră Yang.

¹⁸Pơtao, khan kơ Đôe: Ih năm pơlôch lu 'bok soi bĕ. Đôe bơngai Eđôm, pơlôch lu 'bok soi; lăm năr noh đei tơhngam-jĭt pơđăm 'nu bơngai hrŭk ao êphot.

¹⁹Sôl pơlôch kon pơlei Nop păng đao, pơlei lu 'bok soi, bơngai drŏ-nglo păng bơngai drŏ-kăn, lu hơ'lơ̆p păng lu bơngai oei mŏm, rơmo, aseh iĕ păng triu, pơlôch đĭ-đăng păng đao.

²⁰Mă-lei, minh 'nu lăm kon drŏ-nglo Ahimelek, sâu Ahitup anăn sư Abiathar lĕch hlôi klaih na kơdâu truh tơ'bơ̆p Đawit.

²¹Abiathar roi ăn kơ Đawit băt: Sôl hlôi pơlôch boih lu 'bok soi đơ̆ng Kră Yang.

²²Đawit tơl Abiathar: Lăm năr noh, inh băt hơđăl kơ Đôe, bơngai Eđôm, sư kư̆m đei măt tơ noh mơ̆n, rŏ lăng sư roi ăn kơ Sôl. Inh gô pŭ đĭ kơ tơdrong lôch đĭ-đăng hnam 'bă ih.

²³Oei hơdai inh, 'nĕ kơ hli; bơngai bu chă pơrăm tơdrong arih inh, kư̆m chă pơrăm tơdrong arih ih mơ̆n; ih oei hơdai inh ih gơh đei hiôk hơđơ̆ng.