Read bariba Yoobu 3 Bible Online

Yoobu 3 - bariba bible

Yoobu 3

¹Yenibɑn biru, Yoobu u den nɔɔ wukiɑ mɑ u ɡɑri ɡeruɑ u tɔ̃ɔ te bɑ nùn mɑrɑ bɔ̃rusi.

³bɔ̃rurɑrɑ tɔ̃ɔ tè sɔɔ bɑ mɑn mɑrɑ. Bɔ̃rurɑrɑ wɔ̃ku tè sɔɔ bɑ nɛn ɡurɑ suɑ.

⁴Yen tɔ̃ɔ te, tu ko yɑm wɔ̃kuru mɑm mɑm. Gusunɔ u ku mɑɑ ten ɡɑri ko wɔllu mi. U ku de yɑm bururɑm mu mɑɑ koorɑ te sɔɔ.

⁵Gɔribun wɑ̃ɑ yerun yɑm wɔ̃ku bɑkɑru tu tu wukiri, kpɑ ɡuru wiru tɑ n tu wukiri. Yen dɔmɑ te, suru kɑ sɔ̃ɔ bu mwɑɑnɑ kpɑ bɛrum mu n wɑ̃ɑ tem sɔɔ.

⁶Gusunɔ u de wɔ̃ku te, tu tĩrɑ n bɑndɑ. U ku mɑɑ tu ɡɑrisi wɔ̃ɔn tɔ̃nu sɔɔ. U ku mɑɑ tu ɡɑrisi surun sɔ̃ɔ sɔɔ.

⁷U de tɔ̃ɔ te, tɑ n sɑ̃ɑ tɔ̃ɔ bɑrukɑ sɑriruɡiru, kpɑ ɡoo u ku rɑɑ nuku dobu ko te sɔɔ.

⁸Sɔrobu bu tɔ̃ɔ te bɔ̃rusio. Be bɑ wɑɑ bɑkɑn dweebu yɛ̃ bu tu bɔ̃rusio.

⁹Kperi yi yi koo yɑri tɔ̃ɔ ten yokɑ yi ku bɑlli. Tɑ̀ n yɑm bururɑm yĩiyɔ, tu mu biɑ. Tu ku mɑɑ buruku sɔ̃ɔ wɑ.

¹⁰Domi tɑ ǹ nɛn mɛron nukuru yinɑsie. Tɑ derɑwɑ bɑ mɑn mɑrɑ n kɑ wɑhɑlɑ yeni wɑ.

¹¹Mbɑn sɔ̃nɑ nɑ ǹ ɡu nɛn mɛron nukurɔ. Mbɑn sɔ̃nɑ nɑ ǹ ɡu sɑnɑm mɛ bɑ mɑn mɑrumɔ.

¹²Mbɑn sɔ̃nɑ nɛn mɛro u mɑn mɑrɑ u tɑɑru swĩi. Mbɑn sɔ̃nɑ u mɑn nɔɔri u bom kɑ̃.

¹³Nɑ̀ n dɑɑ ɡu dɔmɑ te, nɑ ko n dɑɑ kpĩwɑ, kpɑ nɑ n dò nɑ n wɛ̃re,

¹⁴nɡe sinɑmbu kɑ ben bwisi kɛ̃ɔ be bɑ tii sinɑ kpɑɑnu bɑniɑ tem mɛ sɔɔ mɑ nu kuɑ bɑnsu.

¹⁵Mɛyɑ nɑ ko n wɛ̃re nɡe sinɑ bii be bɑ ben diɑ wurɑ kɑ sii ɡeesu yibiɑ, mɑ bɑ ɡu.

¹⁶Ǹ kun mɛ, nɑ n wɛ̃re nɡe bii wìn nukuru bɑ yɑrɑ, ǹ kun mɛ, nɡe bii wi bɑ mɑrɑ mɑ u yɑnde ɡu u ǹ sɔ̃ɔ wɑ.

¹⁷Nɑ ko n wɑ̃ɑ ɡɔriɔ mi tɔn kɔ̃sobun tii bɑ wɛ̃re, kɑ sere mi be bɑ wɑsirɑ bɑ ǹ mɑɑ dɑm mɔ bɑ wɑ̃ɑ bɑ wɛ̃re.

¹⁸Miyɑ pirisɔmbɑ bɑ wɛ̃re, bɑ ǹ mɑɑ be bɑ bu dɑm dɔremɔn nɔɔ nɔɔmɔ.

¹⁹Dɑmɡibu kɑ bwɛ̃ɛbwɛ̃ɛbu bɑ wɑ̃ɑ mi sɑnnu. Yobu bɑ̀ n dɑ mi, bɑ rɑ yɑkiɑrewɑ sɑɑ ben yinnin min di.

²⁰Mbɑn sɔ̃nɑ Yinni Gusunɔ u rɑ de tɔnu wi u wɑhɑlɑ mɔ̀ u yɑm sɑ̃reru wɑ. Mbɑn sɔ̃nɑ u rɑ de wi u nuki sɑnkire u n wɑ̃ɑ.

²¹Domi tɔn ben bweserɑ bɑ ɡɔɔ kĩ, ɑdɑmɑ bɑ ǹ nùn wɑsi. Bɑ ɡɔɔ win binɛ mɔ n kere dukiɑ.

²²Bɑ ku rɑ n nuku dobu mɔ sere bɑ̀ n ben siki wɔru wɑ.

²³Adɑmɑ nɑ sɑ̃ɑwɑ wi u kun yɛ̃ mi u dɔɔ, mɑ Yinni Gusunɔ u nɛn swɑɑ kɛnusi u kɑ sikerenɑ.

²⁴Weeweenun sɑɑbu, nɑ ku rɑ di. Nɛn wuri kun nɔru mɔ nɡe nim mɛ mu kokumɔ.

²⁵Yèn bɛrum nɑ mɔ̀, yerɑ yɑ rɑ mɑn deemɛ. Ye nɑ mɑɑ nɑsie, yerɑ yɑ rɑ mɑn wɔri.

²⁶Wee, nɑ ǹ wɑ̃ɑ sɛ̃ɛ, nɑ ǹ mɑɑ wɛ̃re. Nɑ ǹ bɔri yɛndu mɔ, mɑ nɑ rɑ n burisinɛ.