Read bariba Womusu 106 Bible Online

Womusu 106 - bariba bible

Womusu 106

¹I Yinni Gusunɔ siɑro. I Yinni Gusunɔ siɑro, domi u sɑ̃ɑwɑ tɔn ɡeo. Win kĩru tɑ rɑ n wɑ̃ɑwɑ sere kɑ bɑɑdommɑɔ.

²Wɑrɑ u koo Yinni Gusunɔn sɔm mɑɑmɑɑkiɡinu ɡere. Wɑrɑ u koo kpĩ u nùn tɔmɑ u nɑɑmwɛ.

³Doo nɔɔruɡibɑ be bɑ win woodɑbɑ mɛm nɔɔwɛ. Doo nɔɔruɡibɑ be bɑ ɡem swĩi bɑɑdommɑ.

⁴Yinni Gusunɔ, ɑ mɑn yɑɑyo durom mɛ ɑ rɑ wunɛn tɔmbu kuen sɔ̃. A mɑn yɑɑyo kpɑ ɑ bu somi.

⁵Kpɑ n ben nuku dobu wɑ be, be ɑ ɡɔsɑ. Kpɑ n nuku dobu ko ben nuku doo bin sɔ̃. Kpɑ n yɛ̃ɛri kɑ be sɑnnu be, be bɑ sɑ̃ɑ wunɛn ɑrumɑni.

⁶Wee sɑ torɑ nɡe bɛsɛn bɑɑbɑbɑ, sɑ kɔ̃sɑ kuɑ.

⁷Sɑnɑm mɛ bɛsɛn sikɑdo be, bɑ wɑ̃ɑ Eɡibitiɔ, bɑ ǹ wunɛn sɔm mɑɑmɑɑkiɡii ni ɡɑrisi. Bɑ ǹ wunɛn durom mɛ yɑɑye mɛ ɑ bu sɔ̃ɔsi nɔn dɑbi dɑbinu. Mɑ bɑ nun seesi nim wɔ̃kuɔ ɡe bɑ mɔ̀ Nɑɑ yɑri.

⁸Adɑmɑ ɑ bu fɑɑbɑ kuɑ wunɛn yĩsirun sɔ̃, ɑ kɑ wunɛn dɑm sɔ̃ɔsi.

⁹A nim wɔ̃ku ɡe bɑ mɔ̀ Nɑɑ yɑri ɡbɑ̃re mɑ ɡɑ ɡberɑ. A derɑ bɑ sĩɑ ɡen suunu sɔɔ ɡbebum nɡe tem sɑɑrɑmɔ.

¹⁰A bu yɑkiɑ sɑɑ wi u bu tusɑn nɔmɑn di. A bu wɔrɑ yibɛrɛbɑn nɔmɑn di.

¹¹Nim mu ben yibɛrɛbɑ wukiri, bɑɑ ben turo u ǹ kisire.

¹²Mɑ bɑ wunɛ Yinni Gusunɔn ɡɑri nɑɑnɛ kuɑ. Mɑ bɑ nun siɑrɑmɔ kɑ womusu.

¹³Adɑmɑ mii mii, bɑ wunɛn sɔm mɑɑmɑɑkiɡii ni duɑri. Bɑ ǹ mɑɑ mɑrɑ ɑ wunɛn himbɑ yibiɑ.

¹⁴Ben binɛ yɑ seewɑ ɡbɑburɔ, mɑ bɑ wunɛ Gusunɔn lɑɑkɑri mɛɛrɑ mi.

¹⁵A bu yɑɑ wɛ̃ ye bɑ bikiɑ, mɑ bɑ di bɑ debɑ too.

¹⁶Yerɑ bɑ kɑ Mɔwisi kɑ Aroni wi bɑ yi nɛnɛm wunɛn sɔmburun sɔ̃ nisinu seewɑ sɑnsɑniɔ.

¹⁷Mɑ tem mu nɔɔ wukiɑ mu Dɑtɑni mwɛ. Mɑ mu mɑɑ Abirɑmu kɑ win tɔmbu wukiri.

¹⁸Dɔ̃ɔ u ben tɔmbu kpuro di. Dɔ̃ɔ yɑrɑ yɑ tɔn kɔ̃sobu di.

¹⁹Bɑ nɑɑ buu sii ɡɑnduɡuu kuɑ Horɛbuɔ. Mɑ bɑ yiirɑ bɑ ɡu sɑ̃wɑ.

²⁰Bɑ wunɛ Gusunɔ wi ɑ sɑ̃ɑ ben bɛɛrɛ kɔsinɑ kɑ kɛtɛ ye yɑ rɑ yɑkɑsu di.

²¹Bɑ wunɛ Gusunɔ ben fɑɑbɑ kowo duɑri, wunɛ wi ɑ bu ɡɑ̃ɑ bɑkɑnu kuɑ Eɡibitiɔ Kɑmun temɔ. A sɔm mɑɑmɑɑkiɡinu kuɑ mi. A sɔm mɑɑmɑɑkiɡinu kuɑ nim wɔ̃kuɔ ɡe bɑ mɔ̀ Nɑɑ yɑri.

²²

²³Yen biru, ɑ ɡɔ̃ru doke ɑ bu kpeerɑsiɑ. Adɑmɑ Mɔwisi wunɛn sɔm kowo u nun suuru kɑnɑ ɑ kɑ wunɛn mɔru suresiɑ, kpɑ ɑ ku mɑɑ bu kɑm koosiɑ.

²⁴Bɑ tem durom mɛ ɡɛmɑ. Bɑ ǹ wunɛ Yinni Gusunɔn ɡɑri nɑɑnɛ kue.

²⁵Bɑ wɔkiwɑ ben kunɔ. Bɑ ǹ wunɛn ɡɑri mɛm nɔɔwɛ.

²⁶Mɑ ɑ nɔmɑ suɑ wɔllɔ ɑ bɔ̃ruɑ mɑ kɑɑ bu kɑm koosiɑ ɡbɑburɔ.

²⁷Kpɑ ɑ ben bibu yɑrinɑsiɑ tem kpuro sɔɔ bwese tukunun suunu sɔɔ.

²⁸Bɑ tii bũu wi bɑ mɔ̀ Bɑɑli Peori wɛ̃. Mɑ bɑ yɑ̃kunu di ni bɑ ɡɔribu kuɑ.

²⁹Mɑ bɑ wunɛ Yinni Gusunɔn mɔru seeyɑ kɑ ben kookoosu. Yerɑ kɛsi kɛsi ɡɔɔ u duɑ ben suunu sɔɔ.

³⁰Mɑ Finɛɛsi u wunɛ Gusunɔ kɑnɑ, mɑ ɡɔɔ wi, u yɔ̃rɑ.

³¹Mɑ ɑ nùn ɡɑrisi ɡemɡii sere kɑ win bibun bweserɔ kɑ bɑɑdommɑɔ.

³²Bɑ mɑɑ wunɛ Yinni Gusunɔn mɔru seeyɑ nim mɛ bɑ rɑ soku Mɛribɑn bɔkuɔ. Mɑ ɑ Mɔwisi sɛɛyɑsiɑ ben sɔ̃.

³³Domi bɑ nùn nuki sɑnkɑ. Mɑ u ǹ bwisikɑ u kɑ ɡɑri ɡeruɑ.

³⁴Bɑ ǹ Kɑnɑnin bwese ni ɡo ni ɑ nɛɛ, bu ɡo.

³⁵Bɑ kɑ nu burinɑwɑ, mɑ nu bu nin kookoosu tie.

³⁶Mɑ bɑ nin bũnu sɑ̃wɑ. Mɑ nu kuɑ ben yinɑ.

³⁷Bɑ kɑ ben bii tɔn durɔbu kɑ tɔn kurɔbu bũu yɑ̃kunu kuɑ.

³⁸Nɡe mɛyɑ bɑ ɡemɡibun yɛm yɑri. Bɑ kɑ ben bibu Kɑnɑnin bũnu yɑ̃kuru kuɑ. Mɑ tem mɛ kpuro mu disi duurɑ tɔn ɡobe ten sɔ̃.

³⁹Bɑ disi duurɑ ben kookoosun sɔ̃. Domi su derɑ bɑ rɑ n bũnu ɡɑsirimɔ.

⁴⁰Mɑ wunɛ Yinni Gusunɔ ɑ kɑ wunɛn tɔmbu mɔru bɛsirɑ, ɑ bu tusɑ be, be bɑ sɑ̃ɑ wunɛn ɑrumɑni.

⁴¹A bu bwese tukunu nɔmu sɔndiɑ ni nu bu tusɑ nu tɑɑre.

⁴²Ben yibɛrɛbɑ bɑ bu dɑm dɔre. Mɑ bɑ bu sekuru doke.

⁴³Nɔn dɑbinɑ ɑ bu yɑkiɑ. Adɑmɑ bɑ yɔ̃rɑriwɑ bɑ n nun seesi. Mɑ bɑ kuɑ wɔnwɔndobu ben durum sɔ̃.

⁴⁴A ben nɔni swɑ̃ɑru wɑ sɑnɑm mɛ ɑ ben weeweenu nuɑ.

⁴⁵A wunɛn ɑrukɑwɑni yɑɑyɑ. Mɑ ɑ ben wɔnwɔndu wɑ wunɛn durom bɑkɑm sɔ̃.

⁴⁶A derɑ be bɑ bu yoru nɛni bɑ ben wɔnwɔndu wɑ.

⁴⁷Gusunɔ bɛsɛn Yinni, ɑ sun fɑɑbɑ koowo. A sun wunɔ bwese tukunun suunu sɔɔn di, kpɑ ɑ sun mɛnnɑ, su wɑ su wunɛn yĩsi dɛɛrɑru tɔmɑ, kpɑ sɑ n yɛ̃ɛrimɔ su kɑ nun sɑ̃.

⁴⁸Gusunɔ bɛsɛ Isirelibɑn Yinni, sɑ ko n nun siɑrɑmɔwɑ sere kɑ bɑɑdommɑɔ. Kpɑ tɔmbu kpuro bu nɛɛ, ɑmi! I Yinni Gusunɔ siɑro.