Read bariba Yoobu 8 Bible Online

Yoobu 8 - bariba bible

Yoobu 8

¹Bilidɑ Suɑɡii u ɡɑri ɡeruɑ u nɛɛ,

²sere sɑɑ yerɑ̀ kɑɑ ɡɑri sɑɑri nini mɑri. Wunɛn ɡɑri yi, yi dɑm mɔ nɡe woo bɔkɔ.

³A tɑmɑɑ Gusunɔ Dɑm kpuroɡii u rɑ ɡem ɡɔsie weesu?

⁴A n yɛ̃ mɑ wunɛn bibu bɑ Gusunɔ torɑriwɑ, yen sɔ̃nɑ u bu ten ɑre wɛ̃.

⁵Adɑmɑ wunɛ, ɑ̀ n Gusunɔ Dɑm kpuroɡii kɑsu, mɑ ɑ win durom bikiɑ,

⁶mɑ u ǹ tɑɑrɛ ɡɑɑ wɑ wunɛ sɔɔ, sɑɑ yerɑ u koo nun nɔɔri, kpɑ u nun nuku dobu wesiɑ nɡe mɛ wunɛn ɡem mu nɛ.

⁷Kpɑ wunɛn tɛ̃n wɑ̃ɑru tu wɛ̃rɑ tu yelluɡiru kerɑ.

⁸Tɛ̃, ɑ bikio be bɑ sun ɡbiiyen mi, kpɑ ɑ lɑɑkɑri ko ɑ wɑ wɑhɑlɑ ye ben sikɑdobɑ bɑ kuɑ.

⁹Bɛsɛ, sɑ sɑ̃ɑwɑ be bɑ mɑrɑ ɡin tee te, sɑ ǹ ɡɑ̃ɑnu yɛ̃. Bɛsɛn wɑ̃ɑru tɑ sɑ̃ɑwɑ nɡe sɑɑru hɑnduniɑ yeni sɔɔ.

¹⁰Adɑmɑ ɑ de bu nun keu ko. Kpɑ ɑ swɑɑ dɑki ye bɑ koo nun sɔ̃.

¹¹Gbĩi yi koo kpi mi dɑɑrɑ kun wɑ̃ɑ? Nɑɑ yɑri yi koo kpi mi nim sɑri?

¹²Yì n nim biɑ, bɑɑ bɑ̀ kun yi bure yi rɑ ɡberewɑ fuuku n kere yɑkɑ si su tie.

¹³Nɡe mɛyɑ be bɑ Gusunɔ duɑri bɑ koo ko, kpɑ tɔn kɔ̃sobun yĩiyɔbu bu kɑm ko.

¹⁴Ben yĩiyɔbu bu koo nɔru ko, kpɑ yè sɔɔ bɑ tɑ̃sɑ yu ko nɡe nɑrɑn wɛ̃ɛ.

¹⁵Bɑ̀ n ben dirun ɡɑnɑ nɛnuɑ, yɑ koo diiriwɑ. Bɑ̀ n ye tɑ̃sɑ, kpɑ yu wɔri.

¹⁶Bɑ ko n sɑ̃ɑwɑ nɡe dɑ̃ɑ beku te tɑ yɔ̃ sɔ̃ɔ sɔɔ, mɑ ten kɑ̃ɑsi tɛriɑ mi bɑ tu duurɑ.

¹⁷Tɑ rɑ ten ɡbini ɡire kpenun sɔɔwɔ, kpɑ ɡbini yi, yi bɔsu yi wɑ ye n wɑ̃ɑ mi.

¹⁸Bɑ̀ n tu wukɑ min di, kpɑ yɑm mi, mu tu siki mu nɛɛ, mu ǹ dɑɑ tu yɛ̃.

¹⁹Kpɑ ɡɑru tu kpi ten ɑyerɔ. Nɡe mɛyɑ tɔn kɔ̃sobun nuku dobu bu ko n sɑ̃ɑ.

²⁰Gusunɔ u ku rɑ ɡemɡii biru kisi. Mɛyɑ u ku rɑ mɑɑ tɔn kɔ̃so somi.

²¹U koo de ɑ yɛ̃ɛri, kpɑ ɑ nuku dobun kuuki ko.

²²Wunɛn yibɛrɛbɑ bɑ koo sekuru wɑ, kpɑ tɔn kɔ̃sobun yɛnu ɡu ɡbi.