Read bahnar I Sam 27 Bible Online

I Sam 27 - bahnar bible

I Sam 27

¹Đawit tơchĕng lăm đon khan: Tơpă lăm minh năr ayơ kơnh, inh gô lôch kơ tơpang ti Sôl. Ưh kơ đei kiơ 'lơ̆ng hloh kơ inh năm kơdâu ôn lăm dêh Philistin, na Sôl huay pă chă inh lăm teh đak lu bơngai Isơrael dơ̆ng. Thoi noh na, inh gơh klĕch lĕch hlôi đơ̆ng tơpang ti sư.

²Thoi noh, Đawit iung năm hăm tơdrong hrĕng 'nu bơngai kiơ̆ sư, tŏk hlôi năm truh tơ Akis, sư pơtao Gat kon drŏ-nglo Maok.

³Đawit păng lu bơngai kiơ̆ sư oei hăm Akis tơ Gat, rim 'nu đei hnam dơnŏ lu sư kơdih. Đawit đei 'bar 'nu akăn kiơ̆, Ahinôam đơ̆ng Jêsreel păng Abigail, mă đêl akăn Nabal oei tơ Karmel.

⁴Sôl băt kơ Đawit ôn tơ Gat, na ưh pă druh chă 'moi wă rôp sư dơ̆ng.

⁵Đawit pơma dơnuh hăm Akis: Tơdah ih mơnat kơ inh, apinh ih asong ăn kơ inh oei tơ minh pơlei ayơ 'nguaih kơ lu pơlei tih 'lơ̆ng, lê̆ inh oei tơ noh. Inh đĭch đam ih liơ mă gơh oei lăm pơlei tih hơdai hăm ih?

⁶Lăm năr noh Akis asong ăn kơ Đawit oei tơ pơlei Siklak gah pơtao Juđa truh tơ dang ei.

⁷Đawit oei lăm teh đak bơngai Philistin lăp minh sơnăm puăn khei.

⁸Đawit păng lu bơngai kiơ̆ sư năm blah iŏk teh bơngai Gêsurit, kon pơlei bơngai Girsi păng kon pơlei bơngai Amalek, lu bơngai mă oei đơ̆ng sơ̆ rok dêh Sur dĭng truh tơ dêh Êyiptơ.

⁹Rim wơ̆t Đawit blah iŏk tơring ayơ, sư ưh kơ đei lê̆ minh 'nu bơngai drŏ-nglo dah bơngai drŏ-kăn mă oei arih. Tơgar iŏk đĭ triu bơbe rơmo, aseh iĕ, lăk-đa păng lu ao tai; na, hơlơ̆k wih brŏk tơ'bơ̆p Akis.

¹⁰Rim wơ̆t Akis jet: Năr 'nâu, ih năm blah tơgar iŏk tơring ayơ? Đawit tơl: Lăm tơring gah gơal teh đak Juđa, gah gơal teh đak kon pơlei bơngai Jêrahmêel păng gah gơal teh đak kon pơlei bơngai Kênit.

¹¹Đawit ưh kơ đei lê̆ minh 'nu bơngai drŏ-nglo dah bơngai drŏ-kăn mă oei arih wă chông ba brŏk tơ Gat; hli kơ lu sư gô roi kơ dôm tơdrong Đawit hăm lu bơngai kiơ̆ sư pơm. Kơplah Đawit oei lăm dêh kon pơlei bơngai Philistin sư juăt kơ pơm thoi noh ling-lang.

¹²Akis lui kơ Đawit, na khan: Sư pơm ăn kơ lu bơngai Isơrael lăng sư krưp dêh, jơ̆ kon pơlei pơla sư, na sĭt tơpă sư gô pơm đĭch đam inh ling-lang ling-lang.