Read bariba Yoobu 23 Bible Online

Yoobu 23 - bariba bible

Yoobu 23

¹Yoobu u wisɑ u nɛɛ,

²sere kɑ ɡisɔ nɑ Gusunɔ weeweenu koosimɔ. Nɛn nɔni swɑ̃ɑru tɑ nɛn wuri kere.

³Nɑ̀ n dɑɑ yɛ̃ mi u wɑ̃ɑ kon dɑɑ dɑwɑ sere win mi.

⁴Kpɑ n nùn sɔ̃ ye yɑ mɑn wɑ̃ɑsi, kɑ mɑɑ yèn sɔ̃ nɑ tii wɔrɑmɔ.

⁵Kpɑ n win wisibu nɔ. N nɔ ye n nùn nɛni.

⁶U koo mɑn dɑm sɔ̃ɔsi u kɑ mɑn siri? Aɑwo, u koo yɔ̃rɑwɑ u mɑn swɑɑ dɑki.

⁷Nɛ tɔn ɡeowɑ kon kpĩ n kɑ nùn wesiɑnɔ ko. Kpɑ wi, wi u sɑ̃ɑ nɛn siri kowo, u mɑn yɑkiɑ sere kɑ bɑɑdommɑɔ.

⁸Adɑmɑ nɑ̀ n dɑ sɔ̃ɔ yɑri yeru ɡiɑ, u ku rɑ n wɑ̃ɑ mi. Nɑ̀ n mɑɑ dɑ sɔ̃ɔ duu yerɔ, nɑ ku rɑ nùn wɑ mi.

⁹Aɑ, u sɔmburu ɡɑru mɔ̀wɑ sɔ̃ɔ yɛ̃sɑn nɔm ɡeu ɡiɑ? Nɑ̀ n dɑ mi, u ku rɑ n wɑ̃ɑ mi. U kukuɑwɑ sɔ̃ɔ yɛ̃sɑn nɔm dwɑru ɡiɑ? Min tii, nɑ ku rɑ nùn wɑ.

¹⁰Kɑ mɛ, u nɛn swɛɛ kpuro yɛ̃ yi nɑ swĩi. Ù n mɑn kpɛ̃ɛ lɑɑkɑri mɛɛribu sɔɔ, kon yɑriwɑ min di, nɑ n dɛɛre nɡe wurɑ ye bɑ dɔ̃ɔ doke.

¹¹Nɑ win yirɑ swĩiwɑ dee dee. Nɑ ǹ ɡɛre win swɑɑn di.

¹²Nɑ ǹ win woodɑ sɑre. Ye u mɑn sɔ̃ɔwɑ kpuro, nɑ ye mɛm nɔɔwɑwɑ ɡɔ̃ruɔ.

¹³Ù n ɡɑ̃ɑnun himbɑ yi, wɑrɑ u koo ye sĩiyɑ. Ye u kĩ yerɑ u rɑ ko.

¹⁴Ǹ n mɛn nɑ, u koo ko ye u yi kpuro nɛn sɔ̃, kpɑ u mɑɑ mɑn himbɑ kpɑɑ yiiyɑ.

¹⁵Yen sɔ̃nɑ nɑ nɑnde wi Gusunɔn wuswɑɑɔ. Nɑ̀ n bwisikɑ nɑ rɑ nɑndewɑ win sɔ̃.

¹⁶Gusunɔ u nɛn wɔruɡɔrun dɑm buɑ. Wi, Dɑm kpuroɡii u mɑn bɛrum kpɛ̃ɛ.

¹⁷Kɑ yen de kpuro, nɑ ǹ nɔɔ mɑri, bɑɑ mɛ n sɑ̃ɑre yɑm wɔ̃kurɑ mɑn wukiri.