Read bariba Womusu 135 Bible Online

Womusu 135 - bariba bible

Womusu 135

¹I Yinni Gusunɔ siɑro. I win yĩsiru tɔmɔ. Bɛɛ win sɔm kowobu,

²bɛɛ be i sɔmburu mɔ̀ win sɑ̃ɑ yerɔ, i nùn siɑro.

³I nùn siɑro, u sɑ̃ɑwɑ tɔn ɡeo. I kɑ win yĩsiru womu koowo, u sɑ̃ɑwɑ tɔn ɡeo.

⁴Yinni Gusunɔ u tii Isirelibɑ Yɑkɔbun bweseru ɡɔsiɑ bɑ n kɑ sɑ̃ɑ wiɡibu.

⁵Nɑ yɛ̃ mɑ u kpɑ̃, mɛyɑ wi, bɛsɛn Yinni u bũnu kpuro kere.

⁶Ye u kĩ, yerɑ u rɑ ko wɔllɔ kɑ temɔ kɑ nim wɔ̃kuɔ kɑ ɡen sɔɔwɔ.

⁷U rɑ de ɡuru winu nu sɔ̃ɔsirɑ hɑnduniɑ kpuro sɔɔ. U rɑ de ɡuru mɑɑkinu nu koorɑ kpɑ u de ɡurɑ yu nɛ. Kpɑ u woo kusiɑmɑ ɡen wɑ̃ɑ yerun di.

⁸U Eɡibitiɡibun bii ɡbiikobu ɡo sere kɑ ben yɑɑ sɑbenun bii ɡbiikinɔ.

⁹U sɔm mɑɑmɑɑkiɡinu kuɑ Eɡibitiɔ u kɑ yen sinɑ boko kɑ win sɔm kowobu kpuro sɛɛyɑsiɑ.

¹⁰U bwese dɑbinu ɡo, mɑ u sinɑm dɑmɡibu ɡo.

¹¹Beyɑ, Sihoni Amɔrebɑn sunɔ kɑ Oɡu Bɑsɑnin sunɔ kɑ sere mɑɑ Kɑnɑnibɑn sinɑmbu kpuro.

¹²U sinɑm ben tem suɑ u win tɔmbu Isirelibɑ wɛ̃ bɑ tubi di.

¹³Yinni Gusunɔ, wunɛn yĩsiru tɑ ko n wɑ̃ɑwɑ sere kɑ bɑɑdommɑɔ. Bɑ ko n nun yɑɑyewɑ wɑɑti bɑɑyere sɔɔ.

¹⁴Yinni Gusunɔ u koo win tɔmbu siriɑ, kpɑ u win sɔm kowobun wɔnwɔndu wɑ.

¹⁵Bɑ bwesenun bũnun bwɑ̃ɑrokunu kuɑwɑ kɑ sii ɡeesu kɑ wurɑ. Tɔmbun nɔmɑn sɔmburɑ.

¹⁶Nu nɔsu mɔ, ɑdɑmɑ nu ku rɑ ɡɑri ɡere. Nu nɔni mɔ, ɑdɑmɑ nu ku rɑ yɑm wɑ.

¹⁷Nu swɑsu mɔ, ɑdɑmɑ nu ku rɑ ɡɑri nɔ. Nu ǹ wɛ̃siɑru mɔ nin nɔɔwɔ.

¹⁸Be bɑ nu sekumɔ kɑ be bɑ nu nɑɑnɛ sɑ̃ɑ, be kpuro bɑ sɑ̃ɑwɑ nɡe ni.

¹⁹Isirelibɑ, i Yinni Gusunɔ siɑro. Aronin bweseru, i Yinni Gusunɔ siɑro.

²⁰Lefin yɛnuɡibu, i Yinni Gusunɔ siɑro. Bɛɛ be i nùn nɑsie, i nùn siɑro.

²¹Yinni Gusunɔ u wɑ̃ɑ Yerusɑlɛmuɔ. I nùn siɑro sɑɑ Siɔnin di. I Yinni Gusunɔ siɑro.