Read bariba Womusu 22 Bible Online

Womusu 22 - bariba bible

Womusu 22

¹Dɑfidin womu ɡe u wom kowobun wiruɡii kuɑ. U nɛɛ,

²Gusunɔ, nɛn Yinni, mbɑ n kuɑ ɑ kɑ mɑn deri. Mbɑn sɔ̃nɑ ɑ ǹ mɑn swɑɑ dɑki sɑnɑm mɛ nɑ nun weeweenu koosimɔ. Mbɑn sɔ̃nɑ ɑ ǹ mɑn fɑɑbɑ kue.

³Mbɑn sɔ̃nɑ ɑ ku rɑ mɑn wurɑri sɑnɑm mɛ nɑ nun sokɑ sɔ̃ɔ sɔɔ. Mbɑn sɔ̃nɑ ɑ ku rɑ mɑn wisi sɑnɑm mɛ nɑ nun kɑnɑ wɔ̃kuru.

⁴Wunɑ ɑ sere sɑ̃ɑ Dɛɛro, ɑ sɔ̃ wunɛn sinɑ kitɑrɔ. Isirelibɑ bɑ nun tɔmɑmɔ.

⁵Wunɑ bɛsɛn sikɑdobɑ bɑ nɑɑnɛ kuɑ, mɑ ɑ bu yɑkiɑ.

⁶Bɑ nun somiru kɑnɑ, mɑ ɑ bu fɑɑbɑ kuɑ. Bɑ nun nɑɑnɛ kuɑ, mɑ ɑ bu sekuru yɑrɑ.

⁷Adɑmɑ nɛ, nɑ mɑɑ sɑ̃ɑwɑ tɔnu mi? Aɑwo, nɑ sɑ̃ɑwɑ nɡe kɔkɔbu. Mɑ tɔmbɑ mɑn yɑɑkoru mɔ̀, bɑ mɑn ɡɛmɑ.

⁸Be bɑ mɑn wɑ kpuro, bɑ rɑ n mɑn yɛ̃ɛmɔwɑ, bɑ n mɑn nɔɔ swiikinu mɔ̀, bɑ n wii ɡimɑnu koosimɔ, bɑ n mɔ̀,

⁹nɑ nɛn tii Gusunɔ nɔmu sɔndiɑ. Mbɑn sɔ̃nɑ u ǹ mɑn fɑɑbɑ kue. Ù n mɑn kĩn nɑ, mbɑn sɔ̃nɑ u ǹ mɑn yɑkie.

¹⁰Adɑmɑ Yinni Gusunɔ, wunɑ ɑ mɑn yɑrɑ nɛn mɛron nukurun di. Wunɑ ɑ mɑn bwɛ̃ɛ dorɑ wɛ̃ ye nɑ nɛn mɛron bom nɔrumɔ.

¹¹Wunɑ ɑ mɑn kɔ̃su sɑɑ mìn di bɑ mɑn mɑrɑ. Wunɑ ɑ sɑ̃ɑ nɛn Yinni sɑɑ nɛn mɛron nukurun di.

¹²A ku kɑ mɑn tondɑ, domi nɔni swɑ̃ɑrɑ mɑn turuku koosimɑ. Goo mɑɑ sɑri wi u koo mɑn somi.

¹³Yibɛrɛ dɑbinu nu mɑn sikerenɛ nɡe nɑɑ kinɛ ni nu ɡɔbu. Bɑ mɑn kooro bure nɡe Bɑsɑnin kɛtɛ ɡɔbi.

¹⁴Bɑ mɑn kukirisimɔ nɡe ɡbee sunɔ ɡe ɡɑ yɑɑ kɑsu.

¹⁵Nɛn dɑm mu doonɑ nɡe nim mɛ mu yɑri yɑni sɛɛri sɔɔ. Nɛn kukunun ɡbin ɡbinkɑ kpuro sɔsikiɑnɑ. Nɛn mwiɑ doonɑ nɡe ɡum mɛ mu yɑndɑ.

¹⁶Nɛn ɡɔ̃ru ɡɑ ɡberɑ nɡe sɔndu, mɑ nɛn yɑrɑ yɑ nɛn dɑro mɑni. Nɑ kpĩ yɑnim sɔɔ nɡe ɡoru.

¹⁷Domi yibɛrɛ dɑbinɑ nu mɑn kooro bure bɑɑmɑ nɡe ɡbeeku bɔ̃nu. Bɑ nɛn nɔmɑ kɑ nɛn nɑɑsu yɑburɑ.

¹⁸Nɑ woore sere nɛn kukunu kpuro nu sɔ̃ɔsire. Tɔmbu bɑ mɑn mɛɛrɑ bɑ nɔɔ yɑɑre.

¹⁹Bɑ nɛn yɑ̃nu bɔnu mɔ̀ ben tii tiinɛ sɔɔ. Mɑ bɑ nɛn yɑbe bɑkɑru tɛtɛ toosimɔ.

²⁰Wunɛ Yinni Gusunɔ, wunɑ ɑ sɑ̃ɑ nɛn dɑm. A kun kɑ mɑn tonde mɛ. A nɑ fuuku ɑ mɑn fɑɑbɑ ko.

²¹A mɑn wɔro yibɛrɛbɑn tɑkobin di. Bɑ dɑm mɔ nɡe ɡbeeku bɔ̃nu. A nɛn wɑ̃ɑru wɔro ben nɔmɑn di.

²²Bɑ mɑn wɔrimɔ nɡe ɡbee sinɑnsu. Bɑ mɑn kooro buremɔ nɡe kɛtɛ ɡbeekinu.

²³Kon nɛɡibu kpuro wunɛn ɡɑri sɔ̃. Kon nun siɑrɑ mi bɑ mɛnnɛ.

²⁴Yɑkɔbun bweseru, bɛɛ be i Yinni Gusunɔ nɑsie, i nùn siɑro. Bɛɛ Isirelibɑ, Yɑkɔbun bweseru, i nùn tɔmɔ. Bɛɛ Isirelibɑ, i nùn sɑ̃ɑwɔ.

²⁵Domi u ku rɑ nɔni swɑ̃ɑruɡiin wɑhɑlɑ yɑɑkoru ko. U ku rɑ mɑɑ ye ɑtɑfiiru ko. U ku rɑ nùn biru kisi. U rɑ win sokuru wurewɑ.

²⁶Kon nun siɑrɑ sɑnɑm mɛ be bɑ nun nɑsie bɑ mɛnnɛ. Kon nɛn nɔɔ mwɛɛnu yibiɑ ben bɑɑwuren wuswɑɑɔ.

²⁷Sɑ̃ɑrobu bɑ koo di bu debu. Be bɑ Yinni Gusunɔ kɑsu, berɑ bɑ koo nùn siɑrɑ. Kpɑ ben hunde yu dɑkɑɑ dɑ.

²⁸Hɑnduniɑn ɡoonu nnɛn tɔmbu bɑ koo Yinni Gusunɔ yɑɑyɑ kpɑ bu ɡɔsirɑmɑ win mi. Bwesenu kpuro nu koo yiirɑ win wuswɑɑɔ.

²⁹Domi Yinni Gusunɔwɑ u sɑ̃ɑ sunɔ. U bɑndu dii bwesenu kpuron wɔllɔ.

³⁰Bɑɑ hɑnduniɑn dɑmɡibu bɑ koo nùn kpunɑ. Tɔmbu kpurowɑ bɑ koo nùn yiirɑ.

³¹Be bɑ koo mɑrurɑ, bɑ koo bu Yinni Gusunɔn ɡɑri sɔ̃. Be bɑ ǹ ɡinɑ nɛ duniɑ sɔɔ, bɑ koo win ɡɑri kpɑrɑ, kpɑ bu ben bibu sɔ̃ ye u win tɔmbu kuɑ, kpɑ be kpuro bu nùn sɑ̃.