Read bariba Womusu 104 Bible Online

Womusu 104 - bariba bible

Womusu 104

¹Yinni Gusunɔ, kon nun siɑrɑ. Gusunɔ nɛn Yinni, ɑ kpɑ̃, ɑ ǹ nɔru mɔ. Yɑm bururɑm kɑ yiiko yɑ nun wukiri.

²A rɑ tii yɑm bururɑm wukiri nɡe bekuru. A rɑ wɔllu tɛrie nɡe beku bɑkɑru.

³Wunɛn wɑ̃ɑ yerɑ wɑ̃ɑ sere wɔllun nim wɔllɔ. Mɑ ɡuru wirɑ sɑ̃ɑ wunɛn tɑbu kɛkɛ. Mɑ ɑ bɛllimɔ wom wɔllɔ.

⁴Mɑ ɑ woo kuɑ wunɛn ɡɔro. Mɑ ɡuru mɑɑkinu kuɑ wunɛn sɔm kowobu.

⁵A tem swĩi mɛn kpɛɛkpɛɛku wɔllɔ. Mu ǹ wɔrumɑmɔ sere kɑ bɑɑdommɑɔ.

⁶A derɑ nim mu mɛ wukiri sere kɑ ɡuunɔ nɡe beku bɑkɑru.

⁷Adɑmɑ ye ɑ nim mɛ nɑruɑ, mɑ mu doonɑ. Ye mu wunɛn ɡbɑ̃sukubu nuɑ, mu dukɑ suɑ,

⁸mu sɑrɑ ɡuunun di, mu dɑ wɔwi sɔɔ sere mi ɑ mu ɑyeru kuɑ.

⁹A nim mɛ yɔ̃rɑ yeru kuɑ mu ku rɑɑ kɑ sɑrɑ mu mɑɑ tem wukiri.

¹⁰Wunɑ ɑ bwiin nim kpɑre mɛ mu kokumɔ ɡuunun bɑɑ sɔɔ.

¹¹Miyɑ ɡbeeku yɛɛ kɑ ɡbeeku kɛtɛkunu nu rɑ nɛ nu nim nɔ.

¹²Yen bɔkuɔrɑ ɡunɔsu su sin sokunu mɔ. Mɑ su wɑ̃ɑ dɑ̃ɑ kikisɔ su swĩi dori mɔ̀.

¹³Sɑɑ wɔllun di, ɑ rɑ de ɡurɑ yu ɡuunu swee, kpɑ tem mu wunɛn sɔmɑn ɑre di.

¹⁴Kpɑ ɑ de yɑkɑsu su kpi yɑɑ sɑbenun sɔ̃ kɑ dĩɑ ni tɔnu u koo din sɔ̃.

¹⁵Kpɑ bu tɑm wɑ bɑ n kɑ nuku dobu mɔ̀. Kpɑ bu ɡum wɑ ben wɑsi yi n kɑ wɑ̃. Kpɑ bu dĩɑnu wɑ ben wɑsi yi n kɑ dɑm mɔ.

¹⁶Bɑɑ kɑ dɑ̃ɑ koo bɑkɑnɔ, nu rɑ nim wɑ mɛ̀n bukɑtɑ nu mɔ nɡe dɑ̃ɑ ye bɑ mɔ̀ sɛduru ye yɑ wɑ̃ɑ Libɑniɔ.

¹⁷Miyɑ ɡunɔsu su rɑ nɛ su sin sokunu ko. Miyɑ kpɑkpɑyɛ ɡbeeku ɡɑ rɑ ɡen wɑ̃ɑ yeru ko.

¹⁸Guu ni nu ɡunu nu kuɑ kpee bɛrɑn wɑ̃ɑ yeru. Mɑ kpee bɑɑ mɑɑ kuɑ yɑɑ ye bɑ mɔ̀ dɑmɑɑn [4] wɑ̃ɑ yeru.

¹⁹Yinni Gusunɔ, wunɑ ɑ suru kuɑ ɑ kɑ sɑɑbɑ wunɑnɑ. Sɔ̃ɔ u yɛ̃ sɑɑ ye u koo kpunɑ.

²⁰Yɑm wɔ̃kuru tɑ̀ n tunumɑ, yɑm tĩrɑwɑ mi. Sɑɑ ye sɔɔrɑ ɡbeeku yɛɛ yi rɑ bɔsum se.

²¹Gbee sinɑn piiminu nù n yɑɑ wɑ, nu rɑ kukiriwɑ nu kɑ nun nin dĩɑnu bikiɑ.

²²Sɔ̃ɔ ù n yɑrɑ, nu rɑ wurewɑ nin wɑ̃ɑ yerɔ nu kpunɑ.

²³Kpɑ tɔnu u mɑɑ yɑri u dɑ u win sɔmburu ko sere sɔ̃ɔ u kɑ du.

²⁴Yinni Gusunɔ, wunɛn sɔmɑ yɑ dɑbi. A ye kpuro kuɑ kɑ lɑɑkɑri. Wunɛn tɑkɑ koorɑ yɑ wɑ̃ɑ tem sɔɔ kpuro.

²⁵Wee nim wɔ̃ku ɡɑ kpɑ̃, ɡɑ mɑɑ yɑsu. Ge sɔɔrɑ yɛɛ dɑbi dɑbinu wɑ̃ɑ, bɑkɑ kɑ buu.

²⁶Gen wɔllɔwɑ ɡoo nimkusu su sĩimɔ. Miyɑ ɑ derɑ yɑɑ bɑkɑ yɑ wɑ̃ɑ yɑ dweemɔ ɡen nim kurenu sɔɔ.

²⁷Yɛɛ kpuro, wunɛ turowɑ yi mɛɛrɑ yi kɑ yin dĩɑnu wɑ nin sɑɑ sɔɔ.

²⁸À n yi wɛ̃ kpɑ yi mwɑ. À n yi yɔ̃suɑ kpɑ yi debu.

²⁹À n yi biru kisi, yi rɑ nɑndewɑ. À n yi wɛ̃siɑru wunɑri, yi ɡuwɑ mi, kpɑ yi ɡɔsiɑ tem.

³⁰À n mɑɑ yi wɛ̃siɑru wɛ̃, yi rɑ sewɑ kpɑ tem mu wurɑmɑ nɡe yellu.

³¹Yinni Gusunɔ, wunɛn yiiko yu dɑkɑɑ dɑ. Kpɑ ɑ n nuku dobu mɔ ye ɑ kuɑn sɔ̃.

³²À n tem mɛɛrɑ, mu rɑ yĩiriwɑ. À n mɑɑ ɡuunu bɑbɑ, wiisɑ su rɑ yɑri.

³³Kon Gusunɔ nɛn Yinni womu kuɑ nɛn wɑ̃ɑrun tɔ̃ru kpuro sɔɔ. Kon nùn tɔmɑ sere kɑ nɛn ɡɔɔn tɔ̃rɔ.

³⁴Yinni Gusunɔ, ɑ de nɛn ɡɑri yi nun dore. Nɑ kĩ n nuku dobu ko wunɛ sɔɔ.

³⁵Durumɡibu bu ɡbio, kpɑ bɑ kun mɑɑ wɑ̃ɑ tem mɛ sɔɔ. Nɑ Yinni Gusunɔ siɑrɑ kɑ nɛn ɡɔ̃ru kpuro. I Yinni Gusunɔ siɑro.