Read bariba Sinɑmbu II 22 Bible Online

Sinɑmbu II 22 - bariba bible

Sinɑmbu II 22

¹Wɔ̃ɔ nɔɔbɑ itɑwɑ Yosiɑsi u mɔ sɑɑ ye u bɑndu di Yerusɑlɛmuɔ. U kuɑ wɔ̃ɔ tɛnɑ kɑ itɑ bɑn te sɔɔ. Win mɛron yĩsirɑ Yedidɑ, Adɑyɑ Bosikɑtiɡiin bii.

²Yosiɑsi wi, u kuɑ ye yɑ Yinni Gusunɔ wɛ̃re, domi u sĩɑ win sikɑdo Dɑfidin yirɑ kpuro sɔɔ, u ǹ yen ɡɑɑ ɡɛɛrɑri.

³Ye Yosiɑsi u kuɑ wɔ̃ɔ yɛndu yiru sɑri bɑndu sɔɔ, yerɑ sɔ̃ɔ teeru u win tire yoro Sɑfɑni Asɑliɑn bii, Mɛsulɑmun debubu ɡɔrɑ sɑ̃ɑ yerɔ u nɛɛ,

⁴ɑ doo yɑ̃ku kowo tɔnwero Hilikiyɑn mi, ɑ nùn sɔ̃ ɑ nɛɛ, u ɡobi yi dooru koowo yi bɑ kɑ nɑ Yinni Gusunɔn sɑ̃ɑ yerɔ yi tɔmbɑ kɔ̃sobu wɛ̃.

⁵Kpɑ bu sɑ̃ɑ yerun sɔm kowobun wiruɡibu ɡobi yi nɔmu bɛriɑ.

⁶Kpɑ bu kɑ yi dɑ̃ɑ dɑ̃kobu kɑ bɑnɔbu kɑ sɔm kowobu kɔsiɑ kpɑ bu kɑ dɑ̃ɑ dwe kɑ kpenu ni bɑ koo kɑ sɑ̃ɑ yee te sɔmɛ.

⁷Adɑmɑ bu ku bikiɑ nɡe mɛ bɑ kɑ ɡobi yi dendisinɑ, domi bɑ sɑ̃ɑwɑ nɑɑnɛɡibu.

⁸Sɑfɑni u dɑ u Hilikiyɑ ɡɑri yi sɔ̃ɔwɑ. Mɑ Hilikiyɑ u Sɑfɑni sɔ̃ɔwɑ u nɛɛ, nɑ Yinni Gusunɔn woodɑn tireru wɑ sɑ̃ɑ yerɔ. Mɑ u nùn tu wɛ̃ u ɡɑrɑ.

⁹Yen biru Sɑfɑni u ɡɔsirɑmɑ u nɑ sinɑ bokon mi, u nùn ɡɔrɑ tusiɑ. U nɛɛ, wunɛn bwɑ̃ɑbɑ ɡobi yi suɑ bɑ sɑ̃ɑ yerun sɔm kowobun wiruɡibu nɔmu bɛriɑ.

¹⁰Mɑ u mɑɑ nɛɛ, tireru ɡɑru wee te yɑ̃ku kowo tɔnwero Hilikiyɑ u mɑn wɛ̃. Mɑ u tu sinɑ boko ɡɑriɑ.

¹¹Sɑɑ yè sɔɔ sinɑ boko Yosiɑsi u tire ten ɡɑri nuɑ, yerɑ u win tiin yɑberu nɛnuɑ u kɑrɑnɑ nuku sɑnkirɑnun sɔ̃.

¹²Mɑ u yɑ̃ku kowo Hilikiyɑ kɑ Akikɑmu Sɑfɑnin bii kɑ Akɑbori Miseen bii kɑ sere Sɑfɑni win tire yoro kɑ Asɑyɑ win sɔm kowo sɔ̃ɔwɑ u nɛɛ,

¹³i doo i Yinni Gusunɔ bikiɑ ye tire tenin ɡɑri ɡerumɔ nɛ kɑ nɛn tɔmbu Yudɑbɑn sɔ̃. Domi mɔru ye Yinni Gusunɔ u kɑ sun mɔ̀ yɑ kpɑ̃, yèn sɔ̃ bɛsɛn bɑɑbɑbɑ bɑ ǹ tire ten ɡɑri swɑɑ sue bu sere ko nɡe mɛ tɑ ɡeruɑ.

¹⁴Mɑ yɑ̃ku kowo Hilikiyɑ kɑ Akikɑmu kɑ Akɑbori kɑ Sɑfɑni kɑ Asɑyɑ bɑ dɑ bɑ Gusunɔn sɔmɔ Huludɑ wɑ Yerusɑlɛmun wɔɔ berɑ kpɑɑɔ. Huludɑ win durɔwɑ Sɑlumu Tikifɑn bii, Hɑrɑsin debubu. Sɑlumu wiyɑ u rɑ yɑ̃ku kowobun yɑbenu bere. Ye bɑ turɑ mi, yerɑ bɑ Huludɑ ɡɑri yi sɔ̃ɔwɑ.

¹⁵Mɑ u bu wisɑ u nɛɛ, ɑmɛniwɑ Gusunɔ Isirelibɑn Yinni u ɡeruɑ. U nɛɛ, i durɔ wi u bɛɛ ɡɔrimɑ sɔ̃ɔwɔ i nɛɛ,

¹⁶ɑmɛniwɑ Yinni Gusunɔ u ɡeruɑ. U nɛɛ, u koo de kɔ̃sɑ yu nɑ Yerusɑlɛmuɔ kpɑ yu min tɔmbu deemɑ nɡe mɛ tire ten ɡɑri yi ɡeruɑ te wi Yudɑbɑn sinɑ boko u ɡɑrɑ.

¹⁷Domi bɑ wi Yinni Gusunɔ deri, mɑ bɑ bũnu turɑre dɔ̃ɔ dokeɑmmɛ bu kɑ win mɔru seeyɑ kɑ ben kookoosu kpuro. Yen sɔ̃ tɛ̃, u kɑ Yerusɑlɛmuɡibu mɔru mɔ̀, yɑ ǹ mɑɑ suremɔ.

¹⁸Adɑmɑ Yudɑbɑn sunɔ wi u bɛɛ ɡɔrimɑ, i nùn sɔ̃ɔwɔ i nɛɛ, ɑmɛniwɑ Gusunɔ Isirelibɑn Yinni u ɡeruɑ win woodɑ ye u ɡɑrɑn sɔ̃. U nɛɛ,

¹⁹yèn sɔ̃ wi, sinɑ boko u nuɑ Yerusɑlɛmuɡibu bɑ koo kɔ̃sɑ wɑ, bu nuki sɑnkirɑ kpɑ bu bu ɡɛm, mɑ ɡɑri yi, yi wi sinɑ bokon ɡɔ̃ru so, mɑ u tii kɑwɑ Yinni Gusunɔn wuswɑɑɔ u swĩ, u win yɑberu nɛnuɑ u kɑrɑnɑ,

²⁰yen sɔ̃nɑ u koo de wi, sinɑ boko u ɡbi bɔri yɛndu sɔɔ kpɑ bu nùn sike win bɑɑbɑbɑn sikɑɔ. Win nɔni kun mɑɑ kɔ̃sɑ ye wɑsi, ye yɑ koo Yerusɑlɛmu deemɑ. Mɑ tɔn be, bɑ ɡɔsirɑmɑ bɑ sinɑ boko ɡɑri yi kpuro sɔ̃ɔwɑ.