Read bahnar I Sam 23 Bible Online

I Sam 23 - bahnar bible

I Sam 23

¹Đei bơngai năm roi kơ Đawit: To, lu bơngai Philistin năm blah pơlei Kêila păng tơgar iŏk 'ba đơ̆ng lu cham preh 'ba,

²Đawit krao apinh Kră Yang: Inh hăm gơh blah lu bơngai Philistin 'nâu? Kră Yang tơl Đawit khan: Năm bĕ, blah bơngai Philistin păng dŏng kon pơlei Kêila.

³Lu bơngai kiơ̆ Đawit khan: Tơ lăm dêh Juđa, lu bơ̆n oei hli dêh, pơma kơ kiơ năm truh tơ pơlei Kêila blah lu linh Philistin!

⁴Đawit krao apinh dơ̆ng Kră Yang; Kră Yang tơl sư: Iung bĕ, jur năm tơ Kêila; Inh gô jao kon pơlei bơngai Philistin lăm tơpang ti ih.

⁵Đawit jur năm hăm bơngai kiơ̆ sư truh tơ pơlei Kêila, tơblah hăm kon pơlei bơngai Philistin, pơm ăn kơ lu sư kĕ jei tih, 'noh boih, Đawit dŏng pơklaih kon pơlei Kêila thoi noh.

⁶Na, kơplah Abiathar, kon drŏ-nglo Ahimelek, kơdâu klĕnh tơ Đawit tơ pơlei Kêila, đei chĕp ba êphot.

⁷Đe kư̆m roi ăn kơ Sôl băt Đawit mơ̆t lăm Kêila; Sôl khan: Kră Yang 'Bok Kei-Dei jao sư lăm tơpang ti inh, yua kơ sư năm ba akâu sư lăm pơlei đei 'măng jang tang chơkăl đĭ.

⁸Sôl krao đĭ lu linh năm jur tơ Kêila, wang tăp dăr kơ Đawit păng lu bơngai kiơ̆ sư.

⁹Wă Đawit băt Sôl chă wă pơrăm sư, na sư khan kơ 'bok soi tơm Abiathar: Chĕp ba ao êphot tơ âu.

¹⁰Đawit, krao khan: Kơkuh kơ Ih Kră Yang 'Bok Kei-Dei bơngai Isơrael, đĭch đam ih băt kơ Sôl wă năm blah pơrăm kon pơlei Kêila, yua kơ inh.

¹¹Lu kon pơlei Kêila gô jao inh lăm tơpang ti Sôl hă? Sôl gô jur năm thoi nơ̆r đĭch đam Ih kơtơ̆ng boih? Kơkuh kơ Ih Kră Yang 'Bok Kei-Dei bơngai Isơrael, apinh ăn kơ đĭch đam ih âu băt. Kră Yang tơl: Sôl gô jur.

¹²Đawit apinh dơ̆ng: Lu kon pơlei Kêila gô jao inh păng lu bơngai kiơ̆ inh lăm tơpang ti Sôl hă? Kră Yang tơl: Lu sư gô jao lu iĕm.

¹³Đawit hăm lu bơngai kiơ̆ sư, dang tơdrâu-hrĕng 'nu bơngai lu sư iung lĕch đơ̆ng pơlei Kêila păng năm tơ anih ayơ mă gơh oei. Sôl băt kơ Đawit lĕch hlôi boih đơ̆ng Kêila, na ưh pă năm blah dơ̆ng.

¹⁴Đawit oei lăm char glă chơngue, hơdrô̆ tơ kơpal groi char glă Sip. Sôl chă sư rim năr ưh kơ pơdơh, mă-lei Kră Yang 'Bok Kei-Dei ưh kơ đei layơ wă jao Đawit lăm tơpang ti Sôl.

¹⁵Kơplah Đawit oei tơ Hơres lăm char glă sip Đawit 'bôh Sôl ba linh wă pơrăm tơdrong arih sư.

¹⁶Na Jônathan kon drŏ-nglo Sôl, iung năm tơ Hơres ngôi tơ Đawit oei lăm bri, pơma pơlung sư oei kơjăp đei đon lui gơnang kơ Kră Yang 'Bok Kei-Dei,

¹⁷Jônathan khan kơ Đawit: Ih 'nĕ kơ hli; ti Sôl, 'bă inh, ưh kơ gơh hơtŭt 'bơm kơ ih ôh. Ih gô pơm pơtao lu bơngai Isơrael, gah inh gô pơm yŏng pơgơ̆r, mă 'bar đơ̆ng rŏng ih Sôl 'bă inh, kư̆m băt hơđăl dôm tơdrong noh.

¹⁸'Bar 'nu bre sư kư̆m pơgơ̆p pơkă 'bơ̆t anăp Kră Yang; na Đawit oei lăm Hơres dơ̆ng, gah Jônathan wih brŏk tơ hnam sư.

¹⁹Kon pơlei Sip tŏk năm tơ Sôl tơ Gibêah, na roi: Đawit ôn tơ lăm lu nhôn tơ lăm bri, Hơres kơpal groi Hakila, oei tơ gah gơal Jêsimôn.

²⁰Na, ơ pơtao dah ih wă jur, jur bĕ tơ tơring lu nhôn, lu nhôn gô rôp sư jao sư ăn kơ ih.

²¹Sôl tơl: Hơpơi kơ Kră Yang ăn pŭn hiôk kơ lu iĕm, yua kơ lu iĕm đei jơhngơ̆m băt mơnat kơ inh!

²²Năm apinh pơnhen lăng dơ̆ng wă kơ băt mă hơđăl anih ayơ sư oei păng bu hlôi 'bôh boih sư oei tơ noh; yua kơ đe đei roi khan sư bơngai hơgei hơlĕnh dêh.

²³Năm pơnhen lăng dơ̆ng păng wă kơ băt rim anih sư ôn, na wih brŏk roi ăn kơ inh mă hơđăl, na inh gô năm hơdai hăm lu iĕm. Tơdah sư oei oei lăm tơring, na inh gô chơchă sư tơ rim lăm adrĕch bơngai Juđa.

²⁴Na lu sư iung brŏk wih tơ char glă Sip adrol kơ Sôl; gah Đawit păng lu bơngai kiơ̆ sư oei lăm char glă chơngue Maôn tơ Araba gah gơal Jêsimôn.

²⁵Sôl hăm lu bơngai kiơ̆ sư năm chă Đawit. Đawit băt kơ tơdrong noh, na jur lăm bri kông, lăm char glă chơngue Maôn, Sôl băt na druh kiơ̆ Đawit lăm char glă chơngue Maôn.

²⁶Sôl tŏk kông pah âu, Gah Đawit hăm khŭl kiơ̆ sư tŏk kông pah to. Đawit hăt hot kơdâu ôn wă kơ gơh klaih lĕch hlôi đơ̆ng Sôl. Sôl păng lu đĭch đam sư rai jê̆ wang tăp dăr kơ Đawit hăm lu bơngai kiơ̆ sư wă rôp lu sư.

²⁷Đei minh 'nu bơngai năm truh tơ Sôl na roi ăn: Jah brŏk tĕnh tĕnh bĕ, lu kon pơlei bơngai Philistin năm mơ̆t blah tơgar iŏk dêh bơ̆n boih.

²⁸Na Sôl pă druh Đawit boih, năm brŏk blah kon pơlei bơngai Philistin, thoi ei na, đe khan anih 'nâu jơ̆ Tơmo Tih dŏng pơklaih.

²⁹Na, Đawit weh hlôi đơ̆ng anih năm oei tơ anih kơjăp tơ kông Êngêđi.