Read bariba Yoobu 38 Bible Online

Yoobu 38 - bariba bible

Yoobu 38

¹Yinni Gusunɔ u Yoobu wisɑ ɡuru woo bɔkɔ ɡɑɡun di u nɛɛ,

²mbɑn sɔ̃nɑ ɑ derɑ tɔmbu bɑ ǹ nɛn himbɑ tubumɔ kɑ wunɛn wiirɑ ɡɑri.

³Tɛ̃, ɑ sɔɔru koowo, kpɑ ɑ yɔ̃rɑ nɡe tɔn durɔ wɔruɡɔ. Kon nun ɡɑri bikiɑ, kpɑ ɑ mɑn yi tubusiɑ.

⁴Mɑnɑ ɑ wɑ̃ɑ sɑnɑm mɛ nɑ tem kuɑ. A ye ɡeruo, ɑ̀ n bwisi mɔn nɑ.

⁵A yɛ̃ wi u mɛn ɡoonu yi yi? Wɑrɑ u nu yĩirɑ kɑ wɛ̃ɛ.

⁶Mɑ sɔɔrɑ bɑ mɛn kpɛɛkpɛɛku swĩi. Wɑrɑ u mɛn ɡɔmburun kperu swĩi.

⁷Sɑɑ ye wɔllun ɡɔrɑdobɑ bɑ dɛsiru kɑrɑmɔ, mɑ n sɑ̃ɑre kperin tii yi nuku dobun womu mɔ̀ yɑm sɑ̃re bururu,

⁸wɑrɑ u nim wɔ̃ku kɛnuɑ kɑ ɡɑmbobɑ sɑnɑm mɛ ɡɑ yɑrimɑ tem nukurun di. N ǹ nɛ?

⁹Nɑ ɡuru wiru kuɑ ɡen bekuru, mɑ nɑ ɡu yɑm wɔ̃kuru wukiri.

¹⁰Nɑ ɡu woodɑ wɛ̃ nɑ nɛɛ, ɡu yɔ̃ro mini. Mɑ nɑ ɡu ɡɑmbobɑ kɑ kɔkɔrɔbɑ dokeɑ.

¹¹Nɑ ɡu sɔ̃ɔwɑ nɑ nɛɛ, ɡu nɑ sere mini, kpɑ ɡu yɔ̃rɑ ɡu ku sɑrɑ. Miniwɑ ɡen nim kurenun dɑm mu koo yɔ̃rɑ.

¹²Sɑɑ mìn di ɑ wɑ̃ɑ, ɑ sɔ̃ɔ sɔ̃ɔre u yɑrio bururu,

¹³kpɑ u yɑrimɑ u dɑ hɑnduniɑn ɡoonu nnɛ sɔɔ, u nuku kɔ̃suruɡibu terɑsiɑ ben kuku yenun di,

¹⁴kpɑ tem kpuro mu kɔsi nɡe sɔndu te bɑ yĩreru doke, kpɑ tɑ n sɑ̃ɑ nɡe wi u yɑbe burɑru sebuɑ?

¹⁵Adɑmɑ nuku kɔ̃suruɡibu bɑ ǹ yɑm bururɑm kĩ, domi mu yinɑmɔ bu ben kom kɔ̃sum ko.

¹⁶Yoobu, ɑ bɔsum dɑɑre sere mi nim wɔ̃kun nɔnu ɡɑ wɑ̃ɑ? A dɑɑre sere ɡen temɔ?

¹⁷Bɑ nun ɡɔribun wɑ̃ɑ yeru sɔ̃ɔsire? A ten kɔnnɔ wɑɑre?

¹⁸A hɑnduniɑn kpɑ̃ɑru lɑɑkɑri koore? A mɑn sɔ̃ɔwɔ ɑ̀ n ye kpuro yɛ̃.

¹⁹Mɑnɑ swɑɑ wɑ̃ɑ ye yɑ dɔɔ yɑm bururɑm ɡiɑ. Mɑnɑ yɑm wɔ̃kuru tɑ ten wɑ̃ɑ yeru mɔ.

²⁰À n yen swɛɛ yɛ̃n nɑ, ɑ ǹ kɑɑ dɑ mi?

²¹Kɑɑ n ye kpuro yɛ̃, domi bɑ nun mɑrɑ n tɛ.

²²A dɑɑre sere mi nim mu rɑ ɡɔsie nɡe kperu? A wɑ mi ɡuru kpenu nu rɑ n wɑ̃ɑ?

²³Nɑ nu yiiwɑ sɑɑ ɡɑɑn sɔ̃, yè sɔɔ tɔmbu bɑ koo nuki sɑnkirɑ tɑbun sɔ̃.

²⁴A yɛ̃ mìn di yɑm bururɑm mu rɑ nɛ? A mɑɑ yɛ̃ mìn di sɔ̃ɔ yɑri yerun woo ɡɑ rɑ nɛ?

²⁵Wɑrɑ u ɡurɑ swɑɑ yɑbɑ. Wɑrɑ u ɡuru mɑɑkinu kɑ ɡuru kukiribun swɑɑ yi yi.

²⁶Wɑrɑ u rɑ de ɡurɑ yu nɛ ɡbɑburɔ, tem mi ɡoo sɑri,

²⁷kpɑ yu tem mi n dɑɑ ɡbere yɛmiɑsiɑ, kpɑ yɑkɑsu su kpi.

²⁸Gurɑ yɑ tundo mɔ ro? Wɑrɑ u kɑkoru mɑrɑ.

²⁹Mɑn diyɑ ɡuru kpenu nu rɑ yɑri.

³⁰Wɑrɑ u rɑ nim bɔbiɑsie wɔllɔ nɡe kperu, kpɑ u nim wɔ̃kun wɔllɔ ko nɡe kpee bɑkɑru.

³¹Kɑɑ kpĩ ɑ wɔllun kperi swɑɑru bwese bwesekɑ bɔke, kpɑ ɑ mɑɑ yi kusiɑ?

³²Wunɑ ɑ rɑ de wɔllun kperi bwese bwesekɑ yi yɑri yin sɑɑ sɔɔ, kpɑ ɑ yin wuunu kpɑrɑ?

³³A yɛ̃ nɡe mɛ wɔllɑ kɑ sĩisinɑmɔ? Kɑɑ kpĩ ɑ kɑ ten woodɑbɑ sɔmburu ko tem sɔɔ?

³⁴Wunɑ ɑ rɑ nɔɔɡiru sue ɑ ɡuru wiru soku, kpɑ ɡurɑ yu kɑ nɛ yu nun so?

³⁵Wunɑ ɑ rɑ ɡuru mɑɑkinu koosie? À n nu koosiɑ, nu rɑ nɛ wunɛn mi nu nɛɛ, nu sɔɔru kpɑ, kpɑ nu mɑɑkinu ko?

³⁶Wɑrɑ u tɔnun ɡɔ̃ruɔ lɑɑkɑri doke. Wɑrɑ u tɔnu bwisi wɛ̃.

³⁷Wɑrɑ kɑ win bwisi kpuro, u koo kpĩ u ɡuru winu ɡɑri, kpɑ u nu sikɑsiɑ ɡurɑ yu nɛ,

³⁸kpɑ ɡurɑ ye, yu yɑnim ɡurɑ yu subu, kpɑ yu tem kusɑnu mɔnsinɑ.

³⁹Yinni Gusunɔ u mɑɑ nɛɛ, Yoobu, wunɑ ɑ rɑ ɡbee sunɔ ɡen dĩɑnu kɑsue, kpɑ ɑ ɡen binun ɡɔ̃ɔru kpeesiɑ

⁴⁰sɑnɑm mɛ nu kpĩ nin wɑ̃ɑ yerɔ nu yɑɑ mɑrɑ?

⁴¹Wɑrɑ u rɑ ɡunɔ bɑkeru ten dĩɑnu wɛ̃ sɑnɑm mɛ ten binu nu nɔɔ sue nɛn mi ɡiɑ, ǹ kun mɛ, nù n bɔsu nu dĩɑnu kɑsu.