Read bariba Yoobu 12 Bible Online

Yoobu 12 - bariba bible

Yoobu 12

¹Yoobu u Sofɑɑ wisɑ u nɛɛ,

²mɛyɑ, bɛɛyɑ i tɔmbun yɛ̃ru kpuro mɔ. Ì n ɡu, bwisi kpɑwɑ mi hɑnduniɑɔ.

³Adɑmɑ nɛn tii nɑ mɑɑ bwisi mɔwɑ mi nɡe bɛɛ. I ǹ mɑn bwisi kere. Wɑrɑ kun yeni kpuro yɛ̃ ye i sɑɑrɑ mi.

⁴Bɑɑ mɛ nɑ Gusunɔ kɑnɑ, u mɑn wisɑ, nɛn kpɑɑsibɑ mɑn yɑɑkoru mɔ̀. Bɑɑ mɛ nɑ ǹ tɑɑrɛ ɡɑɑ mɔ, nɛn bɔrɔbɑ bɑ mɑn yɛ̃ɛmɔ.

⁵Be bɑ wɑ̃ɑ bɔri yɛndu sɔɔ, bɑ rɑ n wɔnwɔndobu kɑ be bɑ sɛllɑmɔ ɡɛmɑwɑ.

⁶Gbɛnɔbun yɛnu ɡɑ rɑ n wɑ̃ɑ ɑlɑfiɑ sɔɔ. Be bɑ Gusunɔ seesimɔ, bɑ rɑ n wɑ̃ɑ bɔri yɛndu sɔɔ. Bɑ rɑ n ben tiin dɑm sɑ̃ɑmɔ.

⁷A yɛɛ kɑ ɡunɔsu bikio, su koo nun sɔ̃.

⁸A tem bikio, mu koo nun bwisi kɛ̃. A de swɛ̃ɛ yi nun sɑɑriɑ.

⁹Tɑkɑ koorɑ ye kpuro sɔɔ, yen yerɑ̀ yɑ ǹ yɛ̃ mɑ Yinni Gusunɔwɑ u ye kpuro mɔ̀.

¹⁰Wiyɑ u tɑkɑ koorɑ kpuro kɑ hunde koni bɑɑyere kpuron wɑ̃ɑru nɛni.

¹¹Yen sɔ̃nɑ bɑ mɔndu kuɑ bɑ nɛɛ, soowɑ ɡɑ rɑ ɡɑrin dobu wunɑnɛ, kpɑ dɑro ɡu mɑɑ dĩɑnun dobu wunɑnɑ.

¹²Wi u tɔkɔ kuɑ u rɑ n yɛ̃ru mɔ. Wi u mɑɑ hunde dɛnyɑ u rɑ n bwisi mɔ.

¹³Adɑmɑ Yinni Gusunɔwɑ u bwisi kɑ lɑɑkɑri kɑ dɑm kpuro mɔ.

¹⁴Ye u sɑnkɑ kpuro, ɡoo kun kpɛ̃ u ye sɔmɛ. Wi u mɑɑ mwɑ u pirisɔm doke, ɡoo kun kpɛ̃ u yɛ̃ro yɑrɑ.

¹⁵Ù n ɡurɑ yɔ̃rɑsiɑ, kpuro rɑ ɡberewɑ. Ù n mɑɑ ye yɔ̃su, kpɑ tem mu sɑnkirɑ.

¹⁶Wiyɑ u dɑm kɑ lɑɑkɑri mɔ. Wiyɑ u mɑɑ tɔnu mɔ wi u torɑ kɑ wi u win winsim torɑsiɑ.

¹⁷U rɑ be bɑ rɑ tem wunɑnɔsu ko mwɛɛri tereru. Kpɑ u de siri kowobu bu ɡɔsiɑ wiirobu.

¹⁸U rɑ sinɑmbu bɑndu yɑre, kpɑ u bu ko yobu.

¹⁹U rɑ yɑ̃ku kowobu mwɛɛri tereru, kpɑ u ben dɑmɡibu suriri.

²⁰U rɑ bèn nɔɔn ɡɑri bɑ rɑ nɑɑnɛ ko dɛre u kɔ̃, kpɑ u durɔ tɔkɔnun lɑɑkɑri kpeerɑsiɑ.

²¹U rɑ wiruɡibu sekuru doke, kpɑ u sinɑmbun dɑm buɑ.

²²U rɑ ye yɑ beruɑ yɑm wɔ̃kuru sɔɔ kpuro terɑsie, kpɑ u de yɑm bururɑm mu sɔ̃ɔsirɑ mi yɑm wɔ̃kurɑ rɑɑ wɑ̃ɑ.

²³Wiyɑ u rɑ bwesenu dɑbiɑsie, kpɑ u mɑɑ nu kpeerɑsiɑ. Wiyɑ u rɑ de nu tɛriɑ, kpɑ u mɑɑ nu kɑwɑ.

²⁴U rɑ bwesenun wiruɡibun bwisi wunɛ, kpɑ u de bɑ n bɔsu ɡbɑburɔ, mi swɑɑ sɑri.

²⁵U rɑ de bɑ n bɑbi yɑm wɔ̃kuru sɔɔ, kpɑ u de bɑ n bɔsu nɡe be tɑm mu ɡoomɔ.