Read bariba Womusu 145 Bible Online

Womusu 145 - bariba bible

Womusu 145

¹Womu ɡe Dɑfidi u kuɑ u kɑ Gusunɔ siɑrɑ. Ge wee. Gusunɔ nɛn sinɑ boko, kon nun wɔlle suɑ. Kon wunɛn yĩsiru tɔmɑ sere kɑ bɑɑdommɑɔ.

²Tɔ̃ɔ bɑɑtere kon nun siɑrɑ. Mɛyɑ kon wunɛn yĩsiru tɔmɑ sere kɑ bɑɑdommɑɔ.

³Yinni Gusunɔ, ɑ kpɑ̃. Wunɑ n weenɛ bu siɑrɑ. Wunɛn kpɑ̃ɑru tɑ ǹ nɔru mɔ.

⁴Sɑɑ bɑɑyeren tɔmbu bu wunɛn sɔmɑ siɑro.

⁵Kon wunɛn yiikon ɡirimɑn kpɑ̃ɑru ɡere. Kpɑ n wunɛn sɔm mɑɑmɑɑkiɡinun ɡɑri kpɑrɑ kɑ womu.

⁶Bɑ koo wunɛn dɑm bɑkɑm ɡɑri ɡere, kpɑ nɛ, n mɑɑ wunɛn kpɑ̃ɑrun ɡɑri kpɑrɑ.

⁷Bɑ koo wunɛn tɔn ɡeerun kpɑ̃ɑru yɑɑyɑ kpɑ bu tɑki ko wunɛn ɡem sɔ̃.

⁸Yinni Gusunɔ, ɑ wɔnwɔndu mɔ, ɑ rɑ mɑɑ tɔmbu durom kue. A ku rɑ mɔru se fuuku. Wunɛn tɔn ɡeerɑ kpɑ̃.

⁹Yinni Gusunɔ, ɑ tɔmbu kpuro kĩ. Wunɛn wɔnwɔndu tɑ rɑ sɔ̃ɔsirewɑ wunɛn tɑkɑ koorɑ kpuro sɔɔ.

¹⁰Yinni Gusunɔ, wunɛn tɑkɑ koorɑ kpuro yɑ koo nun bɛɛrɛ wɛ̃, kpɑ be bɑ sɑ̃ɑ wunɛɡibu bu nun siɑrɑ.

¹¹Bɑ koo wunɛn bɑndun bɛɛrɛn ɡɑri ɡere, kpɑ bu wunɛn dɑm ɡɑri kpɑrɑ

¹²bu kɑ wunɛn sɔm mɑɑmɑɑkiɡinu tɔmbu sɔ̃ɔsi kɑ sere wunɛn bɑndun yiikon ɡirimɑ.

¹³Wunɛn bɑndu tɑ ko n wɑ̃ɑwɑ sere kɑ bɑɑdommɑɔ. Mɛyɑ kɑɑ n tu dii sere kɑ bɑɑdommɑɔ. Yinni Gusunɔ u rɑ win nɔɔ mwɛɛnu yibie. Ye u mɔ̀ kpuro sɔɔ, u rɑ win tɔn ɡeeru sɔ̃ɔsi [5].

¹⁴Yinni Gusunɔ, ɑ rɑ tɔn be bɑ wɔrumɑɑ dɔɔ ɡɑbe, kpɑ ɑ be bɑ dɑm dwiiyɑ tɑ̃sisiɑ.

¹⁵Tɔmbu kpurowɑ bɑ mɛɛrɑ wunɛn mi ɡiɑ kɑ yĩiyɔbu, domi wunɑ ɑ rɑ bu dĩɑnu wɛ̃ nin sɑɑ sɔɔ.

¹⁶A rɑ wunɛn nɔmɑ dɛmiɛ kpɑ ɑ hunde koni bɑɑyere wɛ̃ yèn bukɑtɑ yɑ mɔ.

¹⁷Yinni Gusunɔ, ɑ sɑ̃ɑwɑ ɡemɡii wunɛn swɛɛ kpuro sɔɔ. Mɛyɑ ɑ rɑ mɑɑ wunɛn wɔnwɔndu sɔ̃ɔsi sɔmɑ ye ɑ mɔ̀ kpuro sɔɔ.

¹⁸Yinni Gusunɔ, be bɑ nun sokumɔ kɑ ɡɔ̃ru dɛɛrɔ, ben bɔkuɔrɑ ɑ rɑ n wɑ̃ɑ.

¹⁹A rɑ be bɑ nun nɑsie kĩru yibie kpɑ ɑ ben wuri nɔ ɑ bu fɑɑbɑ ko.

²⁰A rɑ be bɑ nun kĩ kɔ̃su kpɑ ɑ tɔn kɔ̃sobu kɑm koosiɑ.

²¹Kon wunɛ Yinni Gusunɔ tɔmɑ kpɑ tɔmbu kpuro bu wunɛn yĩsi dɛɛrɑru bɛɛrɛ wɛ̃ sere kɑ bɑɑdommɑɔ.