Read bariba Yoobu 34 Bible Online

Yoobu 34 - bariba bible

Yoobu 34

¹Elihu u mɑɑ ɡeruɑ u nɛɛ,

²bɛɛ be i bwisi mɔ, i nɛn ɡɑri swɑɑ dɑkio. Bɛɛ be i lɑɑkɑri mɔ, i swɑɑ tem kpĩiyɔ i nɔ.

³Domi swɑsɑ su rɑ ɡɑrin dobu wunɑnɛ, nɡe mɛ yɑrɑ yɑ rɑ dĩɑnun dobu wunɑnɛ.

⁴Ǹ n mɛn nɑ, i de su ɡem kɑsu, kpɑ su ɡiɑ bɛsɛn suunu sɔɔ ye yɑ wɑ̃.

⁵Domi Yoobu u nɛɛ, u dɛɛre. U mɑɑ nɛɛ, Gusunɔ ku rɑ win dɛɛrɑ te ɡɑrisi ɡɑ̃ɑnu.

⁶Kɑ win ɡem kpuro, u nùn ɡɑrisi wee kowo. Bɑɑ mɛ u ǹ tore, u nùn mɛɛrɑ kuɑ ye yɑ ǹ kpeemɔ.

⁷Ǹ n mɛn nɑ, i tɔnu wɑɑre nɡe Yoobu wi Gusunɔn yɑɑko kobu kun kɑ sɛ̃ nɡe nim nɔrubu,

⁸mɑ u kɑ tɔn kɔ̃sobu sĩimɔ, u wɑ̃ɑ kɑ be sɑnnu?

⁹Domi u nɛɛ, wi u kɑ Gusunɔ sĩimɔ, u ku rɑ yen ɑrufɑɑni ɡɑɑ wɑ.

¹⁰Bɛɛ be i bwisi mɔ, i nɛn ɡɑri swɑɑ dɑkio i nɔ. I n yɛ̃ mɑ Gusunɔ ku rɑ kɔ̃sɑ ko. Gusunɔ Dɑm kpuroɡii u ku rɑ tɔnu win ɡem bire.

¹¹Adɑmɑ u rɑ tɔnu kɔsiewɑ ye u kuɑ. Kpɑ u bɑɑwure nùn win dɑɑn ɑre wɛ̃.

¹²Kɑ ɡem Gusunɔ ku rɑ kɔ̃sɑ ko. U ku rɑ tɔnu nùn win ɡem bire.

¹³Wɑrɑ u nùn woodɑ wɛ̃ u kɑ tem kpɑrɑ. Wɑrɑ u nùn mɛ kpuro nɔmu bɛriɑ.

¹⁴Gusunɔ ù n dɑɑ win tiin bwisikunu mɔ̀n nɑ, mɑ u wɛ̃siɑru wunɑ te u tɔnu wɛ̃,

¹⁵tɔmbu kpurowɑ bɑ koo ɡbi sɑnnu, kpɑ bu ɡɔsiɑ tuɑ.

¹⁶Yoobu, ɑ̀ n lɑɑkɑri mɔn nɑ, ɑ ɡɑri yi swɑɑ dɑkio, yi kon nun sɔ̃.

¹⁷Gusunɔ ù ku rɑ ɡem kɑ̃n nɑ, u koo kpĩ u hɑnduniɑ kpɑrɑ? Kɑɑ kpĩ ɑ wi, wi u sɑ̃ɑ Dɑm kpuroɡii tɑɑrɛ wɛ̃?

¹⁸Kɑɑ kpĩ ɑ sinɑ boko sɔ̃ ɑ nɛɛ, u ǹ ɡɑ̃ɑnu sɑ̃ɑ, kpɑ ɑ win sinɑ ɑsɑkpɔbu soku tɔn kɔ̃sobu?

¹⁹Adɑmɑ Gusunɔ u koo kpĩ u ko mɛ. Domi u ku rɑ sinɑmbun bɛɛrɛ mɛɛri. U rɑ ɡobiɡibu kɑ sɑ̃ɑrobu ɡɑrisiwɑ tiɑ. Domi wiyɑ u be kpuro tɑkɑ kuɑ.

²⁰Sɔ̃ɔ teeru be kpuro bɑ koo ɡbiwɑ subɑru sɔɔ. Gɑsɔ, wɔ̃ku suunu sɔɔrɑ ɡɑbɑ koo ɡbi. Gɑsɔ, bɑ koo sinɑ boko seesi bu ɡo n kun sɛ̃sie.

²¹Domi Gusunɔ u rɑ n tɔmbun sɑnu sɑnusu mɛɛrɑ. Kpɑ u n ben swɛɛ nɔni ɡirɑri.

²²Yɑm wɔ̃kuru ɡɑru sɑri te tɑ koo tɔn kɔ̃so bere u kun kɑ nùn wɑ.

²³N ǹ tilɑsi Gusunɔ u kɑ tɔnu siribu soku u sere nùn siri.

²⁴U rɑ dɑmɡibu yɑrewɑ ben ɑyerun di sɑɑwɑrɑ sɑri. Kpɑ u ɡɑbu kɔsire ko mi.

²⁵Domi u ben kookoosu yɛ̃. U rɑ bu surewɑ wɔ̃kuru, kpɑ u bu kɔsuku.

²⁶U rɑ bu sɛɛyɑsiewɑ nɡe tɔn kɔ̃sobu tɔmbu kpuron wuswɑɑɔ.

²⁷Domi bɑ wi, Yinni Gusunɔ biru kisi. Mɑ bɑ win woodɑbɑ yinɑ.

²⁸Bɑ derɑ sɑ̃ɑrobɑ wuri mɔ̀ sere u yi nɔɔmɔ. Mɑ win lɑɑkɑri yɑ wurɑ wɔnwɔndobun mi ɡiɑ, ben wuri yin sɔ̃.

²⁹Gusunɔ ù n nɛɛ, u ǹ ɡoo ɡɑ̃ɑnu kuɑmmɛ, wɑrɑ koo nùn tɑɑrɛ wɛ̃. Ù n tii beruɑ wɑrɑ u koo kpĩ u nùn wɑ.

³⁰Bweseru ɡɑru sɑri te tɑ koo kɑ tii yinɑ ù n tu sunɔ kɔ̃so wɛ̃ wi u koo tu dɑm dɔre.

³¹Yoobu, ɑ wunɛn durum tuubɑ koore Gusunɔn mi? A nùn sɔ̃ɔre mɑ ɑ ǹ mɑɑ durum mɔ̀?

³²A Gusunɔ bikiɑre u nun wunɛn durum sɔ̃ɔsi ye ɑ ǹ wɑ kɑ tii? À n mɑɑ torɑnu ɡɑnu koore, ɑ nùn sɔ̃ɔre mɑ ɑ ǹ mɑɑ nu mɔ̀?

³³Wunɛ wi ɑ Gusunɔ tɑɑrɛ wɛ̃ɛmɔ, ɑ tɑmɑɑ u koo tɔnu siri nɡe mɛ ɑ kĩ? Wunɑ kɑɑ ɡere, n ǹ mɔ nɛ. Ǹ n mɛn nɑ, ɑ ɡerumɑ ye ɑ bwisikɑ.

³⁴Bwisiɡii be bɑ lɑɑkɑri mɔ, bɑ koo nɛn ɡɑri wurɑ bu nɛɛ,

³⁵Yoobu u ɡɑri ɡerumɔwɑ yi u ǹ yɛ̃. Domi win ɡɑri yi ǹ ɑsɑnsi mɔ.

³⁶Ǹ n mɛn nɑ, i win ɡɑri kpuro wɛ̃ɛrio, domi u ɡɑri mɔ̀wɑ nɡe tɔn kɔ̃sobu.

³⁷U win durum sɔɔ durum sosimɔ. Domi u Gusunɔ seesimɔwɑ win ɡɑri ɡerubu sɔɔ, u nùn yɛ̃ɛmɔ bɛsɛn suunu sɔɔ.