Read bariba Womusu 105 Bible Online

Womusu 105 - bariba bible

Womusu 105

¹I Yinni Gusunɔ siɑro. I win yĩsiru sokuo. I win ɡeɑ ye u kuɑ kpɑro.

²I nùn womu kuo. I win sɔm mɑɑmɑɑkiɡinu kpɑro.

³I nuki doro wi, Yinni Gusunɔn yĩsi dɛɛrɑrun sɔ̃. Be bɑ nùn kɑsu bu nukuru doro.

⁴I Yinni Gusunɔn dɑm kɑsuo. I kɑsuo i n kɑ nùn wɑ̃ɑ.

⁵Bɛɛ Aburɑhɑmu Gusunɔn sɔm kowon bweseru, bɛɛ Yɑkɔbun bweseru, bɛɛ be u ɡɔsɑ, i win sɔm mɑɑmɑɑkiɡii ni yɑɑyo. I siribu yɑɑyo bi u bɛɛ kuɑ.

⁷Wiyɑ Gusunɔ bɛsɛn Yinni wi u koo hɑnduniɑ kpuro siriɑ.

⁸U ku rɑ win ɑrukɑwɑni ye u kɑ tɔmbu bɔkuɑ duɑri sere kɑ bɑɑdommɑɔ. U rɑ n ye yɑɑyewɑ sere kɑ ben bibun bibun wɑɑtiɔ.

⁹Arukɑwɑni yerɑ u kɑ Aburɑhɑmu kɑ Isɑki bɔkuɑ.

¹⁰U kɑ Yɑkɔbu wi bɑ mɔ̀ Isireli ɑrukɑwɑni ye bɔkuɑ ye yɑ ko n wɑ̃ɑ sere kɑ bɑɑdommɑɔ.

¹¹U nɛɛ, kon nun Kɑnɑnin tem wɛ̃. Mɛyɑ mu ko n sɑ̃ɑ wunɛn tubi wunɛ kɑ wunɛn bibun bweseru.

¹²Sɑɑ ye sɔɔ, bɑ ǹ dɑbi. Bɑ sɑ̃ɑwɑ sɔbu mi.

¹³Bɑ rɑ n bɔsuwɑ tem kɑ tem sɔɔ. Bɑ̀ n dɑ bwese tenin mi, bu wurɑ teɔnɔn mi.

¹⁴Adɑmɑ Gusunɔ kun dere bweseru ɡɑru tu bu dɑm dɔre. U sinɑmbu sɛɛyɑsiɑwɑ ben sɔ̃.

¹⁵U nɛɛ, i ku be nɑ ɡɔsɑ bɑbɑ. I ku be, nɛn sɔmɔbu kɔ̃sɑ kuɑ.

¹⁶U derɑ ɡɔ̃ɔrɑ nɑ tem mɛ sɔɔ. Mɑ bɑ dĩɑnu biɑ bu di.

¹⁷Mɑ u derɑ ɡoo ɡbiɑ u dɑ tem mi ben sɔ̃. Wiyɑ Yosɛfu wi bɑ dɔrɑ nɡe yoo.

¹⁸Bɑ kɑ nùn yɔni bɔkuɑ nɑɑsɔ. Mɑ bɑ nùn sisun ɡɑndɑru dokeɑ wĩirɔ.

¹⁹Bɑ win lɑɑkɑri mɛɛrɑ sere yu kɑ koorɑ ye u rɑɑ ɡeruɑ.

²⁰Sɑɑ ye sɔɔrɑ sinɑ boko u woodɑ wɛ̃ u nɛɛ, bu nùn yɑrɑmɑ. Mɑ u derɑ bɑ nùn kusiɑ.

²¹Mɑ u nùn kuɑ win yɛnu kɑ win ye u mɔ kpuron wiruɡii,

²²kpɑ u wɑ u kɑ win sinɑ ɑsɑkpɔbu kpɑrɑ nɡe mɛ u kĩ. Kpɑ u sinɑ bokon bwisi kɛ̃ɔbu bwisi kɛ̃.

²³Sɑɑ yerɑ Yɑkɔbu kɑ wiɡibu bɑ nɑ bɑ sinɑ Eɡibitiɔ Kɑmun bweserun temɔ.

²⁴Mɑ Gusunɔ u derɑ bɑ mɑrurɑ too. Bɑ dɑm kuɑ bɑ ben yibɛrɛbɑ Eɡibitiɡibu kerɑ.

²⁵Mɑ u yibɛrɛ ben ɡɔ̃ru ɡɔsiɑ. Bɑ wi, Gusunɔn tɔn be tusɑ. Mɑ bɑ bu nɔni sɔ̃ɔwɑ be, be bɑ sɑ̃ɑ win sɔm kowobu mi.

²⁶Mɑ u Mɔwisi kɑ Aroni ɡɔsɑ bɑ kuɑ win sɔm kowobu, mɑ u bu ɡɔrɑ.

²⁷Mɑ bɑ mɑɑmɑɑki kuɑ kɑ win dɑm tɔn ben suunu sɔɔ Kɑmun tem mi.

²⁸U derɑ yɑm wɔ̃ku sinumɡiru tɑ nɑ. Kɑ mɛ, Eɡibitiɡii be, bɑ ǹ wi, Gusunɔn ɡere wure.

²⁹U ben nim ɡɔsiɑ yɛm mɑ swɛ̃ɛ kpuro yi ɡu.

³⁰U mɑɑ derɑ surenu nu yibɑ ben tem sɔɔ sere kɑ sinɑ bokon kpin yerɔ.

³¹U derɑ ɡbɑbu swɛ̃ɛ kɑ ɡɑɑnikunu nu nɑ ben tem kpuro sɔɔ.

³²Mɑ u derɑ ɡuru kpenu kɑ dɔ̃ɔ nɑ tem mɛ sɔɔ.

³³Mɑ yɑ ben dɑ̃ɑ ɡbɑɑnu kɑ dɑ̃ɑ ni nu tie ben tem mɛ sɔɔ kpuro kɑm koosiɑ.

³⁴Yen biru, u derɑ twee yi nɑ dɑbi dɑbinu.

³⁵Mɑ yi tem min yɑkɑsu kɑ mɛn ɡbeɑn dĩɑnu kpuro di.

³⁶U mɑɑ Eɡibitiɡibun bii ɡbiikobu ɡo, be, be bɑ mɑrɑ ben ɑluwɑɑsiru sɔɔ.

³⁷Mɑ u win tɔmbu yɑrɑ Eɡibitin di bɑ wurɑ kɑ sii ɡeesu wɑ bɑ sɔɔwɑ. Ben ɡoo kun mɑɑ sɑnum kpɑnɛ swɑɑ sɔɔ.

³⁸Sɑɑ ye sɔɔrɑ Eɡibitiɡibun nukurɑ dorɑ yèn sɔ̃ Isirelibɑ bɑ doonɑ. Domi bɑ rɑɑ ben bɛrum mɔ too.

³⁹Mɑ Gusunɔ u Isirelibɑ ɡuru wii wuronu wukiri, mɑ u bu yɑm bururɑsie wɔ̃kuru bu kɑ yɑm wɑ.

⁴⁰Ye bɑ turɑ ɡbɑburɔ, yerɑ bɑ Yinni Gusunɔ nɔɔɡiru sue bɑ dĩɑnu kɑnɑ, mɑ u bu kusunu wɛ̃. Mɛyɑ u derɑ pɛ̃ɛ yɑ nɑ wɔllun di bɑ di bɑ debɑ.

⁴¹U kperu wukiɑ mɑ nim mu kurɑmɑ mu tɛriɑ nɡe dɑɑru tem dirɑɔ.

⁴²Domi u win nɔɔ mwɛɛ dɛɛrɑ te yɑɑye te u win sɔm kowo Aburɑhɑmu kuɑ.

⁴³U win tɔn be u ɡɔsɑ yɑrɑ kɑ nuku dobu. Mɑ bɑ nuku dobun kuuki mɔ̀.

⁴⁴Mɑ u bu bwesenu ɡɑnun tem wɛ̃. Mɑ bɑ bwese nin ɡberun ɑre tubi di,

⁴⁵bu wɑ bu kɑ wi, Gusunɔn woodɑbɑ mɛm nɔɔwɑ. Ǹ n mɛn nɑ, i Yinni Gusunɔ siɑro!