Read bariba Yoobu 32 Bible Online

Yoobu 32 - bariba bible

Yoobu 32

¹Elifɑsi, kɑ Sofɑɑ, kɑ Bilidɑ bɑ ǹ mɑɑ Yoobu ɡɛɛ wisɑ yèn sɔ̃ u tii ɡɑrisi tɑɑrɛ sɑriruɡii.

²Adɑmɑ durɔ ɡoo wɑ̃ɑ Rɑmun bweseru sɔɔ wi bɑ mɔ̀ Elihu. Win tundowɑ Bɑrɑkɛli, Busin yɛnuɡii. Wiyɑ u mɔru bɑrɑ yèn sɔ̃ Yoobu u tii ɡɑrisi tɑɑrɛ sɑriruɡii Gusunɔn wuswɑɑɔ.

³U mɑɑ kɑ Yoobun bɔrɔbɑ itɑ be, mɔru kuɑ yèn sɔ̃ bɑ kpɑnɑ bu Yoobu wisi dee dee, mɑ bɑ sere nùn tɑɑrɛ wɛ̃ɛmɔ.

⁴N deemɑ Yoobun bɔrɔ be, bɑ Elihu bukurɑru kere. Yen sɔ̃nɑ u ɡinɑ sɑkɑ u ǹ kɑ Yoobu ɡɑri kue sɑnɑm mɛ bɔrɔ be, bɑ kɑ nùn ɡɑri mɔ̀.

⁵Adɑmɑ ye u deemɑ bɑ ǹ mɑɑ wɑ ye bɑ koo Yoobu wisi, yerɑ u mɔru kuɑ.

⁶Mɑ u ɡɑri suɑ u nɛɛ, nɛ bii ɑluwɑɑsiwɑ. Bɛɛ mɑɑ i sɑ̃ɑwɑ bukurobu. Yen sɔ̃nɑ bɛrum mɑn mwɑ n kɑ bɛɛ nɛn bwisikunu sɔ̃.

⁷Mɑ nɑ tii sɔ̃ɔwɑ nɑ nɛɛ, durɔ tɔkɔnɑ nu ko n ɡɑri ɡerubu yɛ̃. Niyɑ n weenɛ nu tɔmbu bwisi kɛ̃.

⁸Adɑmɑ kɑ ɡem, nɑ wɑ mɑ Gusunɔ Dɑm kpuroɡiin Hundewɑ u rɑ tɔnu bwisi wɛ̃.

⁹N ǹ mɔ tɔnun wɔ̃ɔn kpɑ̃ɑrɑ tɑ rɑ nùn yɛ̃ru wɛ̃. N ǹ mɑɑ tɔkɔru tɑ rɑ nùn bwisi kɛ̃ u kɑ siri dee dee.

¹⁰Yen sɔ̃nɑ nɑ nɛɛ, i mɑn swɑɑ dɑkio i nɔ, kpɑ n mɑɑ ɡere ye nɑ bwisikɑ.

¹¹Domi nɑ mɑɑri sere i kɑ bɛɛn ɡɑri kuɑ i kpɑ. Nɑ mɑɑ yi swɑɑ dɑki mɑm mɑm, nɑ nuɑ kpuro bwisi yi i kɑ Yoobu siri.

¹²Nɑ bɛɛ swɑɑ dɑki kɑ lɑɑkɑri, ɑdɑmɑ nɑ wɑ bɛɛn ɡoon ɡɑri kun Yoobu kɑmiɛ. Goo kun mɑɑ kpĩɑ u nùn wisɑ dee dee.

¹³Yen sɔ̃, i ku ɡere i nɛɛ, i win ɡɑrin wɛ̃ɛ nɔɔ wɑ. Gusunɔ turowɑ koo kpĩ u nùn siri, n ǹ mɔ tɔnu.

¹⁴N ǹ nɛ Yoobu u kɑ ɡɑri kuɑ. Ǹ n dɑɑ nɛn nɑ, ye kon nùn wisi nɛnɛmɑ.

¹⁵Yoobu, wee bɑ nɔɔ mɑri tɛ̃, bɑ biɑ ye bɑ koo wisi mɑ bɑ wɑ̃ɑ sekuru sɔɔ.

¹⁶Nɑ sɑkɑ sere bɑ kɑ ɡɑri yi kuɑ bɑ kpɑ, mɑ bɑ mɑri, bɑ ǹ wɑ ye bɑ koo wisi.

¹⁷Tɛ̃, kon ɡɑri suɑ, kpɑ n ɡere ye nɛ nɑ mɑɑ bwisikɑ.

¹⁸Domi ɡɑri wɑ̃ɑ nɛn ɡɔ̃ruɔ yi kpɑ̃, nɑ mɑɑ sɛnde n kɑ yi ɡere.

¹⁹Wee yi ɡbisimɔ nɛn nukurɔ nɡe tɑm mɛ bɑ doke ɡɔnɑn bɔɔ kpɑɑru sɔɔ mɑ tɑ kĩ tu kurɑ.

²⁰Tɛ̃, i de n mɑɑ ɡɑri ɡere kpɑ nɛn bwɛ̃rɑ yu kpunɑ. Kon nɔɔ wukiɑ, kpɑ n bɑɑwure wisi.

²¹Nɑ ǹ ɡoon biru yɔ̃rɑmɔ. Nɑ ǹ mɑɑ ɡoo fufu mɔ̀.

²²Domi nɑ ǹ yenibɑn dɔɔnɛ mɔ. Nɑ̀ n dɑɑ yen dɔɔnɛ mɔn nɑ, nɛn tɑkɑ kowo u n mɑn kpeerɑsie n tɛ.