Read bariba Womusu 132 Bible Online

Womusu 132 - bariba bible

Womusu 132

¹Sɑ̃ɑ dɑɑrun womu. Ge wee. Yinni Gusunɔ, ɑ Dɑfidi yɑɑyo win wɑhɑlɑ ye u kuɑ kpuron sɔ̃.

²Domi u wunɛ Yɑkɔbun Yinni dɑmɡii nɔɔ mwɛɛru kuɑ u nɛɛ,

³u ǹ duɔ win kuu bekuruɡirɔ u sere nɛɛ, u koo kpunɑ win kpin yerɔ mi u rɑ wɛ̃re.

⁴U ǹ dom yĩbirimɔ, u ǹ mɑɑ doyɑmɔ

⁵mɑ n kun mɔ u wunɛ Yɑkɔbun Yinni dɑmɡii wɑ̃ɑ yeru kuɑ.

⁶Wee sɑ nuɑ mɑ woodɑn kpɑkororu tɑ wɑ̃ɑ Efɑrɑtɑɔ, mɑ sɑ tu deemɑ Yɑɑrin ɡberɔ.

⁷Su du Yinni Gusunɔn sɑ̃ɑ yerɔ, kpɑ su nùn kpunɑ.

⁸Yinni Gusunɔ, ɑ seewo kpɑ ɑ nɑ mi ɑ rɑ wɛ̃re wunɛ kɑ wunɛn woodɑn kpɑkororu tèn wɔllɔ ɑ rɑ wunɛn yiiko sɔ̃ɔsi.

⁹A de wunɛn yɑ̃ku kowobu bɑ n ɡem swĩi, kpɑ be bɑ nun nɑɑnɛ sɑ̃ɑ bɑ n nuku dobun kuuki mɔ̀.

¹⁰A ku wi ɑ ɡɔsɑ yinɑ Dɑfidi wunɛn sɔm kowon sɔ̃.

¹¹Yinni Gusunɔ u Dɑfidi ɡem sɔ̃ɔwɑ kɑ bɔ̃ri u nɛɛ, u koo win nɔɔ mwɛɛru yibiɑwɑ kɑm kɑm te u nɛɛ, Dɑfidin bibun turowɑ u koo nùn kɔsire ko win bɑndu sɔɔ.

¹²Bii be, bɑ̀ n win ɑrukɑwɑni yibiɑ, mɑ bɑ win woodɑbɑ mɛm nɔɔwɑ be u bu wɛ̃, ben bibun bweserɑ tɑ ko n bɑndu dii sere kɑ bɑɑdommɑɔ.

¹³Yinni Gusunɔ u Siɔni ɡɔsɑ. U ye ɡɔsɑ yɑ n kɑ sɑ̃ɑ win wɑ̃ɑ yeru.

¹⁴Mɑ u nɛɛ, yɑ ko n sɑ̃ɑ win wɛ̃rɑ yeru sere kɑ bɑɑdommɑɔ. U koo sinɑ mi, domi wiyɑ u ye ɡɔsɑ.

¹⁵U koo ye domɑru kuɑ, kpɑ u ye dĩɑnu wɛ̃.

¹⁶U koo yen yɑ̃ku kowobu fɑɑbɑ ko. Kpɑ be bɑ nùn nɑɑnɛ sɑ̃ɑ bu nuku dobun kuuki ko.

¹⁷Miyɑ u koo Dɑfidi wi u ɡɔsɑn dɑm sosi, kpɑ u win bweserun ɡoo swĩi, u n sɑ̃ɑ nɡe fitilɑ.

¹⁸U koo de win yibɛrɛbɑ bu sekuru wɑ. Adɑmɑ wi, win sinɑ furɔ ɡɑ ko n bɑllimɔwɑ win wiru wɔllɔ.