Read bariba Torubu 49 Bible Online

Torubu 49 - bariba bible

Torubu 49

¹Yen biru Yɑkɔbu u win bibu sokɑ u nɛɛ, i mɛnnɑmɑ kpɑ n bɛɛ sɔ̃ ye n koo bɛɛ deemɑ ɑmɛn biru.

²I nɑ i nɔ nɛn bibu, i mɑn swɑɑ dɑkio.

³Rubɛni, wunɛ nɛn bii yerumɑ, ɑ sɑ̃ɑwɑ nɛn dɑm. Wunɑ nɑ mɑrɑ nɛn ɑluwɑɑsiru sɔɔ. Wunɑ ɑ yiiko kɑ dɑm bo nɛn bibu sɔɔ.

⁴Adɑmɑ ɑ sɑ̃ɑwɑ nɡe nim torɑ, ɑ ǹ ɡɑyɑ mɔ. Yen sɔ̃nɑ ɑ ǹ kɑɑ ko wunɛn wɔnɔbun wiruɡii. Domi ɑ kɑ nɛn kurɔ Bilihɑ kpunɑ, ɑ nɛn kpin yeru disi doke.

⁵Wunɛ Simɛɔ kɑ Lefi, dɑɑ tiɑ i mɔ. I rɑ bɛɛn tɑkobi suewɑ kɑ ɡbɑnɑ i kɑ kɔ̃sɑ ko.

⁶Bɛɛn mɔrun sɔ̃ i tɔmbu ɡo. Bɛɛn nuku kɔ̃surun sɔ̃ i kɛtɛ kinɛnun nɑɑ sĩinu bɔɔrɑ. Yen sɔ̃, nɛn ɡɔ̃ru ɡu ku rɑɑ du bɛɛn kɑnkɑm wesiɑnɔ sɔɔ. Nɛn bwɛ̃rɑ yu ku rɑɑ kɑ bɛɛ mɛnnɛ.

⁷Bɛɛn mɔru yu ko bɔ̃rurɑ yèn sɔ̃ yɑ sɑ̃ɑ ɡbɑnɑɡiɑ. Mɛyɑ mɑɑ kɑ bɛɛn nuku ɡbisibu yèn sɔ̃ bu ǹ wɔnwɔndu mɔ. I ko n yɑrinɛwɑ bɛɛn tem kpuro sɔɔ.

⁸Wunɛ mɑɑ Yudɑ, wunɛn mɑɑbu kɑ wɔnɔbu bɑ koo nun siɑrɑ. Kɑɑ wunɛn yibɛrɛbɑn wĩinu tɑɑre. Wunɛn tundo bisibu bɑ koo nun yiirɑwɑ.

⁹Yudɑ nɛn bii, ɑ sɑ̃ɑwɑ nɡe ɡbee sunɔ kpɛmbu, ɡe ɡɑ yɑɑ ɡoomɑ ɡɑ wee, kpɑ ɡu kpɑm wurɑ ɡu yɑɑ sɑ̃kiriɑ. A sɛ̃ nɡe ɡbee sunɔ mɛro. Wɑrɑ koo kɑ̃ku u nun bɛsu.

¹⁰Bɑndɑ kun doonɔ wunɛn bweserun di. Sinɑ bɔrɑ kun kisirɑmɔ wunɛn nɔmun di, sere Silo ù n tunumɑ, kpɑ bwesenu kpuro nu nùn mɛm nɔɔwɑ.

¹¹Wunɛn resɛm yɑ koo kuurɑ sere ɑ wunɛn kɛtɛku kɑ ɡen buu sɔri mi. Yen mɑrum mu koo nun tɑm wɛ̃ mu n kpɑ̃ sere ɑ kɑ mu wunɛn yɑ̃nu teɑ nɡe nim.

¹²Kpɑ wunɛn nɔni yi n sɔ̃ri tɑm mɛn sɔ̃. Kpɑ wunɛn donnu nu n buriri bom bekum sɔ̃.

¹³Wunɛ mɑɑ Sɑbuloni, kɑɑ n wɑ̃ɑwɑ nim wɔ̃kun ɡoorɔ mi ɡoo nimkusu rɑ yɔ̃re. Wunɛn tem mu ko n tɛriewɑ sere Sidoni ɡiɑ.

¹⁴Isɑkɑri, wunɛ ɑ sɑ̃ɑwɑ nɡe kɛtɛku dɑmɡuu. A rɑ kɑ̃ ɑ n wɑ̃ɑ tem nɔɔ burɑ yenun bɑɑbɑ sɔɔ.

¹⁵A wɑ mɑ mi ɑ wɛ̃re n wɑ̃. Tem mɛ, mu mɑɑ ɡeɑ sɑ̃ɑ. Yen sɔ̃nɑ ɑ wurɑ ɑ sɔmunu suɑ kpɑ ɑ yoo sɔmburu ko.

¹⁶Wunɛ mɑɑ Dɑnu, wunɑ kɑɑ n dɑ wunɛn bweserun ɡɑri wunɑnɛ Isirelibɑn suunu sɔɔ.

¹⁷Kɑɑ n sɑ̃ɑwɑ nɡe surɔkɔru swɑɑ sɔɔ, te tɑ dumin nɑɑ sĩinu dwɛ̃ɛmɔ, mɑɑsɔbu bu kɑ fukurɑ yin wɔllun di.

¹⁸Yinni Gusunɔ, nɑ wunɛn fɑɑbɑ yĩiyɔ.

¹⁹Wunɛ mɑɑ Gɑdi, wɛrɔ dɑbirɑ tɑ koo nun wɔri, ɑdɑmɑ kɑɑ bu kɑmiɑ ɑ ɡirɑ.

²⁰Asɛɛ, wunɛ mɑɑ, wunɛn tem mu ko n dĩɑ ɡeenu mɔ. Sinɑ dimɑ kɑɑ n dɑ di.

²¹Wunɛ mɑɑ Nɛfitɑli, ɑ sɑ̃ɑwɑ nɡe ɡinɑ ye yɑ tii mɔru kĩ, yɑ mɑɑ bii burɑnu mɑrumɔ.

²²Wunɛ Yosɛfu, ɑ sɑ̃ɑwɑ nɡe kɛtɛku ɡbeeku ɡe ɡɑ wɑ̃ɑ bwiɑn bɔkuɔ. A sɑ̃ɑwɑ nɡe kɛtɛku buu ɡe ɡɑ wɑ̃ɑ ɡuurun ɡɑ̃ɑrɔ.

²³Yibɛrɛbɑ bɑ nun nɔɔ kuurɑ, bɑ nun wɔri kɑ mɔru, bɑ nun sɛ̃ɛnu twee.

²⁴Adɑmɑ wunɛn tɛndɑ kun wurure yèn sɔ̃ nɛn Yinni, Gusunɔ Dɑm kpuroɡii, u wunɛn nɔmɑ dɑm kɑ̃ɑ. Wi, wi u Isirelibɑ kpɑre, u bu ɡɑnuɑ nɡe kpee bɑkɑru,

²⁵wiyɑ u koo nun somi u nun domɑru kuɑ, kpɑ ɡurɑ yu nun nɛɛyɑ, kpɑ nim mu n yibɑ bwiiyɔ yi ɑ mɔ wunɛn tem sɔɔ. U koo mɑɑ wunɛn kurɔbu ko bii mɛrobu, kpɑ wunɛn sɑbenu nu mɑ.

²⁶Wunɛn domɑru tɑ koo wunɛn bɑɑbɑbɑɡiru kerɑ. Tɑ kpɑ̃ tɑ ɡuunu kpuro kere. Domɑ te, tɑ ko n nun wɑ̃ɑsiwɑ, Yosɛfu, wunɛ wi ɑ sɑ̃ɑ nɛnɛm wunɛn mɑɑbu sɔɔ.

²⁷Wunɛ mɑɑ Bɛnyɑmɛɛ, ɑ sɑ̃ɑwɑ nɡe dɛmɑku ɡe ɡɑ rɑ n yɑɑ ɡoomɔ bururu kɑ yokɑ ɡɑ n temmɔ.

²⁸Nɡe mɛyɑ Isireli u kɑ win bibu domɑru kuɑ nɛnnɛnkɑ. Ye u mɑɑ bu sɔ̃ɔwɑ, yerɑ mi. Bii beyɑ bɑ kuɑ win bwese kɛri wɔkurɑ yiru ye.

²⁹Yen biru Yɑkɔbu u win bibu yiire u nɛɛ, nɑ dɔɔ n nɛn tɔmbu deemɑ ɡɔriɔ. I mɑn sikuo nɛn bɑɑbɑbɑn sikirɔ, kpee wɔru sɔɔ ɡe ɡɑ wɑ̃ɑ Eforoni Hɛtin ɡberɔ.

³⁰Kpee wɔru ɡerɑ ɡɑ wɑ̃ɑ Mɑkpelɑn ɡberɔ, Mɑnden deedeeru Kɑnɑnin temɔ. Gbee terɑ Aburɑhɑmu u dwɑ Eforoni Hɛtin mi, tu kɑ ko win tɔmbun siku yeru.

³¹Miyɑ bɑ Aburɑhɑmu sikuɑ kɑ win kurɔ Sɑɑrɑɑ, kɑ mɑɑ Isɑki kɑ win kurɔ Rebekɑ. Miyɑ nɑ mɑɑ Leɑ sikuɑ.

³²Bɑ ɡbee te kɑ ten kpee wɔru ɡe dwɑwɑ Hɛtibɑn mi.

³³Sɑnɑm mɛ Yɑkɔbu u win bibu ɡɑri yi sɔ̃ɔwɑ u kpɑ, yerɑ u win nɑɑsu suɑ u sɔndi kpin yeru wɔllɔ mɑ u ɡu u dɑ u win bɑɑbɑbɑ deemɑ.