Read bariba Womusu 27 Bible Online

Womusu 27 - bariba bible

Womusu 27

¹Dɑfidin womu. Yinni Gusunɔwɑ u rɑ nɛn swɑɑ yɑm bururɑsie, u mɑn fɑɑbɑ mɔ̀. Nɑ ǹ ɡoon bɛrum mɔ. Yinni Gusunɔ u sɑ̃ɑwɑ nɛn kuku yeru. Nɑ ǹ ɡɑ̃ɑnun bɛrum mɔ.

²Nɛn yibɛrɛbɑ bɑ̀ n mɑn wɔrimɑ bu kɑ mɑn ɡo, bɑ ǹ mɑn wɑsi. Kɔ̃sɑn kowobu bɑ̀ n mɑn susimɑ bu kɑ mɑn nɔni sɔ̃, ɡɑ̃ɑnu kun mɑn mɔ̀. Be kpurowɑ bɑ koo wɔruku.

³Nɛn yibɛrɛbɑ bɑ̀ n mɑn sikerenɑ bɑ mɑn tɑbu wɔrimɑ, nɛn tororɑ kun kɑrɑmɔ. Gusunɔwɑ ko nɑ n nɑɑnɛ sɑ̃ɑ.

⁴Gɑ̃ɑ teenɑ nɑ Gusunɔ kɑnɑmɔ ni nu mɑn nɛni ɡem ɡem. Niyɑ, nɑ n wɑ̃ɑ kɑ wi, win wɑ̃ɑ yerɔ nɛn wɑ̃ɑrun tɔ̃ru kpuro sɔɔ. Kpɑ n win durom dendɑ kpɑ nɑ n nùn sɑ̃ɑmɔ.

⁵Domi u koo mɑn bere win wɑ̃ɑ yerɔ nɔni swɑ̃ɑrun sɑnɑm, kpɑ u kɑ mɑn dɑ kperu wɔllɔ mi ɡoo kun mɑn nɑɑ turi.

⁶Yen sɔ̃nɑ kon kpĩ n nɛn yibɛrɛbɑ yɛ̃ɛ be bɑ kɑ mɑn sikerenɛ. Kon dɑ Yinni Gusunɔn wɑ̃ɑ yee dɛɛrɑru mi, kpɑ n nùn yɑ̃kunu kuɑ, kpɑ n nùn siɑrɑ kɑ womusu.

⁷Yinni Gusunɔ, nɑ nun soku. A nɛn nɔɔ nɔɔwɔ. A nɛn wɔnwɔndu wɑɑwo. A mɑn wurɑrio.

⁸Wunɑ ɑ nɛɛ, bu nun sɑ̃ɑwɔ. Wee, nɑ nun sɑ̃ɑmɔ.

⁹Nɑ sɑ̃ɑwɑ wunɛn sɔmɔ. A ku mɑn biru kisi. A ku mɑn ɡirɑ kɑ mɔru. Wunɑ ɑ rɑ mɑn somi. A ku mɑn deri. Gusunɔ nɛn Fɑɑbɑ kowo, ɑ ku mɑn yinɑ.

¹⁰Nɑ yɛ̃ mɑ bɑɑ nɛn tundo kɑ nɛn mɛro bɑ̀ n mɑn yinɑ, wunɛ Yinni Gusunɔ, kɑɑ mɑn mwɑ.

¹¹Yinni Gusunɔ, ɑ mɑn wunɛn swɑɑ sɔ̃ɔsio kpɑ ɑ de n sĩ dee dee ye sɔɔ, domi nɛn yibɛrɛbɑ bɑ dɑbi.

¹²A ku mɑn bɛri yibɛrɛbɑn nɔmɑɔ. A ku de bu mɑn kuɑ ye nɑ ǹ kĩ. Domi seedɑ dio weesuɡibu bɑ mɑn seesimɔ, be, be bɑ dɑm dɔrebun wɑsikirɑnu mɔ̀.

¹³Nɑ yĩiyɔbu mɔ mɑ kon Yinnin durom dendɑ, wɑsobun suunu sɔɔ.

¹⁴Yen sɔ̃, ɑ n Yinni Gusunɔ nɑɑnɛ sɑ̃ɑ. A ku mwiɑ kpɑnɑ. A de wunɛn tororu tɑ n sɔ̃ sim sim. A n Yinni Gusunɔ nɑɑnɛ sɑ̃ɑ.