Read bariba Yoobu 5 Bible Online

Yoobu 5 - bariba bible

Yoobu 5

¹Yoobu, ɑ kuuki koowo, ɡoo ù n koo re nun wisi. Nɡe Gusunɔn ɡɔrɑdo wɑrɑ kɑɑ soku kpɑ u nɑ u nun wurɑri.

²Gɑri bɔkɔ u rɑ ɡbiwɑ win mɔrun sɔ̃. Bwisi sɑriruɡii u rɑ ɡbiwɑ win nisinun sɔ̃.

³Nɑ ɡɑri bɔkɔ wɑ u kuurɑ. Mɑ nɑ wɑ win wɑ̃ɑ yerɑ wɔriki.

⁴Mɑ win bibɑ fɑɑbɑn swɑɑ deri. Goo sɑri wi u koo bu wɔrɑ siri yerɔ.

⁵Tɔn tukobɑ koo win dĩɑ ni u ɡɑ̃ kɑtɑ ko bu ɡurɑ, bɑɑ kɑ ni u kɑrɑ koosi kɑ sɑ̃ki. Kpɑ be bɑ win dukiɑn binɛ mɔ bu ye suɑ bu kɑ doonɑ.

⁶Wɑhɑlɑ ku rɑ yɑri sɑɑ tuɑn di. Mɛyɑ nɔni swɑ̃ɑrɑ ku rɑ mɑɑ kpi sɑɑ tem di.

⁷Adɑmɑ wi bɑ mɑrɑ kpuro u koo wɑhɑlɑ kowɑ, nɡe mɛ bɑ̀ n dɔ̃ɔ wure, dɔ̃ɔ buri yi rɑ yɔ̃.

⁸Adɑmɑ nɛ Elifɑsi, ǹ n nɛn sɔ̃n nɑ, Gusunɔwɑ kon somiru kɑnɑ. Kpɑ n nùn nɛn wɑhɑlɑ kpuro sɔ̃.

⁹U rɑ ɡɑ̃ɑ bɑkɑnu kowɑ ni tɔnu kun kpɛ̃ u ɡiɑ. U rɑ mɑɑmɑɑki dɑbinu ko.

¹⁰U rɑ de ɡurɑ yu nɛ tem sɔɔ, kpɑ ɡbeɑ yu nim wɑ.

¹¹U rɑ be bɑ tii kɑwe wɔlle sue, kpɑ u be bɑ nuki sɑnkire yɑrɑ ben nuku sɑnkirɑrun di.

¹²U rɑ be bɑ bwisi kɔ̃si mɔn himbɑ kɑm koosie, kpɑ bu ku mɑɑ kpĩ bu ye yibiɑ.

¹³U rɑ dewɑ bwisiɡibun tiin bwisi yi bu yinɑ mwɑ, kpɑ ben wesiɑnɔ ɡu ko kɑm.

¹⁴Ben mi, sɔ̃ɔ sɔɔ ɡbɑ̃ɑrɑ yɑ rɑ n bu sɑ̃ɑwɛwɑ yɑm wɔ̃kuru, kpɑ bɑ n bɑbi.

¹⁵Adɑmɑ Gusunɔ u rɑ dɑm sɑriruɡii ɡɑnɛ ben tɑbu yɑ̃nun di, kpɑ u nùn wɔrɑ ben nɔmɑn di.

¹⁶Nɡe mɛyɑ u rɑ dɑm sɑriruɡii wi yĩiyɔbu wɛ̃, kpɑ u durumɡiin nɔɔ kɔre.

¹⁷Domɑruɡiiwɑ wi Gusunɔ Dɑm kpuroɡii u sɛɛyɑsiɑmɔ. Yen sɔ̃, Yoobu, ɑ ku yinɑ ù n nun sɛɛyɑsiɑmɔ.

¹⁸Domi wiyɑ u rɑ tɔnu mɛɛrɑ ko, kpɑ u yɛ̃ron bosu nɔɔri. Wiyɑ u rɑ tɔnu kɔsuku, kpɑ u nùn bɛkiɑ.

¹⁹Nɔn dɑbinu u koo nun yɑrɑ nuku sɑnkirɑrun di, kpɑ kɔ̃sɑ ɡɑɑ yu ku mɑɑ nun deemɑ.

²⁰Gɔ̃ɔru tɑ̀ n duɑ tem sɔɔ, u koo nun ɡɔɔ ɡbɑrɑri, kpɑ u nun fɑɑbɑ ko tɑbu sɔɔ.

²¹U koo nun bɔ̃ri ɡbɑrɑ. Sɑnɑm mɛ yibɛrɛbɑ bɑ koo tem kɑm koosiɑ, u koo nun wɔrɑ.

²²Kpɑ ɑ n yɛ̃ɛmɔ ɡɔ̃ɔrun sɑɑ sɔɔ, kɑ sɑnɑm mɛ bɑ tem kɑm koosiɑmɔ. A ǹ kɑɑ n mɑɑ yɑɑ ɡɔbɑ ɡɑɑn bɛrum mɔ.

²³A ǹ mɑɑ ɑsɔrɔ wɑsi wunɛn ɡberɔ. Domi bɑ ǹ tu kpenu suremɔ. Yɛɛ ɡɔbi kun mɑɑ duɔ mi.

²⁴Kɑɑ n bɔri yɛndu mɔwɑ wunɛn yɛnuɔ. Kpɑ wunɛn sɑbenun ɡɔ̃ɔ ɡɑ n yibɑ bɑɑdommɑ.

²⁵Mɛyɑ mɑɑ wunɛn bibun bweseru tɑ koo kpɛ̃ɑ kpɑ tu kɔwɑrɑ nɡe yɑkɑ bii.

²⁶Tɔkɔru sɔɔrɑ kɑɑ ɡbi nɡe mɛ bɑ rɑ dobi ɡɛ̃ yen sɑɑ yɑ̀ n turɑ.

²⁷Gɑ̃ɑ niniwɑ sɑ ɡiɑ bɛsɛn wɑ̃ɑru sɔɔ. Nu mɑɑ sɑ̃ɑwɑ ɡem. Yen sɔ̃, ɑ nu bwisikuo, kpɑ ɑ nu mwɑ wunɛn tiin sɔ̃.