Read bariba Yoobu 26 Bible Online

Yoobu 26 - bariba bible

Yoobu 26

¹Yoobu u Bilidɑ wisɑ u nɛɛ,

²Bilidɑ, wunɛn wisibu bu ǹ dɑm sɑriruɡii somimɔ. Wunɛn dɑm kɛ̃ru tɑ ǹ ɑrufɑɑni ɡɑɑ mɔ.

³Annɑ ɑ bwisi kɛ̃ru wɑ te ɑ wi u kun bwisi mɔ kɛ̃mɔ. Wunɛn bwisi yi, yi ǹ ɡoo somimɔ.

⁴Wɑrɑ ɑ ɡɑri yini sɔ̃ɔmɔ. Wɑrɑ u nun ɡɑri yini ɡerusiɑ.

⁵Be bɑ ɡu bɑ wɑ̃ɑ sere nim wɔ̃kun tem sɔɔwɔ, bɑ diirimɔ.

⁶Domi Gusunɔ u be kpuro wɑɑmɔ. Gɑ̃ɑnu kun nùn ɡɑnuɑ ɡɔribun wɑ̃ɑ yeru mi.

⁷Wiyɑ u sɔ̃ɔ yɛ̃sɑn nɔm ɡeu doke wom dirum sɔɔ. Mɑ u tem bwɛ̃ kɑm dirum sɔɔ.

⁸Mɑ u nim bɑnisi ɡuru winu sɔɔ. Kɑ mɛ, ɡuru wii ni, nu ku rɑ ɡɛ̃ɛre nim bunum sɔ̃.

⁹Wiyɑ u rɑ de ɡuru winu nu win sinɑ ɡɔnɑ wukiri.

¹⁰Mɑ u bubenu kuɑ nim wɔ̃kun wɔllɔ, mi yɑm bururɑm kɑ yɑm wɔ̃kurɑ kɑrɑnɛ.

¹¹Gusunɔ ù n ɡbɑ̃rɑ, wɔllun ɡbere yɑ rɑ diiriwɑ, kpɑ yɑ n wɑ̃ɑ biti sɔɔ.

¹²Kɑ win dɑmɑ u rɑ nim wɔ̃kun nim kɔsuku. Kpɑ u kɑ win bwisi yɑɑ ɡɔbɑ ye bɑ mɔ̀ Rɑhɑbu kɑmiɑ.

¹³Ù n wom wurɑ, wɔllu kpuro tɑ rɑ dɛɛrewɑ nɡe bɑ kurɑ. Kɑ win nɔmɑ u rɑ wɑɑ ye yɑ dukɑ mɔ sɔkiri.

¹⁴Adɑmɑ yeni kpuro yɑ sɑ̃ɑwɑ win kookoo piiminu. Nin wɔkinun fiikowɑ sɑ rɑ n nɔɔmɔ. Ǹ n mɛn nɑ, wɑrɑ u koo kpĩ u win dɑm ɑsɑnsi tubu ù n ɡbɑ̃rɑ nɡe ɡurɑ.