Read bariba Womusu 119 Bible Online

Womusu 119 - bariba bible

Womusu 119

¹Doo nɔɔruɡibɑ be bɑ kun tɑɑrɛ mɔ ben sɑnu sɑnusu sɔɔ, mɑ bɑ sĩimɔ nɡe mɛ Yinni Gusunɔn woodɑ yɑ bu sɔ̃ɔsimɔ.

²Doo nɔɔruɡibɑ be bɑ win ɡere swĩi, mɑ bɑ nùn kɑsu ɡem kɑ tiɑ,

³mɑ bɑ ku rɑ ɡɔbɑ ko, bɑ sĩimɔ win swɛɛ sɔɔ.

⁴A wunɛn woodɑbɑ kuɑwɑ bu kɑ ye swĩi dee dee.

⁵A de nɛn kookoosu su n swɑɑ swĩi, n wɑ n kɑ wunɛn ɡere mɛm nɔɔwɑ.

⁶Nɑ̀ n wunɛn woodɑbɑ kpuro lɑɑkɑri sɑ̃ɑ, sɑɑ yerɑ sekurɑ kun mɑn mwɑɑmɔ.

⁷Nɑ̀ n wunɛn sɔ̃ɔsi ɡeeru ɡiɑ, kon nun siɑrɑ kɑ ɡɔ̃ru tiɑ.

⁸Kon wunɛn woodɑbɑ nɛnɛ. A ku mɑn deri mɑm mɑm.

⁹Aluwɑɑsi ù n kĩ win sɑnu sɑnusu su n dɛɛre, sere u n wunɛn ɡɑri mɛm nɔɔwɑmmɛ.

¹⁰Nɑ nun kɑsu kɑ nɛn ɡɔ̃ru kpuro. A de n wunɛn swɑɑ swĩi.

¹¹Nɑ wunɛn ɡɑri nɛnisi nɛn ɡɔ̃ruɔ kpɑ n ku rɑ kɑ nun torɑri.

¹²Yinni Gusunɔ, nɑ nun siɑrɑ, ɑ mɑn wunɛn woodɑbɑ keu koosio.

¹³Nɑ nɔɔɡiru suɑ nɑ wunɛn ɡere kpuro kpɑrɑ.

¹⁴Wunɛn woodɑn mɛm nɔɔbu bu mɑn nuku dobu wɛ̃ɛmɔ nɡe dukiɑ bɑkɑ.

¹⁵Kon wunɛn sɔ̃ɔsiru bwisiku, kpɑ n wunɛn yiirebu nɔni doke.

¹⁶Nɑ kon nuku dobu ko wunɛn ɡere sɔɔ. Nɑ ǹ mɑɑ wunɛn ɡɑri duɑrimɔ.

¹⁷A nɛ wunɛn sɔm kowo durom kuo kpɑ n wɑ nɑ n wɑ̃ɑ, kpɑ n wɑ n wunɛn ɡere mɛm nɔɔwɑ.

¹⁸A nɛn nɔni wukio, kpɑ n wɑ n ɡiɑ ɡɑ̃ɑ ɡee ni nu wɑ̃ɑ wunɛn ɡɑri sɔɔ.

¹⁹Nɑ sɑ̃ɑwɑ sɔɔ hɑnduniɑ ye sɔɔ. A ku mɑn wunɛn woodɑbɑ beruɑ.

²⁰Nɛn bwɛ̃rɑ yɑ rɑ n woowɑ bɑɑdommɑ wunɛn yiirebu sɔɔ kĩrun sɔ̃.

²¹A rɑ tii suobu ɡerusi be, be bɑ sɑ̃ɑ bɔ̃rurobu, mɑ bɑ ku rɑ wunɛn woodɑbɑ swĩi.

²²A mɑn sekuru kɑ ɡɛndu wunɑrio, domi nɑ wunɛn ɡere swĩi.

²³Bɑɑ mɛ sinɑ bibu bɑ rɑ sinɛ bu mɑn wĩi, kɑ mɛ, nɛ, wunɛn sɔm kowo nɑ rɑ n wunɛn sɔ̃ɔsiru bwisikumɔ.

²⁴Wunɛn woodɑbɑ bɑ rɑ mɑn nuku dobu wɛ̃wɑ, kpɑ bu mɑn bwisi kɛ̃.

²⁵Nɛ wee nɑ mwiɑ kpɑnɑ nɡe wi u kpĩ tuɑ sɔɔ. A mɑn nɛn wɑ̃ɑru wesio nɡe mɛ ɑ nɔɔ mwɛɛru kuɑ.

²⁶Nɑ nun nɛn wɑ̃ɑrun dɑɑ kpuro tusiɑ, mɑ ɑ mɑn suuru kuɑ. A mɑn wunɛn woodɑbɑ sɔ̃ɔsio.

²⁷A mɑn ben ɑsɑnsi tubusio, kpɑ nɑ n dɑ wunɛn sɔm mɑɑmɑɑkiɡinu bwisiku.

²⁸Wee nɑ wuri mɔ̀ nuku sɑnkirɑnun sɔ̃. A mɑn dɑm kɛ̃ɛyɔ nɡe mɛ ɑ nɔɔ mwɛɛru kuɑ.

²⁹A de n kɑ weesun swɑɑ tondɑ, kpɑ ɑ mɑn durom kuɑ nɑ n kɑ wunɛn ɡere swĩi.

³⁰Nɑ ɡɔ̃ru doke n ɡem swĩi. Nɑ wunɛn woodɑbɑ nɔni ɡirɑri.

³¹Nɑ nɛn tii wɛ̃ be sɔɔ. Yen sɔ̃, ɑ ku de n sekuru wɑ.

³²Wunɛn woodɑbɑrɑ nɑ swĩi, domi ɑ nɛn nɔni wukiɑ.

³³Yinni Gusunɔ, ɑ mɑn wunɛn swɛɛ sɔ̃ɔsio, kpɑ n kpĩ n yi swĩi nɛn wɑ̃ɑrun tɔ̃ru kpuro sɔɔ.

³⁴A mɑn bwisi kɛ̃ɛyɔ kpɑ n kpĩ n kɑ wunɛn woodɑbɑ mɛm nɔɔwɑ.

³⁵Nɑ wunɛn swɑɑ kĩ. A mɑn sureo ye sɔɔ.

³⁶A de nɛn bwɛ̃rɑ yu wurɑ ye sɔɔ. A ku de nɛn kĩru tu wurɑ ɡobi ɡiɑ.

³⁷A nɛn binɛ wunɔ ɡɑ̃ɑ kɑnkɑm di, kpɑ ɑ de nɑ n wɑ̃ɑ wunɛn swɛɛ sɔɔ.

³⁸A wunɛn nɔɔ mwɛɛru yibio nɛ, wunɛn sɔm kowon sɔ̃, tɑ wɑ̃ɑwɑ be bɑ nun nɑsien sɔ̃.

³⁹A mɑn yɑro seku te nɑ nɑsien di, wunɛn siribu bu rɑ n wɑ̃.

⁴⁰Nɑ kĩwɑ n wunɛn woodɑbɑ mɛm nɔɔwɑ too. A de nɑ n wɑ̃ɑ wɑ̃ɑru sɔɔ wunɛn ɡem sɔ̃.

⁴¹Yinni Gusunɔ, ɑ de ɑ nɛn wɔnwɔndu wɑ, kpɑ ɑ mɑn fɑɑbɑ ko nɔɔ mwɛɛ te ɑ mɑn kuɑn sɔ̃.

⁴²Sɑɑ ye sɔɔ, kon kpĩ n be bɑ mɑn sekuru dokemɔ ɡɑri wisi. Domi nɑ nɛn nɑɑnɛ doke wunɛn ɡɑri sɔɔ.

⁴³A ku wunɛn ɡem wunɑ nɛn nɔɔn di, nɑ yĩiyɔbu mɔ wunɛn siribu sɔɔ.

⁴⁴Ko nɑ n wunɛn woodɑbɑ nɛniwɑ sɑɑ kpuro. Yɑ ko n wɑ̃ɑ nɛn mi sere kɑ bɑɑdommɑɔ.

⁴⁵Kon sĩ kɑ tii mɔru, domi wunɛn woodɑbɑrɑ nɑ kɑsu.

⁴⁶Kon ben ɡɑri sinɑmbu sɔ̃. Nɑ ǹ ko nɑ n mɑɑ wɑ̃ɑ sekuru sɔɔ.

⁴⁷Nɑ wunɛn woodɑbɑ kĩ. Nɑ rɑ n nuku dobu mɔ ye sɔɔ.

⁴⁸Nɑ rɑ nɛn nɔmɑ yiiye wɔllɔ n kɑ kɑnɑru ko wunɛn ɡɑri yi nɑ kĩn sɔ̃. Domi nɑ kĩ nɑ n yi bwisikumɔ nɛn ɡɔ̃ruɔ.

⁴⁹Wee ɑ mɑn yĩiyɔbu wɛ̃. A wunɛn nɔɔ mwɛɛru yɑɑyo te ɑ nɛ, wunɛn sɔm kowo kuɑ.

⁵⁰Terɑ tɑ rɑ mɑn nukuru yɛmiɑsie nɛn nɔni swɑ̃ɑru sɔɔ, kpɑ tu mɑn wɑ̃ɑru wɛ̃.

⁵¹Wee tii suobu bɑ mɑn yɛ̃ɛsu wɔri. Adɑmɑ kɑ mɛ, nɑ ǹ wunɛn woodɑbɑ deri.

⁵²Yinni Gusunɔ, nɑ wunɛn yellun siribu yɑɑye. Biyɑ bu mɑn dɑm kɑ̃.

⁵³Nɑ̀ n wɑ tɔn kɔ̃sobu bɑ wunɛn woodɑbɑ deri, mɔru bɑkɑ nɑ rɑ ko.

⁵⁴Wunɛn ɡɑrin sɔ̃nɑ nɑ rɑ womusu ko mi nɑ sɔru dimɔ.

⁵⁵Wɔ̃kuru nɑ̀ n wunɛn yĩsiru yɑɑyɑ, nɑ rɑ n wunɛn woodɑbɑ nɛnusiwɑ.

⁵⁶Ye yɑ sɑ̃ɑ nɛɡiɑ, yerɑ n wunɛn ɡere mɛm nɔɔwɑ.

⁵⁷Nɑ mɑɑ wure nɑ ɡerumɔ, Yinni Gusunɔ, nɛɡiɑ n wunɛn ɡere mɛm nɔɔwɑ.

⁵⁸Kɑ nɛn ɡɔ̃ru kpurowɑ nɑ nun sokumɔ. A wunɛn nɔɔ mwɛɛru yɑɑyo kpɑ ɑ nɛn wɔnwɔndu wɑ.

⁵⁹Nɑ̀ n nɛn dɑɑ bwisikɑ, nɑ rɑ wurewɑ n sĩ wunɛn swɛɛ sɔɔ.

⁶⁰Nɑ rɑ n sɛndewɑ n kɑ dɑ mi ɡiɑ, nɑ kun tɔ̃ru ɡɔsie. Kpɑ n wunɛn woodɑbɑ mɛm nɔɔwɑ.

⁶¹Tɔn kɔ̃sobun yini mɑn sikerenɛ. Adɑmɑ kɑ mɛ, nɑ ǹ wunɛn ɡɑri deri.

⁶²Wɔ̃ku suunu nɑ rɑ sewɑ n nun siɑrɑ wunɛn siri bi ɑ rɑ ko dee deen sɔ̃.

⁶³Nɑ sɑ̃ɑwɑ be bɑ nun nɑsie kpuro kɑ be bɑ wunɛn woodɑbɑ mɛm nɔɔwɑmmɛn bɔrɔ.

⁶⁴Yinni Gusunɔ, wunɛn durom yibɑ hɑnduniɑ kpuro sɔɔ. A mɑn wunɛn woodɑbɑ kpuro sɔ̃ɔsio.

⁶⁵Yinni Gusunɔ, ɑ rɑ wunɛn sɔm kowo ɡeɑ kue nɡe mɛ ɑ nɔɔ mwɛɛru kuɑ.

⁶⁶A mɑn lɑɑkɑri kɑ bwisi kɛ̃ɛyɔ domi nɑ wunɛn woodɑbɑ nɑɑnɛ sɑ̃ɑ.

⁶⁷N sere sekuru wɑ, nɑ rɑɑ kɔ̃ɔrewɑ. Adɑmɑ tɛ̃, nɑ wunɛn ɡɑri nɛni.

⁶⁸A sɑ̃ɑwɑ tɔn ɡeo. A mɑn wunɛn woodɑbɑ sɔ̃ɔsio.

⁶⁹Tii suobu bɑ mɑn weesu koosimɔ. Adɑmɑ nɛ, nɑ wunɛn yiirebu nɛni kɑ nɛn ɡɔ̃ru kpuro.

⁷⁰Ben ɡɔ̃ru ɡɑ bɔɔbu, ɡɑ̃ɑnu ku rɑ bu yeeri. Adɑmɑ nɛ, wunɛn ɡɑri yi rɑ mɑn nuku dobu wɛ̃.

⁷¹N burɑm bo n sekuru wɑ kpɑ n kɑ kpĩ n wunɛn woodɑbɑ ɡiɑ.

⁷²Nɑ wunɛn nɔɔn ɡere kĩ n kere ɡɑ̃ɑnu nɔrɔbu (1.000) ye bɑ kuɑ kɑ wurɑ kɑ sii ɡeesu.

⁷³Wunɛn nɔmɑ yɑ mɑn mɔmɑ. Yerɑ yɑ mɑn tɑ̃sisiɑ. A mɑn bwisi kɛ̃ɛyɔ n kɑ wunɛn woodɑbɑ ɡiɑ.

⁷⁴Be bɑ nun nɑsie, bɑ̀ n mɑn wɑ, bɑ rɑ nuku dobu kowɑ. Domi nɑ wunɛn nɔɔ mwɛɛru nɑɑnɛ sɑ̃ɑ.

⁷⁵Yinni Gusunɔ, nɑ yɛ̃ mɑ wunɛn siribu bu sɑ̃ɑwɑ dee dee. Wunɛn bɔrɔkinirun sɔ̃nɑ ɑ mɑn sekuru doke.

⁷⁶A de wunɛn durom mu mɑn nukuru yɛmiɑsiɑ nɡe mɛ ɑ nɛ wunɛn sɔm kowo nɔɔ mwɛɛru kuɑ.

⁷⁷A mɑn wɔnwɔndu kuo kpɑ n wɑ nɑ n wɑ̃ɑ. Domi wunɛn sɔ̃ɔsiru tɑ rɑ mɑn nuku dobu wɛ̃.

⁷⁸A be bɑ tii sue sekuru dokeo, wee bɑ mɑn dɑm dɔremɔ kɑm sɔɔ. Adɑmɑ nɛ, wunɛn woodɑbɑrɑ nɑ rɑ n bwisikumɔ.

⁷⁹Be bɑ nun nɑsie ɑ de bu wurɑmɑ nɛn mi. Be bɑ wunɛn woodɑbɑ yɛ̃ ɑ de bu wurɑmɑ nɛn mi.

⁸⁰A de nɑ n wunɛn yiirebu mɛm nɔɔwɑmmɛ mɑm mɑm, kpɑ n ku rɑ sekuru wɑ.

⁸¹Nɑ kɑsu ɑ mɑn fɑɑbɑ ko. Nɑ wunɛn nɔɔ mwɛɛru nɑɑnɛ sɑ̃ɑ.

⁸²Nɑ kɑsu n wunɛn nɔɔ mwɛɛru ɡiɑ sere nɛn nɔni dɑm dwiiyɑ. Mɑ nɑ tii sɔ̃ɔmɔ nɑ mɔ̀, sere sɑɑ yerɑ̀ kɑɑ mɑn nukuru yɛmiɑsiɑ.

⁸³Nɑ sɑ̃ɑre nɡe ɡɔnɑn bɔɔru te bɑ bwɛ̃ wiisu sɔɔ. Nɑ ǹ wunɛn woodɑbɑ duɑri.

⁸⁴Sere sɑɑ yerɑ̀ kɑɑ de nɛ, wunɛn sɔm kowo nɑ n wɑ̃ɑru dii. Dommɑ kɑɑ be bɑ mɑn nɔni sɔ̃ɔmɔ siri.

⁸⁵Tii suobu bɑ suurɑ ɡbemɔ nɛn wuswɑɑɔ. Bɑ ǹ wunɛn woodɑbɑ swĩi.

⁸⁶Wunɛn ɡɑri kpuro yi nɑɑnɛ mɔ. Wee yibɛrɛbɑ bɑ mɑn nɔni sɔ̃ɔmɔ kɑm sɔɔ. A mɑn fɑɑbɑ koowo.

⁸⁷N tiewɑ fiiko bu kɑ mɑn surɑ bu ɡo. Adɑmɑ kɑ mɛ, nɛ, nɑ ǹ wunɛn woodɑbɑ derimɔ.

⁸⁸A mɑn nɛn wɑ̃ɑru wesio wunɛn durom sɔ̃, kpɑ n kpĩ n wunɛn ɡere mɛm nɔɔwɑ.

⁸⁹Yinni Gusunɔ, wunɛn ɡɑri yi ko n wɑ̃ɑwɑ wɔllɔ sere kɑ bɑɑdommɑɔ.

⁹⁰Wunɛn bɔrɔkiniru tɑ ko n mɑɑ wɑ̃ɑwɑ sere kɑ bɑɑdommɑɔ. Wunɑ ɑ tem swĩi mɑ ɑ mu sire dim dim.

⁹¹Wunɛn woodɑbɑn sɔ̃nɑ ɡɑ̃ɑnu kpuro kɑ wɑ̃ɑ ɡisɔ. Ni kpurowɑ nu mɑɑ wɑ̃ɑ wunɛn sɔ̃.

⁹²Nɑ̀ kun dɑɑ nuku dobu wɑ wunɛn woodɑ be sɔɔ, nɑ n dɑɑ ɡu nɛn nɔni swɑ̃ɑru sɔɔ.

⁹³Nɑ ǹ wunɛn ɡere duɑrimɔ pɑi, domi yerɑ yɑ mɑn wɑ̃ɑru wɛ̃ɛmɔ.

⁹⁴Nɑ sɑ̃ɑwɑ wunɛɡii, ɑ mɑn fɑɑbɑ koowo. Wunɛn woodɑbɑrɑ nɑ kĩ n swĩi.

⁹⁵Tɔn kɔ̃sobu bɑ mɑn mɑrɑ bu ɡo. Adɑmɑ nɛ, wunɛn ɡɑriyɑ nɑ bwisikumɔ.

⁹⁶Ye yɑ yibɑ kpuro, yɑ mɑɑ nɔru mɔ. Adɑmɑ wunɛn woodɑbɑ bɑ ǹ kpeeru mɔ.

⁹⁷Nɑ wunɛn woodɑbɑ kĩ too. Bɑ rɑ n wɑ̃ɑwɑ nɛn bwisikunu sɔɔ tɔ̃ɔ ɡiriru bɑɑdommɑ.

⁹⁸Wunɛn woodɑbɑ bɑ rɑ mɑn bwisi kɛ̃ n kere nɛn yibɛrɛbɑ. Domi nɑ rɑ n bu nɛniwɑ bɑɑdommɑ.

⁹⁹Nɑ nɛn yinnibu kpuro yɛ̃ru kerɑ. Domi wunɛn woodɑbɑ bɑ rɑ n wɑ̃ɑwɑ nɛn bwisikunu sɔɔ.

¹⁰⁰Nɑ durɔ tɔkɔnu bwisi kere, domi nɑ wunɛn ɡere mɛm nɔɔwɑmmɛ.

¹⁰¹Nɑ ku rɑ swɑɑ kɔ̃sɑ mwɛ, kpɑ n wɑ n kɑ wunɛn ɡɑri nɛnɛ.

¹⁰²Nɑ ku rɑ de wunɛn woodɑbɑ bu kɑ mɑn tondɑ. Domi wunɑ ɑ mɑn keu sɔ̃ɔsimɔ.

¹⁰³Wunɛn ɡɑri yi tim dobu kere nɛn nɔɔwɔ.

¹⁰⁴Nɑ kuɑ bwisiɡii wunɛn woodɑbɑn sɔ̃. Yen sɔ̃nɑ nɑ weesun swɛɛ kpuro tusɑ.

¹⁰⁵Wunɛn ɡɑri yi sɑ̃ɑwɑ nɡe fitilɑ ye yɑ mɑn swɑɑ sɔ̃ɔsimɔ.

¹⁰⁶Nɑ bɔ̃ruɑ nɑ sire nɑ nɛɛ, kon wunɛn sɔ̃ɔsiru mɛm nɔɔwɑ, domi tɑ sɑ̃ɑwɑ dee dee.

¹⁰⁷Nɑ nɔni sɔ̃ɔre ɡem ɡem. Yinni Gusunɔ, ɑ mɑn dɑm kɛ̃ nɡe mɛ ɑ nɔɔ mwɛɛru kuɑ.

¹⁰⁸Yinni Gusunɔ, ɑ nɛn siɑrɑbu wuro, kpɑ ɑ mɑn wunɛn sɔ̃ɔsiru ɡiɑsiɑ.

¹⁰⁹Nɛn wɑ̃ɑrɑ wɑ̃ɑwɑ kɑri sɔɔ bɑɑdommɑ, ɑdɑmɑ nɑ ǹ wunɛn woodɑbɑ duɑrimɔ pɑi!

¹¹⁰Tɔn kɔ̃sobu bɑ mɑn yɛ̃ri bɛrie. Kɑ mɛ, nɑ wunɛn ɡere swĩi.

¹¹¹Wunɛn ɡɑri sɑ̃ɑwɑ nɛn tubi kɑ bɑɑdommɑɔ, domi yi sɔɔrɑ nɛn ɡɔ̃ru dobu wɑ̃ɑ.

¹¹²Nɛn ɡɔ̃ru ɡɑ kĩ ɡu wunɛn woodɑbɑ mɛm nɔɔwɑ bɑɑdommɑ sere kɑ nɔrɔ.

¹¹³Nɑ ɡɔ̃rusu yiruɡibu tusɑ, ɑdɑmɑ nɑ wunɛn woodɑbɑ kĩ.

¹¹⁴Wunɑ ɑ sɑ̃ɑ nɛn kuku yeru kɑ nɛn tɛrɛru. Wunɛn nɔɔ mwɛɛru sɔɔrɑ nɛn yĩiyɔbu wɑ̃ɑ.

¹¹⁵Tɔn kɔ̃sobu, i kɑ mɑn tondo, kpɑ n wɑ n Gusunɔ nɛn Yinnin woodɑbɑ swĩi.

¹¹⁶Yinni Gusunɔ, ɑ mɑn kɔ̃suo nɑ n kɑ wɑ̃ɑ nɡe mɛ ɑ nɔɔ mwɛɛru kuɑ. A ku mɑn sekuru doke nɛn yĩiyɔbu sɔɔ.

¹¹⁷A de ɑ n sɑ̃ɑ nɛn tɑ̃si yeru kpɑ n fɑɑbɑ wɑ. Kpɑ nɑ n wunɛn woodɑbɑ lɑɑkɑri sɑ̃ɑ bɑɑdommɑ.

¹¹⁸A rɑ be bɑ rɑ wunɛn woodɑbɑ deri ɡɛmwɑ. Domi ben nɔni wɔ̃kubu bu ǹ ɑrufɑɑni mɔ.

¹¹⁹A rɑ tɔn kɔ̃sobu ɡɛriewɑ tem mɛn di nɡe nim yɑkɑ. Yen sɔ̃nɑ nɑ wunɛn woodɑbɑ swĩi.

¹²⁰Wunɛn nɑnum mu derɑ nɛn wɑsi diirimɔ. Nɑ wunɛn siribu nɑsie.

¹²¹Nɑ wunɛn woodɑbɑ kɑ wunɛn ɡem mɛm nɔɔwɑmmɛ. A ku mɑn be bɑ mɑn dɑm dɔremɔ nɔmu sɔndiɑ.

¹²²A nɛ, wunɛn sɔm kowo nɔɔ mwɛɛru kuo mɑ kɑɑ mɑn somi. A ku de tii suobu bu mɑn dɑm dɔre.

¹²³Nɛn nɔni dɑm dwiiyɑ ye nɑ wunɛn fɑɑbɑ kɑ wunɛn ɡem mɛ̀n nɔɔ mwɛɛru ɑ kuɑ mɑrɑ.

¹²⁴A nɛ, wunɛn sɔm kowo kuo nɡe mɛ wunɛn tɔn ɡeerɑ nɛ. A mɑn wunɛn woodɑbɑn keu sɔ̃ɔsio.

¹²⁵Nɑ sɑ̃ɑwɑ wunɛn sɔm kowo. A mɑn bwisi kɛ̃ɛyɔ n kɑ wunɛn sɔ̃ɔsiru ɡiɑ.

¹²⁶Yinni Gusunɔ, sɑɑ yɑ den turɑ ɑ kɑ se domi wee bɑ wunɛn woodɑ sɑrɑmɔ.

¹²⁷Adɑmɑ nɛ, nɑ ye kĩ n kere wurɑ ɡeɑn tii.

¹²⁸Nɑ ye kpuro ɡɑrisiwɑ dee dee. Nɑ swɛɛ yi yi ǹ dɛnde kpuro tusɑ.

¹²⁹Wunɛn yiirebu bu rɑ n wɑ̃, yen sɔ̃nɑ nɑ bu nɛni.

¹³⁰Wunɛn ɡɑrin ɡiɑbu bu rɑ tɔnu yɑm bururɑsiewɑ, kpɑ yi bwisi sɑribɑ bwisi kɛ̃.

¹³¹Nɑ kɑsu ɡem kɑ tiɑ n wɑ n wunɛn woodɑbɑ ɡiɑ.

¹³²Yinni Gusunɔ ɑ mɑn mɛɛrimɑ, kpɑ ɑ mɑn durom kuɑ nɡe mɛ ɑ rɑ be bɑ nun kĩ kue.

¹³³A de nɑ n tɑ̃sɑ wunɛn ɡɑri sɔɔ. A ku de torɑru ɡɑru tɑ n mɑn wɑ̃ɑsi.

¹³⁴A mɑn wɔro tɔmbun dɑm dɔrebun di, kpɑ n kpĩ n wunɛn sɔ̃ɔsiru mɛm nɔɔwɑ.

¹³⁵A kɑ mɑn nɔnu ɡeu mɛɛrio, kpɑ ɑ mɑn wunɛn yiirebu sɔ̃ɔsi.

¹³⁶Wee nɑ nɔni yĩresu kokumɔ nɡe dɑɑru, domi tɔmbɑ kun wunɛn woodɑbɑ mɛm nɔɔwɛ.

¹³⁷Yinni Gusunɔ, ɑ sɑ̃ɑwɑ ɡemɡii. Wunɛn siribu bu rɑ n sɑ̃ɑwɑ dee dee.

¹³⁸A wunɛn woodɑ yiiwɑ ɡem sɔɔ. Yɑ mɑɑ nɑɑnɛ mɔ.

¹³⁹Nɑ̀ n nɛn yibɛrɛbɑ wɑ be bɑ wunɛn ɡɑri duɑri, nɛn mɔru rɑ sewɑ.

¹⁴⁰Wunɛn ɡɑri yi nɑɑnɛ mɔ. Nɛ, wunɛn sɔm kowo nɑ yi kĩ.

¹⁴¹Wee nɑ ǹ kpɑ̃, mɑ bɑ mɑn ɡɛmɑ. Kɑ mɛ, nɑ ǹ wunɛn woodɑbɑ duɑri.

¹⁴²Wunɛn ɡem mu ku rɑ kpe. Mɛyɑ wunɛn ɡɑri yi sɑ̃ɑwɑ ɡem.

¹⁴³Nuku sɑnkirɑnu kɑ nɔni swɑ̃ɑrɑ mɑn wɔrimɔ, ɑdɑmɑ wunɛn woodɑbɑ bɑ rɑ mɑn nuku dobu wɛ̃.

¹⁴⁴Wunɛn yiirebu bu sɑ̃ɑwɑ dee dee sere kɑ bɑɑdommɑɔ. A mɑn bwisi kɛ̃ɛyɔ yi yi koo de nɑ n wɑ̃ɑ.

¹⁴⁵Yinni Gusunɔ, nɑ nun sokumɔwɑ kɑ nɛn ɡɔ̃ru kpuro. A mɑn wurɑrio, kpɑ n kpĩ n wunɛn sɔ̃ɔsiru nɛnɛ.

¹⁴⁶Nɑ nun kɑnɑmɔ, ɑ mɑn fɑɑbɑ koowo, kpɑ n kpĩ n wunɛn woodɑbɑ mɛm nɔɔwɑ.

¹⁴⁷Nɑ rɑ kɑnɑru kowɑ yɑm mu sere sɑ̃rɑ, kpɑ nɑ n wunɛn nɔɔ mwɛɛnu nɑɑnɛ sɑ̃ɑ.

¹⁴⁸Yɑm mu sere sɑ̃rɑ nɑ rɑ sewɑ n kɑ wunɛn ɡɑri mɛɛri.

¹⁴⁹A nɛn nɔɔ nɔɔwɔ wunɛn durom sɔ̃. A mɑn sirio nɡe mɛ ɑ rɑ siri, kpɑ n wɑ nɑ n wɑ̃ɑ.

¹⁵⁰Be bɑ kɔ̃sɑ bwisikumɔ, be wee bɑ mɑn turuku kuɑ. Bɑ wunɛn woodɑbɑ deri.

¹⁵¹Wunɛ Yinni Gusunɔ, ɑ wɑ̃ɑwɑ nɛn turuku. Wunɛn ɡɑri yi sɑ̃ɑwɑ ɡem.

¹⁵²Nɑ yɛ̃ sɑɑ yee yellun di mɑ ɑ wunɛn woodɑbɑ yiiwɑ bɑ n kɑ wɑ̃ɑ sere kɑ bɑɑdommɑɔ.

¹⁵³A nɛn nɔni swɑ̃ɑru mɛɛrio, kpɑ ɑ mɑn wɔrɑ. Nɑ ǹ wunɛn woodɑbɑ duɑrimɔ.

¹⁵⁴A kɑ mɑn yinɔ kpɑ ɑ mɑn yɑkiɑ. A de nɑ n wɑ̃ɑ nɡe mɛ ɑ nɔɔ mwɛɛru kuɑ.

¹⁵⁵Tɔn kɔ̃sobɑ kun fɑɑbɑ wɑsi, domi bɑ ku rɑ wunɛn sɔ̃ɔsiru kɑsu.

¹⁵⁶Yinni Gusunɔ, wunɛn durom mu kpɑ̃. A mɑn sirio nɡe mɛ ɑ rɑ siri, kpɑ n wɑ nɑ n wɑ̃ɑ.

¹⁵⁷Nɛn yibɛrɛ be bɑ mɑn nɔni sɔ̃ɔmɔ bɑ dɑbi. Adɑmɑ kɑ mɛ, nɑ ǹ wunɛn ɡere yinɑmɔ.

¹⁵⁸Nɑ tɔnu kɑmbɑ tusɑ, domi bɑ ku rɑ wunɛn woodɑbɑ swĩi.

¹⁵⁹Yinni Gusunɔ, ɑ n yɛ̃ mɑ nɑ wunɛn woodɑbɑ kĩ. A de nɑ n wɑ̃ɑ wunɛn durom sɔ̃.

¹⁶⁰Gemɑ mu sɑ̃ɑ wunɛn ɡɑrin nuuru. Wunɛn woodɑbɑ kpuro bɑ kon sɑ̃ɑwɑ ɡem sere kɑ bɑɑdommɑɔ.

¹⁶¹Wee sinɑ bibɑ mɑn nɔni sɔ̃ɔmɔ kɑm sɔɔ. Adɑmɑ wunɛn ɡɑri tɔnɑwɑ nɑ nɑsie.

¹⁶²Nɑ rɑ n nuku dobu mɔ wunɛn ɡɑri sɔɔ nɡe wi u dukiɑ bɑkɑ wɑ u ɡurɑ.

¹⁶³Nɑ weesu tusɑ. Mɑ nɑ wunɛn woodɑbɑ kĩ.

¹⁶⁴Sɔ̃ɔ teeru, nɔn nɔɔbɑ yiruwɑ nɑ rɑ nun siɑre wunɛn siri bi bu sɑ̃ɑ dee deen sɔ̃.

¹⁶⁵Be bɑ wunɛn woodɑbɑ kĩ, bɑ rɑ n bɔri yɛn bɑkɑru mɔ. Kɔ̃sɑ ku rɑ bu deemɛ.

¹⁶⁶Yinni Gusunɔ, nɑ wunɛn fɑɑbɑ yĩiyɔ. Yen sɔ̃, nɑ wunɛn woodɑbɑ mɛm nɔɔwɛ.

¹⁶⁷Nɑ rɑ wunɛn yiirebu mɛm nɔɔwɛ. Nɑ rɑ bu kɑ̃ too too.

¹⁶⁸Nɑ wunɛn yiirebu kɑ wunɛn woodɑbɑ swĩi, domi nɛn kookoosu kpuro wɑ̃ɑ wunɛn wuswɑɑɔ.

¹⁶⁹A de ɑ nɛn wuri nɔ. A mɑn bwisi kɛ̃ɛyɔ nɡe mɛ ɑ nɔɔ mwɛɛru kuɑ.

¹⁷⁰A nɛn kɑnɑru nɔɔwɔ. A mɑn wɔro nɡe mɛ ɑ nɔɔ mwɛɛru kuɑ.

¹⁷¹A rɑ mɑn wunɛn woodɑbɑn keu sɔ̃ɔsi. A de wunɛn siɑrɑbu bu nɔɔrɑ nɛn nɔɔn di.

¹⁷²Woodɑ be kpuro bɑ dɛɛrewɑ. A de n womu ko ben sɔ̃.

¹⁷³Nɑ wunɛn sɔ̃ɔsiru wurɑ. A nɑ ɑ mɑn somi.

¹⁷⁴Yinni Gusunɔ, wunɛn fɑɑbɑwɑ nɑ mɑrɑ kɑ ɡem. Mɛyɑ wunɛn woodɑbɑ bɑ rɑ mɑn nuku dobu wɛ̃.

¹⁷⁵A de nɑ n wunɛn siribu tɑ̃siri, kpɑ nɑ n wɑ̃ɑ n kɑ nun siɑrɑ.

¹⁷⁶Wee nɑ sirenɛ nɡe yɑ̃ɑ te tɑ kɔ̃ɔre. A nɛ, wunɛn sɔm kowo kɑsuo, nɑ ǹ wunɛn woodɑbɑ duɑrimɔ.