Read bahnar I Sam 24 Bible Online

I Sam 24 - bahnar bible

I Sam 24

¹Kơplah Sôl druh blah lu bơngai Philistin wih brŏk đei minh 'nu bơngai năm roi kơ Sôl thoi âu: To, Đawit oei lăm char glă Êngêđi.

²Sôl chĕp ba pêng-rơbâu 'nu linh hơgei rơih đơ̆ng lăm lu bơngai Isơrael, năm chă Đawit hăm lu bơngai kiơ̆ sư, năm truh tơ lu Tơmo Bơbe Bri.

³Sôl năm truh 'bơ̆t jê̆ anih hơdrong bơbe triu, tơ noh đei minh pơm hơgơp tơmo; Sôl mơ̆t lăm noh năm wă kơ chă bơyơ̆ng. Na, Đawit hăm lu bơngai kiơ̆ sư oei tơ lăm hơgơp jrŭ.

⁴Lu bơngai kiơ̆ Đawit roi kơ sư: Năr 'nâu jơ̆ năr mă Kră Yang đei khan kơ ih: Inh gô jao lu bơngai ayăt kơ ih lăm tơpang ti ih mơ̆ng kơ ih wă pơm liơ kơ sư; đơ̆ng noh Đawit iung, năm kăt tơtông iŏk tơdrơi ao Sôl.

⁵'Blă kơ noh lăm jơhngơ̆m sư hmach kơdih yua kơ kăt iŏk tơdrơi ao pơtao.

⁶Sư khan kơ lu bơngai kiơ̆ sư: Hơpơi kơ Kră Yang phak inh tơdah inh pơm yoch hăm yŏng tơ'ngla inh, bơngai mă chu tuh đak rơmă đơ̆ng Kră Yang, yua kơ sư jơ̆ bơngai chu tuh đak rơmă đơ̆ng Kră Yang.

⁷Đawit khă lu bơngai kiơ̆ sư, 'nĕ kơ pơm kơ akâu Sôl, Sôl iung lĕch đơ̆ng hơgơp tơmo na yak rok trong năm tơ nai.

⁸Kơplah noh Đawit kư̆m iung, lĕch đơ̆ng lăm tơmo, krao Sôl, na khan: Ơ pơtao, yŏng inh! Sôl hue lăng tơ rŏng, na Đawit kŭp kơ̆l tơ teh.

⁹Đawit khan kơ Sôl: Yua kơ kiơ pơtao mơ̆ng dôm lu nơ̆r đe khan: Đawit chă wă pơrăm pơtao?

¹⁰To, lăng bĕ măt ih 'bôh năr 'nâu lăm hơgơp tơmo Kră Yang jao ih lăm tơpang ti inh, đei bơngai athei inh pơlôch ih, mă-lei inh mơnat kơ ih, na khan inh ưh kơ pơm kiơ kơ akâu jăn yŏng inh yua kơ sư jơ̆ đơ̆ng Kră Yang tuh ăn đak rơmă.

¹¹Ơ 'bă! Lăng bĕ tơdrơi ao ih mă inh oei chĕp lăm tơpang ti inh; ih 'bôh inh lăp kăt iŏk tơdrơi ao ih mă-lei inh ưh kơ pơlôch ih, băt boih inh ưh kơ đei pơm tơdrong yoch kiơ hăm ih. Mă-lei gah ih, chă wă pơlôch inh.

¹²Apinh Kră Yang gô sek tơlang ih păng inh. Kră Yang gô pơm 'mong kơ ih ăn kơ inh, mă-lei gah inh ưh kơ đei pơm kiơ truh kơ akâu jăn ih.

¹³Đe đei nơ̆r khan: Tơdrong kơnê̆ lĕch đơ̆ng bơngai kơnê̆. Mă-lei tơpang ti inh ưh kơ đei layơ wă hơtŭt 'bơm akâu jăn ih.

¹⁴Pơtao Isơrael tơblah hăm bu? Ih druh 'moi bu? Minh pơm kŏ lôch! Minh pơm siso!

¹⁵Apinh, Kră Yang gô pơm kơdranh sek tơlang ih păng inh. Sư gô lăng lăng păng dŏng inh păng sek tơlang tơpăt na dŏng pơklaih inh đơ̆ng tơpang ti ih.

¹⁶Đang kơ Đawit pơma dôm lu nơ̆r 'nâu boih, na Sôl tơl: Ơ Đawit kon inh, hăm trŏ kon dah kiơ? Sôl nhơ̆m ôr,

¹⁷Sôl khan kơ Đawit: Kon pơm tơpăt hloh kơ 'bă, yua kơ iŏk tơdrong 'lơ̆ng, na pơm 'mong tơdrong kơnê̆ 'bă hlôi pơm ăn kơ kon.

¹⁸Năr 'nâu, kon tơ'bôh kon iŏk tơdrong 'lơ̆ng pơm hăm 'bă; yua kơ Kră Yang hlôi pơjao boih 'bă lăm tơpang ti kon, mă-lei kon ưh kơ đei pơlôch 'bă,

¹⁹Hăm đei bu tơ'bơ̆p bơngai ayăt hăm bơ̆n mă khan achăng lê̆ sư brŏk hiôk-hian ưh kơ đei kiơ? Hơpơi kơ Kră Yang iŏk tơdrong 'lơ̆ng pơm ăn kơ kon gah tơdrong kon hlôi pơm ăn kơ 'bă năr 'nâu!

²⁰Tơpă inh băt kơ kon gô pơm pơtao păng teh đak Isơrael gô kơjăp sot lăm tơpang ti kon.

²¹Thoi noh dang ei, yua bĕ anăn Kră Yang pơkă hăm inh khan kon ưh kơ gơh wă pơlôch adrĕch adrung inh păng kư̆m ưh kơ gơh wă pơrăm lê̆ anăn inh đơ̆ng lu yă 'bok inh.

²²Đawit pơkă nơ̆r hăm Sôl. Sôl brŏk wih tơ hnam sư, gah Đawit hăm lu bơngai kiơ̆ sư hơlơ̆k tơ anih ôn kơ'nơp dơ̆ng.