Read bariba Womusu 129 Bible Online

Womusu 129 - bariba bible

Womusu 129

¹Sɑ̃ɑ dɑɑrun womu. Ge wee. Isirelibɑ bu ɡeruo sɑnnu sɑnnu bu nɛɛ, ɡeemɑ, tɔn kɔ̃sobu bɑ rɑ n sun dɑm dɔremɔwɑ sɑɑ bɛsɛn bweserun toren di.

²Bɑ sun nɔni sɔ̃ɔwɑ bɛsɛn bweserun toren di. Adɑmɑ bɑ ǹ nɑsɑrɑ wɑ bɛsɛn wɔllɔ.

³Bɑ wukɑ bɛsɛn birusun wɔllɔ bɑ kpĩi wunɑ wunɑ.

⁴Adɑmɑ Yinni Gusunɔ u sɑ̃ɑwɑ ɡemɡii, u ben wɛ̃ɛ kɑsukɑ.

⁵Yinni Gusunɔ, ɑ de be bɑ Yerusɑlɛmu tusɑ bu sekuru wɑ, kpɑ bu biruku yirɑ wurɑ,

⁶bɑ n sɑ̃ɑ nɡe yɑkɑ si su rɑ kpi diru wɔllɔ. Su rɑ ɡberewɑ bɑ kun su wukurɑ.

⁷Wi u su ɡɛ̃ɛmɔ, su ku rɑ win nɔmu yibu. Wi u mɑɑ su ɡurɑmɔ, su ku rɑ win nɔm koto teeru turi.

⁸Be bɑ sɑrɔ mi, bu ku bu domɑru kuɑ bu nɛɛ, Gusunɔn domɑru tɑ n kɑ bu wɑ̃ɑ. Bu ku rɑɑ mɑɑ nɛɛ, bɑ bu domɑru kuɑ kɑ Yinni Gusunɔn yĩsiru.