Read bahnar I Sam 25 Bible Online

I Sam 25 - bahnar bible

I Sam 25

¹Samuel lôch; đĭ-đăng lu bơngai Isơrael akŭm băl nhơ̆m hmoi kơ sư, đơ̆ng noh 'bŭ sư tơ lăm pơlei Rama. Đawit iung jur năm tơ char glă Pharan.

²Na, đei minh 'nu bơngai oei tơ pơlei Maôn, mă-lei teh jang sa tơ pơlei Karmel, sư bơngai mơdrŏng, đei pêng-rơbâu triu păng minh-rơbâu bơbe; sư oei tơ Karmel oei yuă sŏk triu sư.

³Anăn sư Nabal păng akăn sư anăn Abigail; akăn sư hơgei 'lơ̆ng hơbŏ, gah klo sư bơngai khĕnh; kơnê̆ sư adrĕch Kalep.

⁴Đawit oei lăm tơmăn glă khan Nabal yuă sŏk triu,

⁵Na wơh mơjĭt 'nu tơdăm mơlôh năm pơkă kơ lu sư: Năm bĕ tơ Karmel, tơ'bơ̆p Nabal roi pơtruh nơ̆r inh hơpong hăm sư.

⁶Lu iĕm khan: Hơpơi kơ ih đei arih sot chơt hiôk, hơpơi kơ hnam dơnŏ ih kư̆m chơt hiôk; tơm!

⁷Đawit kơtơ̆ng ang khan ih đei lu bơngai hơgei yuă sŏk triu. Kơplah lu bơngai wei triu ih oei jê̆ lu nhôn kơplah lu nhôn ưh kơ đei pơm kiơ kơ lu sư kơplah tơ Karmel. Lu sư kư̆m ưh kơ đei kiơ hiong ôh.

⁸Ih apinh bĕ lu đĭch đam ih, lu sư gô roi ăn kơ ih. Apinh ih ăn kơ lu tơdăm mơlôh inh đei mơnat 'bơ̆t anăp ih, yua kơ lu nhôn năm tơ âu trŏ kơ năr giĕng 'lơ̆ng rŏ. Đah lăm tơpang ti ih đei tơmam kiơ, asong bĕ kơ lu đĭch đam ih păng ăn kơ kon ih Đawit.

⁹Lu tơdăm mơlôh đơ̆ng Đawit wơh năm truh păng pơtruh nơ̆r Đawit hơpong kơ Nabal. Pơma roi đang boih; lu sư gô.

¹⁰Nabal tơl lu đĭch đam Đawit: Đawit noh bu? Kon drŏ-nglo Jese noh bu? Lu đĭch đam klĕnh đơ̆ng yŏng tơ'ngla lăm năr 'nâu lơ dêh!

¹¹Na inh iŏk 'bĕng, đak păng 'nhĕm inh hơmet boih kơ lu bơngai jang yuă sŏk bơbe triu na mă wă ăn kơ lu bơngai ưh kơ băt đơ̆ng yơ truh tơ âu?

¹²Lu tơdăm mơlôh đơ̆ng Đawit wơh wih brŏk dơ̆ng, lu sư roi ăn kơ Đawit mơ̆ng dôm lu nơ̆r noh.

¹³Đawit khan kơ lu bơngai kiơ̆ sư: Rim 'nu kơ lu bơ̆n athei tơ̆n đao bơ̆n. Lu sư tơ̆n đao păng Đawit kư̆m tơ̆n đao sư; dang puăn-hrĕng 'nu bơngai năm kiơ̆ Đawit, oei pă 'bar-hrĕng 'nu bơngai oei răp gô wei tơmam.

¹⁴Đei minh 'nu bơngai đĭch roi ăn kơ Abigail, Akăn Nabal: Đawit đei wơh lu bơngai đơ̆ng char glă năm tơ'bơ̆p yŏng tơ'ngla lu nhôn, mă-lei Nabal pơma re kơ lu sư.

¹⁵Kơplah mă lu nhôn oei jê̆ lu sư lăm tơmăn glă, lu sư pơm 'lơ̆ng hăm lu nhôn, lu nhôn huay kơ đei tơdrong kiơ păng kư̆m ưh kơ đei kơ'bah dah hiong minh tơmam kiơ ôh.

¹⁶Lu sư bơwei lu nhôn mă kơ'năr păng kơmăng lu sư nhen thoi dur pĕng lu nhôn, kơplah lu nhôn wei triu jê̆ tơ lăm tơring lu sư.

¹⁷Thoi noh dang ei ih athei tơchĕng lăng wă pơm liơ yua kơ gô đei tơdrong răm truh kơ yŏng tơ'ngla lu nhôn păng kư̆m truh kơ hnam dơnŏ ih; yŏng tơ'ngla khĕnh dêh, ưh kơ đei bu pơ̆n pơma kiơ hăm sư.

¹⁸Abigail hăt hot iŏk 'bar-hrĕng tŏ tơpei 'bĕng, 'bar kơthŭng akar sik hơmu; 'nhĕm pơđăm tŏ triu pai sĭn boih. Pơđăm kơthŭng phe 'ba mi hơdrĕng. Minh-hrĕng hơie plei hơmu, 'bar-hrĕng tơpei 'bĕng plei hơra kro, sư hơtŏk tơ rŏng aseh iĕ.

¹⁹Na sư khan kơ lu đĭch đam sư: Bĕ năm adrol kơ inh, inh gô năm kiơ̆ đơ̆ng rŏng, mă-lei sư ưh kơ đei roi ăn kơ Nabal klo sư băt.

²⁰Sư hao aseh iĕ jur lăm thong đei kông tăp dăr na 'bôh Đawit hăm lu bơngai kiơ̆ sư kư̆m năm tơklă tơ lu sư.

²¹Đawit đei pơma khan: Tơpă pih pang gleh lap đĕch lu nhôn hlôi bơwei dôm tơmam bơngai 'nâu lăm char glă, sư huay kơ'bah dah hiong minh tơdrong kiơ, mă-lei sư iŏk tơdrong kơnê̆ 'mong tơdrong 'lơ̆ng inh pơm.

²²Hơpơi kơ Kră Yang 'Bok Kei-Dei phak inh thoi âu dah mă trăp hloh! Tơdah truh tơ dơning inh oei lê̆ minh 'nu bơngai drŏ-nglo ayơ oei arih lăm hnam dơnŏ sư.

²³Abigail 'bôh Đawit, jur hloi đơ̆ng aseh iĕ hăt hot, na drap tơ teh 'bơ̆t anăp Đawit.

²⁴Thoi noh sư kŭp kơ̆l 'bơ̆t jơ̆ng na pơma khan thoi âu: Ơ yŏng tơ'ngla, inh glăi, glăi inh! Apinh đĭch đam ih âu gơh pơma roi hăm ih; apinh mơ̆ng bĕ dôm lu nơ̆r đĭch đam ih âu.

²⁵Apinh ih 'nĕ kơ jơ̆ yo kơ Nabal bơngai khĕnh to 'noh; yua kơ jơhngơ̆m klơm klak sư trŏ kơ anăn sư, anăn sư Nabal yua kơ lăm sư đei ưh kơwao, kơchu; gah inh, inh ưh kơ 'bôh lu bơngai mă ih wơh.

²⁶Kră Yang găn ih wă pơm tuh pham wă pơm 'mong inh pao anăn Kră Yang mă arih ling-lang păng tơdrong arih ih kơdih na pơkă; hơpơi kơ lu ayăt kơ ih păng lu bơngai chă wă pơrăm ih kư̆m pŭ nhen thoi Nabal!

²⁷Na dang ei 'nâu jơ̆ tơmam đĭch đam ih chĕp ba wă ăn kơ ih, kư̆m wă asong ăn kơ lu bơngai kiơ̆ ih.

²⁸Apinh 'nĕ jơ̆ yo kơ đĭch đam ih âu! Kră Yang tơpă gô ăn kơ teh đak pơtao ih kơjăp sot, yua kơ ih wang tơblah hơdai hăm Kră Yang păng đĭ lăm chăl arih ih ưh kơ đei 'bôh minh tơdrong răm kiơ.

²⁹Tơdah đei bu wă iung pơm kơnê̆ păng pơrăm tơdrong arih ih Kră Yang 'Bok Kei-Dei ih gô bơwei tơdrong arih lăm hơnŭng lu bơngai arih; gah tơdrong arih lu bơngai ayăt kơ ih, Kră Yang gô klơ̆m tŭk lê̆ mă ataih thoi hră prah 'brơ̆m tơmo.

³⁰Layơ mă Kră Yang pơm 'lơ̆ng mă sư hlôi pơkă wă ăn kơ ih, păng kư̆m pơk ih pơm yŏng pơgơ̆r lu bơngai Isơrael,

³¹Hơpơi rŏ kơ ih huay kơ tơtăm dah jơhngơ̆m ưh kơ hiôk yua kơ đei tuh pham mă tơdrong ưh kơ đei pơm 'mong kơ kơdih akâu. Layơ Kră Yang ăn kơ ih đei pŭn hiôk, apinh 'blŏk kơ inh.

³²Đawit tơl nơ̆r Abigail: Inh kơkuh bơnê kơ Kră Yang 'Bok Kei-Dei lu bơngai Isơrael, đei wơh ih năm truh tơ'bơ̆p inh năr 'nâu!

³³Inh kơkuh bơnê kơ Kră Yang. Sư ăn pŭn hiôk hlôh wao gơh hơgei kơ ih năr 'nâu găn inh ưh kơ ăn inh pơm tuh pham păng găn inh, ưh kơ wă inh pơm 'mong ăn kơ inh kơdih.

³⁴Tơpă Kră Yang 'Bok Kei-Dei mă arih ling-lang lu bơngai Isơrael, jơ̆ Kră Yang găn inh ưh ăn kơ inh pơrăm ih, tơdah ih ưh kơ hăt hot tơ'bơ̆p inh, na truh pơgê dơning ưh kơ đei minh 'nu bơngai drŏ-nglo ayơ mă oei arih lăm hnam Nabal.

³⁵Đawit iŏk dôm tơmam đơ̆ng ti sư chĕp ba na pơkă khan: Brŏk wih bĕ tơ hnam dơnŏ ih hiôk hơđơ̆ng, inh kơtơ̆ng boih dôm nơ̆r ih apinh păng inh kư̆m răk kiơ̆ thoi nơ̆r hơpơi.

³⁶Wă Abigail brŏk truh tơ Nabal, na 'bôh Nabal oei et sa tih lăm hnam sư, et sa tih nhen thoi pơtao mơ̆n. Nabal đei jơhngơ̆m hiôk chơt păng suai dêh. Abigail ưh kơ đei roi ăn kơ sư băt dôm tơdrong kiơ tih dah iĕ, gô truh kơ pơgê.

³⁷Pơgê năr đơ̆ng rŏng gô Nabal huay pă suai boih, akăn sư roi ăn kơ sư dôm tơdrong noh, na sư hli dêh akâu sư arănga nhen thoi tơmo.

³⁸Dang mơjĭt năr đơ̆ng rŏng Kră Yang pơlôch Nabal na sư lôch hloi.

³⁹Đawit kơtơ̆ng ang Nabal lôch boih, sư khan: Trŏ kơkuh bơnê ư-ang kơ Kră Yang. Sư dŏng tơgŭm inh pơm mong kơ Nabal yua kơ sư pơm kơnê̆ kơ inh păng bơwei inh đĭch đam Sư wă kơ huay kơ pơm kơnê̆! Kră Yang tuh boih tơdrong kơnê̆ Nabal tơ kơ̆l sư kơdih! Na, Đawit wơh bơngai năm apinh Abigail pơm akăn sư

⁴⁰Lu đĭch đam Đawit năm chă Abigail, tơ Karmel, na khan: Đawit wơh lu nhôn năm truh tơ ih, năm iŏk ih sư wă iŏk ih pơm akăn.

⁴¹Abigail, drap kơkuh hloi, na khan: Inh âu wă pơm đĭch đam Đawit pơm bơngai ôp jơ̆ng yŏng tơ'ngla inh.

⁴²Abigail iung hloi, hao aseh iĕ sư, đei pơđăm 'nu đĭch drŏ-kăn sư năm kiơ̆ sư, na năm hơdai hăm lu bơngai Đawit wơh, pơm akăn Đawit.

⁴³Đawit adrol noh kư̆m iŏk oei kơ Ahinôam, oei tơ Jesreel na 'bar 'nu bre noh kư̆m pơm akăn sư.

⁴⁴Mikal kon drŏ-kăn Sôl, đêl akăn Đawit Sôl ăn oei kơ Phaltiel kon Lais, bơngai đơ̆ng pơlei Galim.