Read bariba Womusu 107 Bible Online

Womusu 107 - bariba bible

Womusu 107

¹I Yinni Gusunɔ siɑro win tɔn ɡeerun sɔ̃. Win durom mu rɑ n wɑ̃ɑwɑ sere kɑ bɑɑdommɑɔ.

²Be u yɑkiɑ, bu nùn siɑro. Be u wɔrɑ yibɛrɛbɑn nɔmɑn di, bu nùn tɔmɔ.

³Be u mɛnnɑmɑ tem kpuron di, bu nùn siɑro. Be u sokumɑ sɑɑ sɔ̃ɔ yɑri yeru ɡiɑn di, kɑ sɔ̃ɔ duu yeru ɡiɑn di, kɑ sɔ̃ɔ yɛ̃sɑn nɔm ɡeu ɡiɑn di, kɑ sɔ̃ɔ yɛ̃sɑn nɔm dwɑru ɡiɑn di, bu nùn wɔlle suo.

⁴Wee bɑ rɑɑ kɔ̃ɔre ɡbɑburɔ mi ɡɑ̃ɑnu ku rɑ kpi bɑ sirenɛ, bɑ ǹ wuu wɑ mi bɑ koo sinɑ.

⁵Gɔ̃ɔru kɑ nim nɔru ɡɑ bu ɡo. Mɑ bɑ wurure bɑ ǹ dɑm mɔ.

⁶Ben nɔni swɑ̃ɑ te sɔɔ, bɑ Yinni Gusunɔ nɔɔɡiru sue bɑ somiru kɑnɑ, mɑ u bu yɑrɑ nɔni swɑ̃ɑ ten di.

⁷U bu kpɑrɑ swɑɑ ɡeɑ sɔɔ bɑ kɑ turɑ mi bɑ koo sinɑ.

⁸Bu nùn siɑro win tɔn ɡeeru kɑ win sɔm mɑɑmɑɑkiɡinun sɔ̃ ni u rɑ ko tɔnun sɔ̃.

⁹Domi u wi nim nɔru ɡɑ mɔ̀ nim kɑ̃. Mɑ u wi ɡɔ̃ɔrɑ mɔ̀ debusiɑ.

¹⁰Gɑbu bɑ rɑɑ wɑ̃ɑ yɑm wɔ̃kuru sɔɔ sere ɡɔribun wɑ̃ɑ yerɔ bɑ yoru dimɔ, mɑ bɑ kɑ bu yɔni bɔkuɑ

¹¹yèn sɔ̃ bɑ Yinni Gusunɔn ɡɑri yinɑ, mɑ bɑ wi, Wɔrukoon bwisi kɛ̃ru ɡɛmɑ.

¹²Mɑ u derɑ bɑ tii kɑwɑ wɑhɑlɑ yen sɔ̃. Mɑ bɑ wɔrukɑ bɑ ɡu, ɡoo kun bu somiru de.

¹³Adɑmɑ ben nɔni swɑ̃ɑ te sɔɔ, bɑ Yinni Gusunɔ nɔɔɡiru sue bɑ somiru kɑnɑ. Mɑ u bu yɑrɑ nɔni swɑ̃ɑ ten di.

¹⁴U bu yɑrɑ yɑm wɔ̃ku te, kɑ ɡɔribun wɑ̃ɑ yee ten min di, mɑ u ben yorun yɔni yi kusiɑ.

¹⁵Bu Yinni Gusunɔ siɑro win tɔn ɡeerun sɔ̃. Bu nùn siɑro win sɔm mɑɑmɑɑkiɡinun sɔ̃ ni u rɑ ko tɔnun sɔ̃.

¹⁶Domi u sii ɡɑndun ɡɑmbobɑ kɔsukɑ. Mɑ u kɔkɔrɔ sisuɡii bɔɔkɑ.

¹⁷Gɑri bɑkɑsu su tii kuɑ wɔnwɔndobu sin dɑɑ kɑ sin torɑnun sɔ̃.

¹⁸Bɑ ku rɑ mɑɑ dĩɑnu kɑ̃ mɑ bɑ ɡɔɔ turuku kuɑ.

¹⁹Ben nɔni swɑ̃ɑ te sɔɔ, bɑ Yinni Gusunɔ nɔɔɡiru sue bɑ somiru kɑnɑ. Mɑ u bu yɑrɑ nɔni swɑ̃ɑ ten di.

²⁰Kɑ win ɡɑriyɑ u bu fɑɑbɑ kuɑ, mɑ u bu yɑrɑ wɔru bɔkɔ ɡen min di.

²¹Bu Yinni Gusunɔ siɑro win tɔn ɡeeru kɑ win sɔm mɑɑmɑɑkiɡinun sɔ̃ ni u rɑ ko tɔnun sɔ̃.

²²Bu nùn siɑrɑbun yɑ̃kunu kuo. Kpɑ bu win sɔm mɑɑmɑɑkiɡii nin ɡɑri kpɑrɑ kɑ nuku dobu.

²³Be bɑ ɡoo nimkusu duɑ, mɑ bɑ ben sɔmburu mɔ̀ si sɔɔ,

²⁴bɑ Yinni Gusunɔn nɔmɑn sɔmɑ wɑ kɑ mɑɑ mɑɑmɑɑki ye u kuɑ nim wɔ̃ku sɔɔ.

²⁵U ɡɑri ɡeruɑ, mɑ u derɑ woo bɔkɔ ɡɑ seewɑ ɡɑ nim kurenu seeyɑ.

²⁶Nù n dɑ wɔllɔ, kpɑ nu sɑrɑmɑ. Be bɑ wɑ̃ɑ ɡoo nimkuu si sɔɔ, bɑ nɑnde kɑri yen sɔ̃.

²⁷Tirerɑbu bu mwɑ, bɑ bɑ̃ɑrimɔ nɡe tɑm nɔrobu. Ben bwisi kpuro yi kpɑ.

²⁸Ben nɔni swɑ̃ɑ te sɔɔ, bɑ Yinni Gusunɔ nɔɔɡiru sue bɑ somiru kɑnɑ. Mɑ u bu yɑrɑ nɔni swɑ̃ɑ ten di.

²⁹U woo ɡunɑ ye yɔ̃rɑsiɑ, mɑ nim kurenu nu mɑri.

³⁰Mɑ be kpuron nuki dorɑ ye u kɑ ye kpuro mɑrisiɑ. Mɑ Yinni Gusunɔ u bu kpɑrɑ u kɑ turɑ sere mi bɑ dɔɔ.

³¹Bu Yinni Gusunɔ siɑro win tɔn ɡeeru kɑ win sɔm mɑɑmɑɑkiɡinun sɔ̃ ni u rɑ ko tɔnun sɔ̃.

³²Bu nùn wɔlle suo mi tɔmbɑ mɛnnɛ. Bu nùn siɑro ɡuro ɡurobun suunu sɔɔ.

³³Yinni Gusunɔwɑ u rɑ dɑɑrun nim ɡberɑsie, kpɑ u bwiin nim kpeerɑsiɑ mɑm mɑm.

³⁴Kpɑ u tem ɡem ɡɔsiɑ tem bɔruɡum mɛn tɔmbun nuku kɔ̃surun sɔ̃.

³⁵Wi turowɑ u rɑ mi ɡɑ̃ɑnu ku rɑ kpi ɡɔsie nim bwee bɑkɑru. Kpɑ u tem ɡbebɑ ɡɔsiɑ nim bwii.

³⁶Kpɑ u be bɑ ɡɔ̃ɔru bɑrɔ sinɑsiɑ mi, kpɑ bu wuu ko mi bɑ koo sinɑ,

³⁷kpɑ bu resɛm dɑ̃nu duure mi, nu mɑ dɑbi dɑbiru.

³⁸U rɑ bu domɑru kue bu dɑbiɑ. Kpɑ u ben yɑɑ sɑbenu kuurɑsiɑ.

³⁹Adɑmɑ ɡɑbu bɑ dɑbiru kɑɑre bɑ wɑ̃ɑ sekuru sɔɔ yèn sɔ̃ bɑ yoru dimɔ bɑ nɔni sɔ̃ɔre.

⁴⁰Mɑ Yinni Gusunɔ u derɑ bɑ ben wiruɡibu ɡɛmɑ, mɑ bɑ sirenɛ kɑm sɔɔ bɑ ǹ yɛ̃ mi bɑ dɔɔ.

⁴¹Adɑmɑ u rɑ sɑ̃ɑro yɑre win sɑ̃ɑrun di. Kpɑ u win bweseru dɑbiɑsiɑ nɡe sɑbe ɡɔ̃su.

⁴²Gemɡibu bɑ̀ n nùn wɑ, bɑ rɑ yɛ̃ɛriwɑ. Kpɑ tɔn kɔ̃sobu bu nɔɔ mɑri.

⁴³Wi u bwisi mɔ, u de u ɡɑri yi kpuro nɛnɛ kpɑ u ɡiɑ mɑ Yinni Gusunɔ u sɑ̃ɑwɑ duromɡii.