Read bariba Womusu 10 Bible Online

Womusu 10 - bariba bible

Womusu 10

¹Yinni Gusunɔ, sɑ nɔni sɔ̃ɔre. Mbɑn sɔ̃nɑ ɑ kɑ sun tomɑ. Mbɑn sɔ̃nɑ ɑ kukuɑ.

²A mɛɛrio nɡe mɛ tɔn kɔ̃sobɑ tii sue. Bɑ yɑ̃ɑrobu nɔni sɔ̃ɔmɔ bɛrum sɑriru sɔɔ. Bɑ bu kɔkirimɔ bɑ suremɔ ben yinɑ sɔɔ.

³Tɔn kɔ̃sobɑ woo kɑnɑmɔ. Ye ben ɡɔ̃ru ɡɑ binɛ sɑ̃ɑ, yerɑ bɑ rɑ kɑsu. Bɑ̀ n ye wɑ, kpɑ bu Gusunɔ wɔmɛ bu nùn yɑɑkoru koosi.

⁴Ben tii suɑbu sɔɔ, bɑ rɑ nɛɛ, Gusunɔ sɑri, u ǹ bikiɑmɔ ye bɑ mɔ̀.

⁵Ye bɑ niɑ sɑ̃ɑ, yɑ rɑ koorewɑ. Bɑ ǹ kpɛ̃ bu Gusunɔn siribu tubu. Bɑ rɑ ben yibɛrɛbɑ yɑ̃ɑtɑm siewɑ.

⁶Kpɑ bu tii sɔ̃ bu nɛɛ, bɑ ǹ wɔrumɑmɔ pɑi! Kɔ̃sɑ ɡɑɑ kun bu deemɑmɔ.

⁷Bɔ̃ri kɑ weesu kɑ ɡɑri kɔ̃siyɑ yi rɑ n yibɑ ben nɔsɔ. Kɔ̃sɑ ben yɑrɑ yɑ rɑ n wuuwɑ.

⁸Wuun biruɔrɑ bɑ rɑ n kukuɑ. Miyɑ bɑ rɑ n tɔmbu yɔɔru bwɛ̃ɛyɛ. Tɑɑrɛ sɑriruɡii ɡoo ù n yɑrɑ, bu nùn sɛ̃re bu ɡo. Dɑm sɑriruɡii ù n yɑrimɑ, bu nùn mwɑ bu ɡo.

⁹Bɑ rɑ n kukuɑwɑ nɡe ɡbee sunɔ ɡe ɡɑ yɑɑ mɑrɑ. Bɑ̀ n dɑm sɑriruɡii mwɑ ben yinɑ sɔɔ, kpɑ bu nùn ɡɑwɑ bu kɑ doonɑ,

¹⁰kpɑ bu nùn sɛ̃suku bu ɡo. Ben dɑm bɑkɑm mu nùn kɑmiɑ.

¹¹Bɑ rɑ tii sɔ̃wɑ bu nɛɛ, Gusunɔ kun ben ɡɑri mɔ̀. U ku rɑ mɛɛri ye bɑ mɔ̀.

¹²Yinni Gusunɔ, ɑ seewo, ɑ ku be bɑ nɔni sɔ̃ɔre duɑri, ɑ bu somiɔ.

¹³Mbɑn sɔ̃nɑ kɑɑ de tɔn kɔ̃sobu bu nun wɔmɛ bu nɛɛ, ɑ ku rɑ bu sɛɛyɑsie.

¹⁴Yinni Gusunɔ, ɑ rɑ n yɛ̃ nɔni swɑ̃ɑ te tɔmbɑ mɔ hɑnduniɑ sɔɔ. A rɑ bu somi. A rɑ mɑɑ ɡobekubɑ nɔɔri. Yen sɔ̃nɑ bɑ rɑ nun tii wɛ̃.

¹⁵A tɔn kɔ̃son dɑm buo, ɑ nùn win kɔ̃sɑ kɔsieyo. Kpɑ win nuku kɔ̃suru tu kpe mɑm mɑm.

¹⁶Yinni Gusunɔ, wunɑ ɑ sɑ̃ɑ sinɑ boko sere kɑ bɑɑdommɑɔ. Kɑɑ be bɑ ǹ nun sɑ̃ɑmɔ ɡirɑ wunɛn tem di.

¹⁷Yinni Gusunɔ, ɑ kɑnɑ nini swɑɑ dɑkio. Wɔnwɔndo ù n nun kɑnɑ, ɑ nùn dɑm kɛ̃ɛyɔ. Be bɑ dɑm dɔremɔ, bɑ̀ n nun sokɑ, ɑ bu wɔro. Be bɑ ɡobekubɑ dɑm dɔremɔ, ɑ bu sirio, kpɑ ɡoo u ku mɑɑ de bɑ n win bɛrum mɔ.