Read bahnar I Sam 9 Bible Online

I Sam 9 - bahnar bible

I Sam 9

¹Kơplah ei, đei minh 'nu adrĕch Bênjamin, anăn sư Kis, kon drŏ-nglo Abiel, sâu tơm Sêrôr, sâu Bêkơrat, sâu ach Aphia, adrĕch bơngai Bênjamin.

²Kis đei kon drŏ-nglo, anăn sư Sôl, sư oei tơdăm kư̆m 'lơ̆ng hơbŏ. Lăm bơngai Isơrael ưh kơ đei bu 'lơ̆ng hơbŏ thoi sư; sư bơngai tih kơjung hloh kơ đe.

³Kis đei lu aseh iĕ akăn wơ̆l jrok. Kis khan kơ Sôl kon sư: Athei chông ba minh 'nu đĭch đam kiơ̆, năm chă lu aseh iĕ akăn jrok.

⁴Sư năm chă jơ̆p kơ kông groi Êphraim, jơ̆p kơ tơring Salisa ră, mă-lei ưh kơ 'bôh; na sư năm dơ̆ng jơ̆p kơ tơring Salim, jơ̆p kơ dêh Bênjamin, mă-lei kư̆m oei ưh kơ 'bôh 'mơ̆i.

⁵Sư năm truh tơ tơring Sup, Sôl khan kơ đam mă kiơ̆ sư ei: Thôi bĕ ba wih brŏk đĕch, hli kơ 'bă inh tơtăm kơ ba hloh kơ sư tơtăm kơ aseh iĕ noh.

⁶Bơngai đam ei drơ̆ng Sôl: Mơ̆ng bĕ, lăm pơlei âu đei minh 'nu bơngai Kră Yang 'Bok Kei-Dei yua, bơngai mă đe pơyom; dôm nơ̆r sư pơma adrol trŏ ngăl ưh kơ layơ glăi. Thoi noh, bĕ ba năm tơ ei, rŏ lăng sư gô tơ'bôh kơ ba trong chă aseh jrok noh tơ yơ.

⁷Sôl khan kơ đam sư: Mă-lei ba iŏk yă kiơ wă pơyơ̆r ăn kơ sư? Lăm kơdŭng ba tơmam sa ba đĭ bơih, ba ưh pă đei tơmam kiơ wă pơyơ̆r ăn kơ bơngai mă Kră Yang 'Bok Kei-Dei yua noh. Ba ưh pă đei yă kiơ?

⁸Đam sư drơ̆ng dơ̆ng: Kơdih inh oei đei pă pêng gram jên hu, inh gô pơyơ̆r jên hu noh ăn kơ bơngai mă Kră Yang 'Bok Kei-Dei yua, na sư gô tơ'bôh ăn kơ ba trong.

⁹Sơ̆ bơngai Isơrael, dah bơngai bu wă krao chă Kră Yang 'Bok Kei-Dei, ngăl khan: Bĕ bơ̆n năm tơ'bơ̆p 'bok băt lê̆ adrol; bơngai mă bơ̆n krao 'bok khan lê̆ adrol.

¹⁰Sôl khan kơ đam sư: Trŏ boih bĕ ba năm. Bre sư năm truh tơ pơlei bơngai mă Kră Yang 'Bok Kei-Dei yua ei oei.

¹¹Kơplah măr sư oei rok trong suan tŏk tơ pơlei, na măr sư tơ'bơ̆p đe hơdruh jur năm sŏ đak, na jet khan: 'Bok mă băt lê̆ adrol hăm tơ âu ưh?

¹²Đe hơdruh ei tơl: Đei to, sư tơ anăp măr iĕm. Mă-lei iĕm yak mă tĕnh hŏ, sư 'nao mơ̆t tơ pơlei, yua kơ năr 'nâu kon pơlei pơla wă pơyơ̆r tơmam soi tơ kơpal groi.

¹³Mưh mơ̆t lăm pơlei, măr iĕm tơ'bơ̆p sư ngei adrol kơ sư năm tơ groi wă et sa. Kon pơlei ưh kơ et sa ôh adrol kơ sư truh, yua kơ sư gô sơkat ăn pŭn hiôk kơ tơmam soi; đang bơih, na đe năm akŭm ei gơh et sa. Năm bĕ măr iĕm, măr iĕm gô tơ'bơ̆p sư.

¹⁴Bre sư yak năm 'bơ̆t wă mơ̆t tơ pơlei, na tơ'bơ̆p Samuel wă lĕch năm tơ kơpal kông groi et sa.

¹⁵Na mă adrol kơ Sôl wă truh tơ noh, Kră Yang khan lê̆ bơih kơ Samuel:

¹⁶Năr dơning, kư̆m lăm jơ 'nâu mơ̆n, inh gô wơh minh 'nu bơngai đơ̆ng lăm dêh Bênjamin năm tơ'bơ̆p ih, ih gô tuh đak pơgang ăn kơ sư pơm pơtao đe Isơrael. Sư gô dŏng pơklaih kon pơlei Inh đơ̆ng ti đe Philistin; yua kơ Inh 'blŏk mơnat kơ kon pơlei Inh păng nơ̆r lu sư ôr krao kơtơ̆ng truh tơ Inh.

¹⁷Kơplah Samuel 'bôh Sôl, Kră Yang khan kơ sư: 'Nâu, bơngai mă Inh đei khan lê̆ kơ ih adrol 'noh bơih bơngai mă wă pơgơ̆r kon pơlei Inh.

¹⁸Sôl năm jê̆ Samuel 'bơ̆t 'măng jang pơlei păng khan: Apinh ih tơ'bôh ăn kơ inh bĕ hnam 'bok mă băt lê̆ adrol tơ yơ.

¹⁹Samuel tơl: Inh bơih lah 'bok noh. Năm adrol kơ inh bĕ tơ groi to. Năr âu măr iĕm gô sŏng sa hơdai inh; na dơning inh gô roi ăn dôm tơdrong lăm jơhngơ̆m ih, đơ̆ng noh na ih wih.

²⁰Gah lu aseh iĕ akăn mă ih chă ưh kơ 'bôh đĭ pêng năr kơ 'nâu noh, ih 'nĕ pă hiơ̆k yua kơ đei chă 'bôh bơih. Lu bơngai Isơrael hơpơi chă noh bu? Hăm trŏ kơ ih păng đĭ kơ hnam dơnŏ 'bă ih ưh?

²¹Sôl drơ̆ng: Inh jĭ minh 'nu adrĕch bơngai Bênjamin minh adrĕch iĕ hloh kơ đĭ-đăng lăm Isơrael; hnam dơnŏ inh jĭ hnam dơnŏ iĕ hloh lăm hnam dơnŏ adrĕch Bênjamin. Liơ ih pơma hăm inh khan thoi ei lĕ?

²²Samuel chông Sôl păng đam sư mơ̆t lăm anih să, ba bre sư oei 'bơ̆t anih anăp hloh kơ pêng-jĭt 'nu bơngai năm akŭm et sa ei.

²³Samuel khan kơ bơngai pai gŏ: Ih athei hiŏng 'nhĕm sa mă inh ăn kơ ih păng pơkă khan: Athei 'măn lê̆ pha noh.

²⁴'Bok pai gŏ ei iŏk 'nhĕm sĕch blu na dan 'bơ̆t anăp Sôl. Samuel khan: 'Nhĕm mă dan 'bơ̆t anăp ih sa bĕ; 'nâu mă 'nhĕm inh athei 'măn lê̆ pha wă ăn kơ ih sa năr 'nâu hơdai hăm lu bơngai mă inh krao wơ̆n. Lăm năr noh, Sôl sŏng sa hơdai hăm Samuel.

²⁵Na, lu sư brŏk jur đơ̆ng anih akŭm ei mơ̆t tơ pơlei; na Samuel pơma dơnuh hăm Sôl tơ anih tơ kơpal bơbŭng hnam dơnă, Sôl tep hloi tơ noh.

²⁶Truh năr đơ̆ng rŏng, kơplah năr wă lĕch, Samuel krao Sôl tơ anih tơ kơpal na khan kơ sư thoi âu: Iung bĕ inh gô ba ih yak năm. Sôl gruih iung, na Samuel păng Sôl bre sư yak năm hơdai.

²⁷Kơpah yak năm truh tơ hlôi kơ pơlei bơih, Samuel khan kơ Sôl: Ih athei đam ih rai năm adrol kơ ba. Đam sư ei rai năm adrol sư khan dơ̆ng: Dang ei dơ̆ng 'mơ̆i wă kơ inh roi kơ ih kơtơ̆ng nơ̆r 'Bok Kei-Dei khan kơ inh.