Read bariba Yɑribu 15 Bible Online

Yɑribu 15 - bariba bible

Yɑribu 15

¹Sɑɑ yerɑ Mɔwisi kɑ Isirelibɑ bɑ Yinni Gusunɔ siɑrɑbun womu kuɑ. Bɑ nɛɛ, kon Yinni Gusunɔ tɔmɑ kɑ womu domi u win wɛrɔbu tɑbu di. U dumi kɑ yin mɑɑsɔbu sure nim wɔ̃ku sɔɔ.

²Yinni Gusunɔwɑ nɛn dɑm, wiyɑ nɑ siɑrɑmɔ kɑ nɛn womu. Wiyɑ u mɑn fɑɑbɑ kuɑ. Wiyɑ nɛn Yinni, kon nùn bɛɛrɛ wɛ̃. Wiyɑ nɛn bɑɑbɑn Yinni, kon nùn wɔlle suɑ.

³U sɑ̃ɑwɑ tɑbu kowo kɑ ɡem. Win yĩsirɑ Yinni Gusunɔ.

⁴U Eɡibiti sunɔn tɑbu kɛkɛbɑ kɑ win tɑbu kowo dɑmɡibu sure nim wɔ̃ku sɔɔ ɡe bɑ mɔ̀ Nɑɑ yɑri. Win tɑbu kowo ɡisonkobɑ bɑ nim diirɑ.

⁵Nim mɛ, mu bu wukiri, mɑ bɑ numɑ temɔ nɡe kperu.

⁶Yinni Gusunɔ, wunɛn nɔm ɡeu ɡɑ dɑm yiikoɡim mɔ. Geyɑ ɡɑ wunɛn wɛrɔbu munkɑ muku muku.

⁷Wunɛn sinɑndun kpɑ̃ɑru tɑ rɑ wunɛn wɛrɔbu tɑɑre. Wunɛn mɔru yɑ̀ n seewɑ, ɑ rɑ de bu dɔ̃ɔ mwɑɑrewɑ nɡe wĩi.

⁸A wɛ̃ru wurɑ mɑ nim mu kpɑɑsinɑ mu sinum kuɑ berɑ kɑ berɑ nɡe ɡbɑ̃rɑru.

⁹Wɛrɔ u nɛɛ, u koo bu nɑɑ swĩi kpɑ u bu nɑɑmwɛ. U koo mɔru kɔsiɑ be sɔɔ nɡe mɛ u kĩ, kpɑ u tɑkobi womɑ u bu ɡo kɑ win nɔmɑ, kpɑ u ben dukiɑ bɔnu ko.

¹⁰Adɑmɑ ɑ wunɛn wom wɛ̃siɑ, mɑ nim mu bu wukiri. Bɑ numɑ bɑ kpunɑ nɡe dɔ̃ɔ kpenu mi nim mu duku.

¹¹Yinni Gusunɔ, mbɑ n kɑ nun weenɛ ye tɔmbɑ sɑ̃ɑmɔ kpuro sɔɔ. Mbɑ n kɑ nun dɛɛrɑru nɛ, wunɛ wi ɑ nɑnum mɔ. Mbɑ n kɑ nun weenɛ, wunɛ wi bɑ koo siɑrɑ. Mbɑ n kɑ nun weenɛ, wunɛ wi ɑ rɑ sɔm mɑɑmɑɑkiɡinu ko.

¹²Domi ɑ wunɛn dɑm sɔ̃ɔsi, mɑ tem bu mwɛ.

¹³Wunɛn wɔnwɔndu sɔɔrɑ ɑ wunɛn tɔmbu swɑɑ sɔ̃ɔsi be ɑ yɑkiɑ. A mɑɑ bu kpɑrɑmɑ kɑ wunɛn dɑm ɑ kɑ dɔɔ sere wɑ̃ɑ yee te ɑ bu nɔɔ mwɛɛru kuɑ sɔɔ.

¹⁴Tɔn tukobu bɑ ye nuɑ, mɑ bɑ diirumɔ. Filisitibɑ bɑ bɛrum soorɑ.

¹⁵Edɔmun sinɑmbun toronu kɑrɑ. Mɑ Mɔɑbun tɑbu durɔbu bɑ diirumɔ. Kɑnɑnibɑ kpuro, ben wɑsi dwiiyɑ.

¹⁶Bɛrum kɑ nɑndɑbu koo bu deemɑ subɑru sɔɔ. Wunɛn dɑm sɑɑbu bɑ koo mɑri sɔ̃ɔ sɔ̃ɔ nɡe kperu. Sere wunɛn tɔn be ɑ yɑkiɑ yorun di bu kɑ nim wɔ̃ku tɔburɑ, Yinni Gusunɔ.

¹⁷Kɑɑ kɑ bu dɑ kpɑ ɑ bu tɑ̃sisiɑ wunɛn tiin ɡuuru wɔllɔ, mi ɑ wunɛn wɑ̃ɑ yeru sɔɔru kuɑ. Terɑ tɑ sɑ̃ɑ wunɛn sɑ̃ɑ yeru te ɑ tii kuɑ.

¹⁸Wunɛ Yinni Gusunɔ, kɑɑ n bɑndu diiwɑ kɑ bɑɑdommɑɔ.

¹⁹Sɑnɑm mɛ Eɡibiti sunɔn dumi kɑ win tɑbu kɛkɛbɑ kɑ mɑɑsɔbu bɑ duɑ nim wɔ̃ku sɔɔ, Yinni Gusunɔ u derɑ nim mu wurɑmɑ mu bu wukiri. Adɑmɑ u derɑ tem mu ɡberɑ nim wɔ̃ku ɡen suunu sɔɔ, mɑ Isirelibɑ bɑ tɔburɑ.

²⁰Yen biruwɑ Aronin sesu Mɑriɑmu wi u sɑ̃ɑ Gusunɔn sɔmɔ, u bɑrɑ kpɑ̃ru suɑ mɑ tɔn kurɔbu kpuro bɑ nùn swĩi bɑ bɑrɑ kpɑ̃nu soomɔ bɑ yɑɑmɔ.

²¹Mɑriɑmu u bu womu ɡeni kuɑ u nɛɛ, i Yinni Gusunɔ tɔmɔ kɑ womu, domi u nɑsɑrɑ wɑ kɑ win yiiko. Dumi kɑ yin mɑɑsɔbu u sure nim wɔ̃ku sɔɔ.

²²Yen biru Mɔwisi u Isirelibɑ kpɑrɑ sɑɑ nim wɔ̃ku ɡe bɑ mɔ̀ Nɑɑ yɑrin di bɑ dɑ ɡbɑburɔ te bɑ mɔ̀ Suri. Sɔ̃ɔ itɑwɑ bɑ sĩɑ ɡbɑbu te sɔɔ bɑ ǹ nim wɑ.

²³Mɑ bɑ turɑ Mɑrɑɔ ɑdɑmɑ nim mɛ bɑ wɑ mi, mu sosu, bɑ ǹ kpĩɑ bu nɔ. Yen sɔ̃nɑ bɑ yɑm mi sokɑ Mɑrɑ. Yen tubusiɑnɑ sosurɑ.

²⁴Mɑ tɔn be, bɑ Mɔwisi wɔkisi bɑ nɛɛ, mbɑ sɑ ko nɔ.

²⁵Mɔwisi u Yinni Gusunɔ nɔɔɡiru sue. Mɑ Yinni Gusunɔ u nùn dɛkɑ ɡɑɑ sɔ̃ɔsi. Ye u dɛkɑ ye suɑ u kɑre nim mɛ sɔɔ, mɑ mu dorɑ. Miyɑ Yinni Gusunɔ u win tɔmbu woodɑbɑ wɛ̃ kɑ woronu. Miyɑ u mɑɑ ben lɑɑkɑri mɛɛrɑ.

²⁶U nɛɛ, ì n nɛ Gusunɔ bɛɛn Yinnin ɡere nuɑ sɑ̃ɑ sɑ̃ɑ, mɑ i mɔ̀ ye n mɑn wɛ̃re mɑ i nɛn woodɑbɑ mɛm nɔɔwɑ, nɑ ǹ kɑ bɛɛ bɑrɑ ni sɛɛyɑsiɑmɔ ni nɑ Eɡibitiɡibu kpɛ̃ɛ. Nɛnɑ Yinni Gusunɔ nɛ wi nɑ rɑ n bɛɛ bɛkiɑmɔ.

²⁷Yen biru bɑ turɑ Elimuɔ mi nim bwii wɔkurɑ yiru yɑ wɑ̃ɑ kɑ kpɑkpɑ bɛ̃ɛ wɑtɑ kɑ wɔkuru. Mɑ bɑ ben sɑnsɑni ɡirɑ bwii yin bɔkuɔ.