Read bariba Womusu 147 Bible Online

Womusu 147 - bariba bible

Womusu 147

¹I Yinni Gusunɔ siɑro. Domi n wɑ̃ bu Gusunɔ bɛsɛn Yinni siɑrɑ. N mɑɑ wɑ̃ bu nùn tɔmɑ.

²Yinni Gusunɔ u Yerusɑlɛmu seeyɑmɔ. U Yerusɑlɛmuɡii be bɑ rɑɑ yoru mwɛɛrɑ mɛnnɑmɔ.

³U be bɑ nuki sɑnkire nukuru yɛmiɑsiɑmɔ. U ben mɛɛrɑn bosu bɔkumɔ.

⁴U kperi ɡɑrimɔ mɑ u yin bɑɑyere yĩsiru kɛ̃mɔ.

⁵Bɛsɛn Yinni u kpɑ̃, u mɑɑ dɑm mɔ. Win bwisi kun nɔru mɔ.

⁶Yinni Gusunɔ u rɑ wɔnwɔndobu nɔɔri. Kpɑ u tɔn kɔ̃sobu surɑ sere temɔ.

⁷I Yinni Gusunɔ siɑrɑbun womusu kuo. I Gusunɔ bɛsɛn Yinni siɑro kɑ mɔrɔku.

⁸U rɑ de ɡuru wiru tu wɔllu wukiri, kpɑ u ɡurɑ sɔɔru kuɑ yu kɑ nɛ tem sɔɔ, kpɑ u yɑkɑsu kpiisiɑ ɡuunu wɔllɔ.

⁹Wiyɑ u rɑ yɑɑ sɑbenu dĩɑnu wɛ̃, kpɑ u ɡunɔ binu dĩɑnu wɛ̃ sɑnɑm mɛ nu kuuki mɔ̀.

¹⁰Win nɑɑnɛ kun wɑ̃ɑ dumin dɑm sɔɔ. Win yĩiyɔbu kun mɑɑ wɑ̃ɑ tɔnun dukɑn dɑm sɔɔ.

¹¹Be bɑ nùn nɑsie kɑ be bɑ win durom yĩiyɔ, beyɑ u kĩ.

¹²Yerusɑlɛmu, ɑ Yinni Gusunɔ siɑro. Siɔni, ɑ Gusunɔ wunɛn Yinni bɛɛrɛ wɛ̃ɛyɔ.

¹³Domi wiyɑ u rɑ wunɛn kɔnnɔn ɡɑmbon sɛ̃retii dɑm sire, kpɑ u wunɛn tɔmbu domɑru kuɑ.

¹⁴U rɑ de bɔri yɛndu tɑ n wɑ̃ɑ wunɛn temɔ. Kpɑ u de ɑlikɑmɑ yɑ n yibɑ wunɛ sɔɔ.

¹⁵U rɑ win woodɑbɑ nɔɔsie hɑnduniɑ sɔɔ. Win ɡɑri yi rɑ dukɑ dewɑ fuuku fuuku.

¹⁶U rɑ de nim kperuɡim mu nɛ, kpɑ mu n buriri nɡe yɑ̃ɑ sɑnsu. U rɑ de ɡuru kpenu nu nɛ kpɑ nu n sɑ̃ɑ nɡe torom.

¹⁷U rɑ n ɡuru kpee ni kɑsi mɔ̀wɑ tiɑ tiɑ. Wɑrɑ koo kpĩ u yɔ̃rɑ u yen wooru mɑ.

¹⁸Ù n ɡɑri ɡeruɑ, nim kperuɡim mɛ, mu rɑ yɑndewɑ. Ù n mɑɑ derɑ woo ɡɑ mu swee, mu rɑ kokuwɑ mu doonɑ.

¹⁹U win ɡɑri kɑ win woodɑbɑ kɑ win ɡere Yɑkɔbu wi bɑ mɔ̀ Isireli sɔ̃ɔwɑ.

²⁰U ǹ bweseru ɡɑru kue mɛ. Ten ɡɑru tɑ ǹ mɑɑ win woodɑbɑ yɛ̃. Yen sɔ̃, i Yinni Gusunɔ siɑro.