Read bariba Womusu 140 Bible Online

Womusu 140 - bariba bible

Womusu 140

¹Womu ɡe Dɑfidi u wom kowobun wiruɡii kuɑ. Ge wee.

²Yinni Gusunɔ, ɑ mɑn wɔro tɔn kɔ̃sobun nɔmɑn di. A mɑn ɡbɑro ɡbɑnɑɡibun nɔmɑn di.

³Domi kɔ̃sɑ bɑ rɑ n bwisikumɔ ben ɡɔ̃ruɔ. Kpɑ bɑ n sɔɔru kpeere bɑɑdommɑ bu kɑ tɑbu ko.

⁴Bɑ rɑ ben yɑrɑ derewɑ nɡe wɑɑ. Kpɑ ben nɔɔ ɡɑ n dɛ̃ɛ mɔ nɡe surɔkɔru.

⁵Yinni Gusunɔ, ɑ mɑn tɔn kɔ̃so ɡbɑro. A mɑn ɡbɑnɑɡibu ɡiro be bɑ kɑsu bu mɑn surɑ.

⁶Wee tii suobu bɑ mɑn yinɑ bɛriɑmmɛ. Bɑ mɑn tɑɑ yinuɑmmɛ swɑɑ sɔɔ. Mɑ bɑ mɑn yɔɔru bwɛ̃ɛyɛ.

⁷Adɑmɑ nɑ nɛɛ, Gusunɔ, wunɑ ɑ sɑ̃ɑ nɛn Yinni. A swɑɑ tem kpĩiyɔ ɑ nɛn kɑnɑru nɔ.

⁸Yinni Gusunɔ, ɑ sɑ̃ɑwɑ ɡbɑ̃rɑru tèn mi nɑ rɑ kuke n kɑ fɑɑbɑ wɑ. A rɑ nɛn wiru bere tɑbun sɑɑ sɔɔ.

⁹A ku de tɔn kɔ̃son kĩru tu koorɑ. A ku de ye u niɑ sɑ̃ɑ yu koorɑ, kpɑ u ku rɑɑ tii suɑ.

¹⁰Be bɑ mɑn kooro buremɔ ɑ de ben torɑnu nu wɔri ben wiru wɔllɔ.

¹¹A bu dɔ̃ɔ wisio kpɑ ɑ de bu wɔri wɔru bɔkɔ sɔɔ ɡèn min di bɑ ǹ mɑɑ kpɛ̃ bu yɑri.

¹²Wi u weesu mɔ̀ u ǹ tɑ̃simɔ tem mɛ sɔɔ. Kɔ̃sɑ yɑ ko n mɑɑ ɡbɑnɑɡii swĩiwɑ sere u kɑ kɑm ko.

¹³Nɑ yɛ̃ mɑ Yinni Gusunɔ u rɑ wɔnwɔndo siriewɑ dee dee. Kpɑ u mɑɑ sɑ̃ɑro nùn win ɡem wɛ̃.

¹⁴Geemɑ, ɡemɡibu bɑ koo nun tɔmɑ kpɑ bɑ n wɑ̃ɑ wunɛn wuswɑɑɔ.