Read bariba Womusu 2 Bible Online

Womusu 2 - bariba bible

Womusu 2

¹Yinni Gusunɔ u ɡoo ɡɔsɑ u bɑndu wɛ̃. Mbɑn sɔ̃nɑ sinɑmbu bɑ nùn seesimɔ. Mbɑn sɔ̃nɑ tem yɛ̃robu bɑ nùn seesimɔ. Mbɑn sɔ̃nɑ tem wiruɡibu bɑ tɑbun sɔɔru mɔ̀. Mbɑn sɔ̃nɑ bwesenu nu ɑrukɑwɑni bɔkumɔ. Mbɑn sɔ̃nɑ tɔmbɑ nɔɔ tiɑ mɔ̀ bɑ mɔ̀,

³su ben dɑm buɑ, su tii yɑkiɑ ben yorun di.

⁴Bɑ n yɛ̃ mɑ kɑmɑ mi, domi Gusunɔ u bu yɛ̃ɛmɔ. Yinni u sɔ̃ wɔllɔ u bu yɑɑkoru mɔ̀. U sunɔ wi u ɡɔsɑ swĩi kɔ win ɡuurɔ te bɑ mɔ̀ Siɔni. Yen sɔ̃, i n tii sɛ, kpɑ u ku bɛɛ sɛɛyɑsiɑ kɑ mɔru, kpɑ i nɑndɑ win mɔru bɑkɑn sɔ̃.

⁷Sunɔ wi, u nɛɛ, kon kpɑrɑ ye Yinni Gusunɔ u mɑn sɔ̃ɔwɑ. U nɛɛ, ɡisɔ nɑ kuɑ win bii. Gisɔ u kuɑ nɛn tundo.

⁸U mɑn sɔ̃ɔwɑ u nɛɛ, nɑ̀ n nùn bwesenu kpuro kɑnɑ, u koo mɑn nu wɛ̃. Nɑ̀ n nùn hɑnduniɑn ɡoonu nnɛ kɑnɑ, u koo mɑn ye wɛ̃.

⁹U mɑɑ mɑn sɔ̃ɔwɑ u nɛɛ, kon kpĩ n bu kpɑrɑ nɡe wi u kpɑrɑmɔ kɑ sii bokuru, kon kpĩ n bu kɔsuku nɡe weke te bɑ mɔmɑ.

¹⁰Tɛ̃, bɛɛ sinɑmbu, bɛɛ be i tem kpɑre, i kirɔ yeni swɑɑ dɑkio. Bɛɛ sinɑmbu, bɛɛ be i tem kpɑre, i yɛ̃ru kɑsuo.

¹¹I Yinni Gusunɔ sɑ̃ɑwɔ kɑ bɛɛrɛ. I Yinni Gusunɔ wiru kpĩiyɔ kɑ nɑsiɑru,

¹²kpɑ u ku rɑɑ mɔru ko subɑru sɔɔ. Domi win mɔru yɑ̀ n seewɑ, u koo de i kɑm ko. Adɑmɑ doo nɔɔruɡibɑ be bɑ nùn nɑɑnɛ sɑ̃ɑ kpuro.