Read bahnar I Sam 26 Bible Online

I Sam 26 - bahnar bible

I Sam 26

¹Kon pơlei Sip năm chă Sôl tơ Gibêah, na roi khan: Đawit oei ôn tơ kơpal groi Hakila, tơklă char Jêsimôn.

²Sôl iung năm chĕp ba pêng-rơbâu linh rơih iŏk đơ̆ng lăm lu bơngai Isơrael, năm jur tơ lăm char glă Sip chă Đawit.

³Sôl pơm kơđông kơpal groi Hakila 'bơ̆t cheng trong tơklă char glă Jêsimôn.

⁴Na wơh bơngai năm lăng tơng păng băt tơpă Sôl truh boih,

⁵Đawit iung, năm truh 'bơ̆t anih Sôl pơm kơđông; sư 'bôh anih tep Sôl păng Apner kon drŏ-nglo Nêr, bơngai mă pơgơ̆r linh; Sôl tep lăm kơđông đei lu linh tep tăp dăr kơ sư.

⁶Đawit jet Ahimelek, bơngai Hêtit păng Abisai kon drŏ-nglo Sêruia, oh Jôap: Bu 'maih năm hăm inh jur năm tơ anih Sôl? Abisai tơl: Inh gô năm jur hăm ih.

⁷Na Đawit păng Abisai oei măng năm mơ̆t lăm kơđông, 'bôh Sôl oei tep lăm kơđông, tơju hlôt tơ teh cheng kơ̆l sư. Apner hăm lu linh tep tăp dăr kơ sư.

⁸Abisai khan kơ Đawit: Năr 'nâu Kră Yang 'Bok Kei-Dei pơjao bơngai ayăt kơ ih lăm tơpang ti ih. Ăn kơ inh iŏk tơju sư 'bet hơtơ̆p sư tơ teh; ưh kơ kăl kơ 'bet pơlơ̆k mă 'bar dơ̆ng.

⁹Mă-lei Đawit khan kơ Abisai: 'Nĕ kơ pơlôch sư, kơnh ih đei tơdrong glăi, yua kơ sư bơngai mă đơ̆ng Kră Yang 'Bok Kei-Dei tuh ăn đak rơmă.

¹⁰Sư khan dơ̆ng: Đei Kră Yang mă arih ling-lang, inh pơkă hăm ih, tơpă Kră Yang gô ăn kơ sư lôch, dah trŏ kơ măng năr sư gô lôch, dah sư lôch kơ tơblah,

¹¹Mă-lei Kră Yang wei inh, ưh kơ ăn tơpang ti inh pơlôch bơngai mă đơ̆ng Kră Yang tuh ăn đak rơmă! Inh apinh ih iŏk tơpu hăm get đak đơ̆ng kơ̆l giơng sư hăm get đak sư, đơ̆ng noh ba weh.

¹²Na, Đawit iŏk tơju hăm get đak sư 'bơ̆t cheng kơ̆l sư, đơ̆ng noh bre sư weh, ưh kơ đe bu 'bôh dah băt păng kư̆m ưh kơ đe bu hơđơ̆r; yua kơ Kră Yang pơm ăn kơ lu sư tep blêk.

¹³Na, Đawit tŏk hlôi pah to, pơdơh 'bơ̆t kơpal kơ̆l kông, ataih tơpă đơ̆ng kơđông linh sơlam lu sư.

¹⁴Đawit sư krao ôr lu linh Sôl păng Apner, kon drŏ-nglo Nêr, na khan: Apner ih ưh kơ tơl nơ̆r hă? Apner tơl: Ih bu na mă pơ̆n krao ôr pơtao?

¹⁵Đawit tơl Apner: Ih minh 'nu bơngai nuih pran dah kiơ? Lăm lu bơngai Isơrael ưh kơ đei bu dang ih Na lơliơ ih ưh kơ wei gak pơtao, jơ̆ yŏng tơ'ngla ih? Đei bơngai năm pơlôch pơtao yŏng tơ'ngla ih.

¹⁶Ih pơm thoi noh ưh pă trŏ boih. Đei anăn Kră Yang mă arih ling-lang pơm kơdranh đĭ-đăng lu iĕm trŏ kơ lôch, yua kơ ưh kơ wei gak yŏng tơ'ngla ih, bơngai mă Kră Yang tuh ăn đak rơmă. Na dang ei ih lăng lăng, tơju pơtao păng get đak 'bơ̆t kơ̆l tơ yơ boih?

¹⁷Sôl kơnăl kơ 'bơ̆r Đawit, na jet khan: Ơ Đawit, kon inh, hăm trŏ kơ nơ̆r kon pơma noh? Đawit tơl khan: Ơ pơtao yŏng tơ'ngla inh, 'noh jơ̆ nơ̆r inh.

¹⁸Sư pơma dơ̆ng: Yua kơ kiơ yŏng tơ'ngla inh druh 'moi wă rôp đĭch đam ih thoi noh? Inh đei pơm tơdrong kiơ păng tơpang ti inh đei pơm boih tơdrong yoch kơnê̆ yă kiơ?

¹⁹Dang ei apinh inh mơ̆ng bĕ nơ̆r đĭch đam ih roi. Tơdah Kră Yang pơdrŭt ih pơrăm inh, hơpơi kơ Sư iŏk tơmam soi pơyơ̆r 'bâu phu; mă-lei dah đơ̆ng kon bơngai đĕch pơdrŭt Kră Yang gô hiap pơtê̆ lu sư; yua kơ năr 'nâu lu sư druh puh tơweh inh, ưh kơ ăn inh lăm teh đak mă Kră Yang ăn kơ lu kon pơlei pơla sư bơ̆jang sa păng lu sư khan: Năm, kơkuh kơ yang nai bĕ.

²⁰Ô! Hơpơi rŏ kơ pham inh 'nĕ ăn ro kơpal teh ataih đơ̆ng muh măt Kră Yang; yua kơ kiơ pơtao lu bơngai Isơrael năm chă wă rôp inh, thoi minh pơm siso, nhen thoi đe druh sem trăk-tra? Lăm kông.

²¹Sôl tơl: Inh đei tơdrong yoch tơpă Ơ Đawit, kon inh, wih brŏk bĕ! Inh ưh pă wă pơrăm kon dơ̆ng, yua kơ năr 'nâu, kon lăng gĭt kơ tơdrong arih inh. Tơpă, inh hlôi pơm boih thoi bơngai wơnh, pơm glăi tih dêh.

²²Đawit khan: 'Nâu tơju ih pơtao; wơh bĕ minh 'nu bơngai tơdăm năm tŏk pah âu na iŏk tơju ih.

²³Kră Yang gô apah ăn kơ rim 'nu, kiơ̆ thoi tơdrong 'lơ̆ng tơpăt đơ̆ng sư pơm. Năr 'nâu Sư pơjao ih lăm tơpang ti inh, mă-lei inh ưh kơ wă pơm kơ yŏng tơ'ngla inh mă đơ̆ng Kră Yang tuh ăn đak rơmă.

²⁴Năr 'nâu inh lăng gĭt kơ tơdrong arih pơtao thoi yơ, na apinh Kră Yang kư̆m gô lăng gĭt kơ tơdrong arih kon thoi ei mơ̆n. Păng dŏng pơklaih kon gơh lĕch hlôi đơ̆ng tơdrong hli pơmat-tat.

²⁵Sôl tơl Đawit: Ơ Đawit, kon inh, hơpơi kơ Kră Yang ăn kơ kon đei pŭn hiôk! Tơpă, kon gô bơ̆jang tơdrong tih păng gơh kĕ jei hloh. Na Đawit kư̆ kơ năm trong sư kơdih, gah Sôl wih brŏk tơ anih sư.