Read bariba Yoobu 30 Bible Online

Yoobu 30 - bariba bible

Yoobu 30

¹Tɛ̃ wee bibu bɑ mɑn yɛ̃ɛmɔ, bɑ ǹ mɑm nɛn tɔkɔru ɡɑrɑ, be, bèn bɑɑbɑbɑ bɑ ǹ turɑ bu nɛn bɔ̃nu somi bu kɑ nɛn yɑ̃ɑ ɡɔ̃ɔ kpɑrɑ.

²Mbɑ bɑ koo rɑɑ kpĩ bu mɑn kuɑ, be, be bɑ sɑ̃ɑre bɑ ɡɔɔ dɔɔ.

³Wee bɑ sɑ̃ɑru kɑ ɡɔ̃ɔru soore. Bɑ dɑ ɡbɑburɔ bu kɑ dĩɑnu kɑsu bu di. Adɑmɑ ɡɑ̃ɑnu sɑri mi.

⁴Bɑ rɑ dewɑ dɑ̃ɑ kikun bɔkuɔ bu yɑkɔ burɑ ɡe ɡɑ bɔru mɔ ɡɑ n sɑ̃ɑ ben dĩɑnu, kpɑ bɑ n kiku ɡɑɡun ɡbini dimɔ.

⁵Bɑ rɑ bu ɡirewɑ tɔmbun suunu sɔɔn di, bɑ n bu nɑɑ swĩi nɡe ɡbɛnɔbu.

⁶Kpɑ bu dɑ bɑ n wɑ̃ɑ kpee wɔrusɔ kɑ wɔwi sɔɔ,

⁷bɑ n wɑ̃ɑ bɑ n tɑɑsinɛ sɑ̃kin suunu sɔɔ, kpɑ bɑ n kuuki mɔ̀ kikisɔ,

⁸bɑ n sɑ̃ɑre nɡe wiirobu, ǹ kun mɛ nɡe be bɑ ɡɛmɑ bɑ ɡirɑ wuun di.

⁹Tɛ̃ wee, ben bibɑ bɑ mɑn yɛ̃ɛmɔ, bɑ mɑn womusu dokemɔ.

¹⁰Bɑ rɑ mɑn biru kisi yèn sɔ̃ bɑ ǹ kĩ bu mɑn wɑ. Kpɑ bu mɑn yɑ̃ɑtɑm sie.

¹¹Domi Gusunɔ u mɑn funɛ wunɑ, u sekuru doke. Yen sɔ̃nɑ ben ɡoo kun nɛn bɛɛrɛ yɛ̃ bɑɑ fiiko.

¹²Tɔn kɔ̃so be, bɑ mɑn seesimɔ. Bɑ kɑsu bu mɑn tɛ̃kɑ di bu surɑ. Bɑ swɑɑ kɑsuwɑ bu kɑ mɑn kɑm koosiɑ.

¹³Bɑ nɛn swɛɛ bɔɔrɑ. Bɑ kookɑri mɔ̀ bu kɑ mɑn kɑm koosiɑ, be, be ɡoo kun somiru wee.

¹⁴Be wee bɑ yɑbɑ mi nɑ kukuɑ. Mɑ bɑ dumɔ min di bɑ mɑn wɔrimɔ.

¹⁵Mɑ bɛrum mɑn mwɑ, nɛn bɛɛrɛ yɑ doonɑ nɡe woo. Nɛn bɔri yɛndɑ doonɑ nɡe ɡuru wiru.

¹⁶Tɛ̃, nɑ wɑ̃ɑwɑ ɡɔɔ sɔɔ. Nɑ wɑhɑlɑ wɔri nɑ kpɑ.

¹⁷Nɛn kukunu kpuro rɑ n tennɑmɔwɑ wɔ̃kuru. Nɑ ku rɑ wɛ̃re wɑhɑlɑ yen sɔ̃.

¹⁸Yɑ mɑn sɛ̃ke bɑɑmɑ kɑ dɑm nɡe yɑberun wĩiru.

¹⁹Wee Gusunɔ u mɑn kpɛ̃ɛ pɔtɔkɔ sɔɔ. Torom kɑ tuɑ nɑ kɑ weenɛ.

²⁰Gusunɔ nɛn Yinni, nɑ nun somiru kɑnɑmɔ, ɑdɑmɑ ɑ ǹ mɑn wisɑ. Nɑ seewɑ nɑ yɔ̃rɑ wunɛn wuswɑɑɔ ɑdɑmɑ ɑ ǹ nɛn lɑɑkɑri kue.

²¹A sɛ̃siɑwɑ, mɑ ɑ mɑn sɛ̃re kɑ wunɛn dɑm bɑkɑm.

²²Wee ɑ derɑ woo ɡunɑ yɑ mɑn suɑ yɑ toorimɔ.

²³Domi nɑ yɛ̃ mɑ ɑ kɑ mɑn dɔɔwɑ ɡɔribun wɑ̃ɑ yerɔ mi tɔmbu kpuro bɑ koo dɑ.

²⁴Adɑmɑ kɑ mɛ, bɑɑ tɔnu ù n ɡɔɔ dɔɔ, u ǹ nɔmɑ suɑmɔ u fɑɑbɑ kɑnɑ? Wi u wɑ̃ɑ wɑhɑlɑ sɔɔ u ǹ somiru kɑnɑmɔ?

²⁵Nɑ ǹ bu swĩiyɛ be wɑ̃ɑrɑ sɛ̃sie? Nɑ ǹ nuki sɑnkire sɑ̃ɑrobun sɔ̃?

²⁶Wee nuku dobɑ nɑ rɑ n yĩiyɔ, ɑdɑmɑ nɔni swɑ̃ɑrɑ nɑ wɑɑmɔ. Yɑm bururɑmɑ nɑ rɑ n yĩiyɔ, ɑdɑmɑ yɑm wɔ̃kurɑ nɑ wɑɑmɔ.

²⁷Nɛn bwɛ̃rɑ ku rɑ kpunɛ yèn sɔ̃ nɑ kɑ wɑhɑlɑ ɡɑbirinɑmɔ.

²⁸Nɑ rɑ n sĩimɔwɑ nuku sɑnkirɑru sɔɔ. N sɑ̃ɑre sɔ̃ɔ ku rɑ yɑri nɛn mi. Bɑɑ nɑ̀ n wɑ̃ɑ tɔn wɔru sɔɔ, nɑ rɑ n somiru kɑnɑmɔwɑ.

²⁹Nɛn ɡɔɔ wuri yin sɔ̃, nɑ kuɑ nɡe ɡbeeku bɔ̃ɔ, ǹ kun mɛ nɡe tɑɑtɑɑru.

³⁰Nɛn ɡɔnɑ tĩrɑ, nɛn wɑsi ɡberɑmɔ.

³¹Tɛ̃ nɛn mɔrɔku ɡɑ wɑ̃ɑwɑ n kɑ ɡɔɔ wuri ko. Kpɑ n nɛn ɡuuru so kɑ be bɑ ɡɔɔ wuri mɔ̀ sɑnnu.