Read bahnar I Sam 29 Bible Online

I Sam 29 - bahnar bible

I Sam 29

¹Kon pơlei bơngai Philistin akŭm đĭ-đăng lu linh tơ Aphek; gah kon pơlei bơngai Isơrael pơm kơđông 'bơ̆t jê̆ glung Jesreel.

²Lu kră pơgơ̆r kon pơlei bơngai Philistin păng lu linh năm adrol minh-hrĕng 'nu minh-rơbâu 'nu gah Đawit păng lu bơngai kiơ̆ sư năm đơ̆ng rŏng hơdai hăm Akis.

³Na, lu bơngai yŏng pơgơ̆r kon pơlei pơla bơngai Philistin jet: Lu bơngai Hêbrơ pơm kiơ tơ âu? Akis tơl khan; 'nâu Đawit, đĭch đam Sôl, pơtao Isơrael, oei hăm inh wă đei loi kơ minh sơnăm kơ âu. Đơ̆ng năr sư năm oei hơdai păng lu nhôn dĭng truh dang ei, inh ưh kơ đei 'bôh sư pơm glăi minh tơdrong kiơ.

⁴Lu yŏng pơgơ̆r bơngai Philistin blĕk dêh, khan kơ Akis: Puh tơbrŏk lê̆ bơngai 'nâu tơ anih mă ih đei ăn kơ lu sư boih, 'nĕ ăn sư năm tơblah hơdai hăm lu bơ̆n, lăm năr tơblah kơnh hli kơ sư đei jơhngơ̆m ayăt hăm blah plơ̆ bơ̆n dơ̆ng; sư pơm wă pơhiôk kơ yŏng tơ'ngla so sư? Pơjao kơ̆l rim 'nu linh bơ̆n.

⁵Ih athei băt Đawit 'nâu boih mă lu adruh hơri suang khan: Sôl pơlôch rơbâu rơbâu 'nu đĕch, gah Đawit pơlôch mơjĭt-rơbâu rơbâu.

⁶Akis khŏm krao Đawit na khan: Đei Kră Yang mă arih ling-lang na sư inh pơkă khan, ih jơ̆ minh 'nu bơngai tơpăt, inh wă kơ sư mơ̆t lăm khŭl linh inh, yua kơ đơ̆ng năr ih oei hơdai inh dĭng truh tơ năr 'nâu, inh ưh kơ đei 'bôh ih pơm minh tơdrong kiơ kơnê̆. Mă-lei lu yŏng pơgơ̆r ưh kơ lăp đon.

⁷Lei ih brŏk mă 'lơ̆ng. 'Nĕ kơ pơm kơ jơhngơ̆m lu yŏng pơgơ̆r bơngai Philistin sơ'ngon.

⁸Đawit pơma khan kơ Akis: Inh đei pơm tơdrong kiơ, na đơ̆ng năr inh oei hăm ih truh tơ năr 'nâu pơtao hăm đei 'bôh tơdrong kiơ đĭch đam ih âu mă pơm glăi, mă inh ưh kơ gơh năm tơblah bơngai ayăt kơ ih yŏng tơ'ngla inh.

⁹Akis tơl nơ̆r Đawit: Inh băt dôm tơdrong noh. Inh lăp đon kơ ih nhen thoi minh 'nu linh jang 'lơ̆ng đơ̆ng Kră Yang 'Bok Kei-Dei; mă-lei lu yŏng pơgơ̆r bơngai Philistin pơkă khan: Sư ưh kơ gơh năm kiơ tơblah hăm lu nhôn.

¹⁰Ih păng lu đĭch đam yŏng tơ'ngla ih lu bơngai mă đei năm kiơ̆ ih, athei iung đơ̆ng hrôih păng lăp 'năr hơdah năm hloi.

¹¹Na Đawit hăm lu bơngai kiơ̆ sư iung đơ̆ng hrôih, lăp 'năr wă hơdah pơgê dơ̆ng rŏng wơ̆t brŏk tơ dêh kon pơlei bơngai Philistin; gah kon pơlei Philistin tŏk năm tơ Jesreel.