Read bariba Yoobu 9 Bible Online

Yoobu 9 - bariba bible

Yoobu 9

¹Yoobu u ɡɑri suɑ u nɛɛ,

²nɑ yɛ̃ mɛ. Amɔnɑ tɔnu u ko n dɛɛre Gusunɔn wuswɑɑɔ.

³Gusunɔ ù n tɔnu ɡɑri konu nɔrɔbu (1.000) bikiɑ, u ǹ wɑsi u wisi bɑɑ tiɑ.

⁴Wiyɑ u bwisi kɑ dɑm kpuro mɔ. Wɑrɑ u koo nùn seesi kpɑ yɛ̃ron wɑ̃ɑru tu dɑkɑɑ dɑ.

⁵U rɑ ɡuunu yiiye subɑru sɔɔ, kpɑ u nu suriri kɑ mɔru.

⁶U rɑ de tem mu yĩiri sere mɛn sɔɔwɔ, kpɑ mɛn ɡberebɑ bu wɔruku.

⁷U rɑ sɔ̃ɔ woodɑ wɛ̃ u ku yɑri, kpɑ u win yĩreru doke kperi sɔɔ.

⁸Wi turowɑ u wɔllu tɛriɑ. Mɑ u sĩimɔ nim kurenun wɔllɔ.

⁹Wiyɑ u kperi bwese bwesekɑ tɑkɑ kuɑ, kɑ kperi swɑɑnu, kɑ kperi yi yi wɑ̃ɑ sɔ̃ɔ yɛ̃sɑn nɔm dwɑru ɡiɑ.

¹⁰U rɑ sɔm bɑkɑnu ko ni bɑ ǹ kpɛ̃ bu tubu. U rɑ sɔm mɑɑmɑɑkiɡinu ko dɑbi dɑbinu.

¹¹Bɑɑ ù n doonɔ nɛn bɔkun di, nɑ ǹ nùn wɑsi. Ù n mɑɑ sɑrɔ, nɑ ǹ tubu.

¹²Ye u nɛnuɑ, wɑrɑ u koo nùn ye wɔrɑri. Wɑrɑ u koo kpĩ u nùn sɔ̃ u nɛɛ, mbɑ ɑ mɔ̀ mɛ.

¹³Gusunɔ ù n win mɔru seewɑ u ku rɑ ye yɔ̃rɑsie. Win nɑɑsun temɔwɑ u rɑ yɑɑ ɡɔbɑ ye bɑ mɔ̀ Rɑhɑbun dɑm tɑɑre.

¹⁴Nɛ mɑɑ ni, ɑmɔnɑ kon nùn wisi. Gɑri yirɑ̀ kon ɡere win wuswɑɑɔ.

¹⁵Bɑɑ nɑ̀ n ɡem mɔ, nɑ ǹ kpɛ̃ n nùn ɡɑ̃ɑnu wisi, wi, wi u sɑ̃ɑ nɛn siri kowo. Suuruwɑ kon nùn kɑnɑ kɑ bɛɛrɛ.

¹⁶Bɑɑ nɑ̀ n nùn kɑnɑ mɑ u mɑn wisɑ, kɑ mɛ, nɑ ǹ nɑɑnɛ mɔ̀ n nɛɛ, u nɛn nɔɔ nuɑ.

¹⁷Domi u mɑn wɔri nɡe woo ɡunɑ. Mɑ u mɑn mɛɛrɑ dɑbinu kuɑ kɑm, nɑ ǹ ɡɑ̃ɑnu kue.

¹⁸U ku rɑ de n wɛ̃siɑ, mɑ u derɑ nɛn wɑ̃ɑrɑ sosiɑ.

¹⁹Ǹ n dɑm ɡɑrin nɑ, wiyɑ u dɑm kpuro mɔ. Ǹ n mɑɑ siribun ɡɑrin nɑ, wɑrɑ u koo kpĩ u nùn siribu soku.

²⁰Bɑɑ nɑ̀ n ɡem mɔ, kɑ mɛ, nɛn ɡere yɑ koo mɑn tɑɑrɛ wɛ̃. Bɑɑ nɑ̀ kun tɑɑrɛ mɔ, u koo mɑn sɔ̃ɔsi mɑ nɑ sɑ̃ɑ durumɡii.

²¹Bɑɑ mɛ nɑ ǹ tɑɑrɛ ɡɑɑ mɔ, nɛn wɑ̃ɑrɑ kun mɑn nɛni, nɑ tu tusɑ.

²²Kon kpĩ n ɡere n nɛɛ, ɡɑ̃ɑnu kpuro nu sɑ̃ɑwɑ tiɑ Gusunɔn mi. Domi u rɑ tɔn kɔ̃so kɑ tɑɑrɛ sɑriruɡii kpeerɑsie.

²³Bɑrɑru ɡɑru tɑ̀ n tɑɑrɛ sɑriruɡii wɔri subɑru sɔɔ, tɑ ɡo, Yinni Gusunɔ u rɑ n nùn yɛ̃ɛmɔwɑ nɔni swɑ̃ɑ te u wɑn sɔ̃.

²⁴Tem mù n wɔri tɔn kɔ̃son nɔmuɔ, Yinni Gusunɔ u rɑ mɛn kpɑrobu wɔ̃koru kpɛ̃ɛwɑ. Mɑ n kun wi, wɑrɑ u koo ye ko.

²⁵Wee, nɑ ǹ doo nɔɔru wɑ, mɑ sere nɛn wɑ̃ɑrun tɔ̃rɑ doonɔ fuuku nɡe wi u dukɑ mɔ̀.

²⁶Tɑ sɑrɑmɔ nɡe ɡoo nimkuu si bɑ kuɑ kɑ ɡbĩi, ǹ kun mɛ nɡe ɡunɔ bɑkeru te tɑ sɑrɑm wee tu yɑɑ so.

²⁷Nɑ̀ n nɛɛ, kon nɛn weeweenu deri n nɛn wuswɑɑ dɛɛrɑsiɑ, kpɑ nɑ n nuku dobu mɔ,

²⁸nɑ rɑ nɑndewɑ nɛn wɑhɑlɑ yeni kpuron sɔ̃. Domi nɑ yɛ̃ mɑ Yinni Gusunɔ kun mɑn ɡem wɛ̃ɛmɔ.

²⁹Bɑɑ ǹ n mɛren nɑ, nɑ sɑ̃ɑwɑ tɑɑrɛɡii win mi. Mbɑn sɔ̃nɑ ko nɑ n mɑɑ nùn sɔ̃ɔsimɔ mɑ nɑ dɛɛre.

³⁰Bɑɑ nɑ̀ n woburɑ kɑ ɡuru kpenun nim, kpɑ n niɑ kɑ werem,

³¹kɑ mɛ, u koo mɑn surewɑ pɔtɔkɔ sɔɔ, kpɑ nɛn yɑ̃nun nuburu tu mɑn bwɛ̃rɑ yɔ̃.

³²Wee Gusunɔ kun sɑ̃ɑ tɔnu nɡe nɛ, n sere nùn sɔ̃ n nɛɛ, su dɑ siri yerɔ bu sun siriɑ.

³³Goo ù n dɑɑ wɑ̃ɑ wi u koo du bɛsɛn suunu sɔɔ u sun yɑkiɑnɑ,

³⁴Gusunɔ u koo rɑɑ win bokuru yi te u kɑ mɑn soomɔ, kpɑ u de nɔni swɑ̃ɑ te nɑ wɑɑmɔ mi, tu kpe.

³⁵Sɑɑ ye sɔɔ, nɑ ǹ mɑɑ bɛrum mɔ̀ n kɑ nùn ɡɑri ko. Adɑmɑ n ǹ sɑ̃ɑ mɛ.