Read bariba Sɑmuɛli II 22 Bible Online

Sɑmuɛli II 22 - bariba bible

Sɑmuɛli II 22

¹Womu ɡeniwɑ Dɑfidi u Yinni Gusunɔ kuɑ sɑnɑm mɛ u nùn wɔrɑ sɑɑ win yibɛrɛbɑn nɔmɑn di, n mɑm nɛɛre Sɔɔlu.

²U nɛɛ, Yinni Gusunɔ, wunɑ ɑ sɑ̃ɑ nɛn dɑm. Wunɑ nɑ kĩ.

³A sɑ̃ɑwɑ nɡe kpee bɑɑ yè sɔɔ kon kuke. A sɑ̃ɑwɑ nɛn kuku yee nɑɑnɛɡiru. Wunɑ ɑ sɑ̃ɑ nɛn Yinni wi u mɑn yɑkiɑ. Wunɑ ɑ sɑ̃ɑ nɛn tɛrɛru. Wunɛn dɑmɑ mu mɑn wɔrɑ. Wunɑ ɑ sɑ̃ɑ nɛn kɑri.

⁴I Yinni Gusunɔ siɑro. Nɑ̀ n nùn nɔɔɡiru sue nɑ fɑɑbɑ kɑnɑ, u rɑ mɑn wɔrewɑ nɛn yibɛrɛbɑn nɔmɑn di.

⁵Gɔɔ rɑɑ mɑn bɔkuɑ, u kɑ mɑn doonɔ nɡe nim tori bɑkɑ.

⁶Gɔribun wɑ̃ɑ yerɑ mɑn tɛ̃kuɑ. Gɔɔ mɑn tɑɑ bɛrie.

⁷Mɑ nɑ nɔɔɡiru suɑ nɛn nuku sɑnkirɑru sɔɔ, nɑ Yinni Gusunɔ sokɑ. Mɑ u nɛn nɔɔ nuɑ sɑɑ win wɑ̃ɑ yerun di. Mɛyɑ mɑɑ nɛn weeweenu wɔri win swɑɑ sɔɔ.

⁸Tem mu yĩirɑ, mɑ ɡuunu diirɑ, yèn sɔ̃ Yinni Gusunɔ u mɔru bɛsirɑ.

⁹Mɑ win mɔru seewɑ nɡe wiisu, mɑ yɑ yɑburɑ nɡe dɔ̃ɔ yɑrɑ, mɑ yɑ yɑrimɔ win nɔɔn di nɡe dɔ̃ɔ buri.

¹⁰U derɑ wɔllɑ kɑ tem dɛbɛ dɛbɛ kuɑ. Mɑ u sɑrɑmɑ u ɡuru wii bɑkɑru tɑɑkumɔ.

¹¹U wɔllun kɔ̃so sɔni nɡe dumɑ. Mɑ u bɛllimɔ woo sɔɔ.

¹²U kukuɑ yɑm wɔ̃kuru sɔɔ, mɑ ɡuru wii sinumɡinu nùn wukiri.

¹³Win wuswɑɑɔ yɑm bururɑm mu wɑ̃ɑ. Min diyɑ ɡurɑ nɛmɔ kɑ ɡuru kpenu kɑ dɔ̃ɔ buri.

¹⁴Win nɔɔ ɡɑ nɔɔrɑ wɔllun di nɡe ɡuru ɡbɑ̃sukubu. Mɑ ɡuru kpenu nɛmɔ kɑ dɔ̃ɔ buri.

¹⁵U nɛn yibɛrɛbɑ yɑrinɑsiɑ kɑ ɡuru kpenu ni nu sɑ̃ɑ nɡe sɛ̃ɛnu. U bu ɡirɑ bɑɑmɑ kɑ ɡuru mɑɑkinu.

¹⁶U wɛ̃ru wurɑ, yibɛrɛbɑ bɑ nɑndɑ. Mɑ ɡuru woo bɔkɔ ɡɑ dɑɑnu ɡberɑsiɑ. Mɑ duniɑn kpɛɛkpɛɛku ɡɑ sɔ̃ɔsirɑ.

¹⁷Mɑ u win nɔmu dɛmiɑmɑ wɔllun di u mɑn nɛnuɑ u yɑrɑ nim bwee bɑkɑrun di.

¹⁸U mɑn wɔrɑ yibɛrɛbɑn nɔmɑn di. Yibɛrɛ be, bɑ mɑn dɑm kere. Yibɛrɛ be, bɑ mɑn tusɑ.

¹⁹Yibɛrɛ be, bɑ mɑn wɔriwɑ nɔni swɑ̃ɑrun sɑɑ sɔɔ. Adɑmɑ Yinni Gusunɔ u kuɑ nɛn tɑ̃si yeru.

²⁰U mɑn wɔrɑ ben nɔmɑn di, nɑ n kɑ tii mɔ, domi u mɑn kĩ.

²¹U mɑn domɑru kuɑ yèn sɔ̃ nɑ dɛɛre. U mɑn domɑru kuɑ yèn sɔ̃ nɑ ɡem swĩi.

²²Nɑ win woodɑ mɛm nɔɔwɑ. Nɑ ǹ nùn seesi.

²³Nɑ win woodɑ kpuro swĩi. Nɑ ǹ win ɡere yinɛ.

²⁴Nɑ nɛn tii nɛnuɑ, kpɑ n ku rɑ kɑ durum ko. Nɑ sɑ̃ɑwɑ dee dee win wuswɑɑɔ.

²⁵Yen sɔ̃nɑ u mɑn kɔsiɑ nɡe mɛ nɛn dɑɑ ɡeɑ nɛ. U mɑn kɔsiɑ nɡe mɛ nɛn ɡɔ̃ru ɡɑ dɛɛrɑm nɛ.

²⁶Sɑ̀ n sɑ̃ɑ nɑɑnɛɡibu, kɑɑ n sun sɑ̃ɑwɛwɑ nɑɑnɛɡii. Sɑ̀ n sɑ̃ɑ ɡemɡibu, kɑɑ n sun sɑ̃ɑwɛwɑ ɡemɡii.

²⁷Sɑ̀ n sɑ̃ɑ dɛɛrobu, kɑɑ n sun sɑ̃ɑwɛwɑ dɛɛro. Sɑ̀ n mɑɑ sɑ̃ɑ keetɑɡibu, kɑɑ n sun sɑ̃ɑwɛwɑ keetɑɡii.

²⁸Yinni Gusunɔ, wunɛn tiiwɑ ɑ rɑ tɔn be bɑ tii kɑwe fɑɑbɑ ko, kpɑ ɑ be bɑ tii sue kɑwɑ.

²⁹Yinni Gusunɔ, ɑ sɑ̃ɑwɑ nɛn fitilɑ. A rɑ mɑn yɑm bururɑsie.

³⁰A rɑ mɑn dɑm kɛ̃ n kɑ kpĩ n yibɛrɛ be bɑ tɑbu yɑ̃nu mɔ wɔri, kpɑ n yɔ̃ n ben ɡbɑ̃rɑru sure.

³¹Ye Yinni Gusunɔ u mɔ̀, yɑ rɑ n dɛndewɑ. Bwisi ɡeeyɑ u rɑ tɔnu kɛ̃. U sɑ̃ɑwɑ be bɑ nùn nɑɑnɛ sɑ̃ɑn tɛrɛru.

³²Gusunɔ turowɑ u wɑ̃ɑ. Wi turowɑ u sɑ̃ɑ bɛsɛn Yinni. Wi turowɑ u koo sun kɔ̃su.

³³Wiyɑ u sɑ̃ɑ nɛn kuku yee dɑmɡiru. Wiyɑ u rɑ mɑn swɑɑ ɡeɑ sure,

³⁴kpɑ u de nɛn nɑɑsu su n sɑ̃u nɡe nɛmu, nɑ n kɑ yɔ̃ dim dim ɡuuru wɔllɔ.

³⁵Wiyɑ u rɑ mɑn tɑbu sɔ̃ɔsi. Wiyɑ u rɑ mɑn dɑm kɛ̃, n kɑ tɛndu ɡɑwɑ te tɑ bɔ.

³⁶Yinni Gusunɔ, wunɑ ɑ rɑ mɑn fɑɑbɑ ko nɡe tɛrɛru. Wunɑ ɑ rɑ mɑn bere kɑ wunɛn dɑm bɑkɑm. Wunɛn durom sɑɑbuwɑ nɑ kɑ kuɑ dɑmɡii.

³⁷Nɑ̀ n dukɑ mɔ̀, ɑ rɑ de nɑ n sɑ̃u. Nɑ̀ n dukɑ mɔ̀, nɑ ku rɑ mɑɑ sokure.

³⁸Nɑ̀ n nɛn yibɛrɛbɑ nɑɑ ɡire, wunɑ ɑ rɑ de n bu nɑɑmwɛ. Wunɑ ɑ rɑ de nɑ kun ɡɔsirɑmɛ, mɑ n kun mɔ nɑ bu kpeerɑsiɑ.

³⁹Nɑ rɑ bu suririwɑ temɔ n kɔsuku kpɑ bu kpɑnɑ bu se.

⁴⁰Yinni, wunɑ ɑ rɑ mɑn dɑm kɛ̃ n kɑ tɑbu ko. Wunɑ ɑ rɑ mɑn nɑsɑrɑ wɛ̃ nɛn yibɛrɛbɑn wɔllɔ.

⁴¹Wunɑ ɑ rɑ de nɛn yibɛrɛbɑ bu mɑn biru kisi. Wunɑ ɑ rɑ de n be bɑ mɑn tusɑ kpeerɑsiɑ.

⁴²Nɑ rɑ bu munkuwɑ kpɑ bu ko nɡe tuɑ. Nɑ rɑ bu tɑɑkuwɑ kpɑ bu ko nɡe pɔtɔkɔ. Yinni Gusunɔ, bɑ̀ n nɔɔɡiru suɑ bɑ fɑɑbɑ kɑnɑ, ɑ ku bu fɑɑbɑ ko. Bɑ̀ n somiru kɑnɑ, ɑ ku bu wisi.

⁴³

⁴⁴Yinni Gusunɔ, wunɑ ɑ mɑn wɔrɑ be bɑ mɑn seesin nɔmɑn di. Wunɑ ɑ mɑn kuɑ bwese tukunun wiruɡii. Wunɑ ɑ derɑ bɑ mɑn yoru diiyɑmmɛ.

⁴⁵Bɑ̀ n yɑnde nɛn ɡɑri nuɑ, bɑ rɑ n mɑn mɛm nɔɔwɑmmɛwɑ. Bɑ̀ n mɑn wɑ, bɑ rɑ n mɑn sɑ̃ɑmɔwɑ. Bɑ̀ n mɑn wɑ, bɑ rɑ nɑndewɑ.

⁴⁶Bɑ̀ n mɑn wɑ, bɑ rɑ yɑrimɛwɑ ben kuku yerun di bɑ n diirumɔ.

⁴⁷Yinni Gusunɔ u wɑ̃ɑ. I nùn siɑro. Wiyɑ u sɑ̃ɑ nɡe kperu mi nɑ rɑ kuke. I nùn bɛɛrɛ wɛ̃ɛyɔ. Wiyɑ u mɑn fɑɑbɑ kuɑ.

⁴⁸Wiyɑ u rɑ mɑn mɔru kɔsie nɛn yibɛrɛbɑn mi. Wiyɑ u rɑ de bwesenu nu mɑn yiirɑ.

⁴⁹Wiyɑ u rɑ de n kisirɑ yibɛrɛbɑn nɔmɑn di. Yinni, ɑ mɑn wɔlle suɑ ben wuswɑɑɔ. Wunɑ ɑ mɑn fɑɑbɑ kuɑ tɔn kɔ̃sobun nɔmɑn di.

⁵⁰Yen sɔ̃nɑ kon womusu ko kɑ wunɛn yĩsiru. Wunɑ kon siɑrɑ bwesenun suunu sɔɔ.

⁵¹Yinni Gusunɔ, ɑ mɑn ɡɔsɑ ɑ kuɑ sunɔ. Wunɑ ɑ mɑn nɑsɑrɑ bɑkɑ wɛ̃. Nɑ yɛ̃ mɑ kɑɑ n mɑn durom sɔ̃ɔsimɔ, nɛ kɑ nɛn bweseru sere kɑ bɑɑdommɑɔ.