Read bariba Womusu 29 Bible Online

Womusu 29 - bariba bible

Womusu 29

¹Dɑfidin womu. Bɛɛ be i wɑ̃ɑ wɔllɔ, i Yinni Gusunɔ siɑro win yiiko kɑ win dɑm sɔ̃.

²I win yĩsiru wɔlle suo, kpɑ i yiirɑ win wuswɑɑɔ win dɛɛrɑrun sɔ̃.

³Yinni Gusunɔ yiiko kpuroɡii u derɑ ɡurɑ yɑ ɡbɑ̃rɑmɔ. Win nɔɔ ɡɑ nɔɔrɑ ɡuru winu sɔɔ. U dɑm mɔ nim bɑkɑm wɔllɔ.

⁴Win nɔɔ ɡɑ nɔɔrɑ kɑ dɑm kɑ yiiko.

⁵Win nɔɔ ɡe, ɡɑ Libɑnin dɑ̃ɑ dɑmɡinu bɛsukumɔ.

⁶U derɑ Libɑnin ɡuunu nu yɔ̃ɔkumɔ nɡe kɛtɛ kpɛmminu. Mɑ ɡuu te bɑ mɔ̀ Hɛɛmɔɔ tɑ suɑrɑ dikɑ nɡe kɛtɛ ɡbeeku kpɛmbu.

⁷Win nɔɔ ɡɑ derɑ ɡuru mɑɑkinu koorɑmɔ.

⁸Win nɔɔ ɡɑ nɔɔrɑ, mɑ ye yɑ wɑ̃ɑ Kɑdɛsin ɡbɑburɔ kpuro yɑ diirɑ.

⁹U ɡbɑ̃rɑ sere nɛm ɡurɑɡinu nu nɑndɑ nu mɑrɑ. Mɑ dɑ̃nu kpuron wurusu dɛllɑ sɔ̃ɔwɔ. Yerɑ win sinɑ kpɑɑrun di bɑ mɔ̀, yiikoɡiiwɑ Yinni Gusunɔ.

¹⁰Wiyɑ u dɑm mɔ nim wɔllɔ. Wiyɑ u ko n sɑ̃ɑ sunɔ sere kɑ bɑɑdommɑɔ.

¹¹Wiyɑ u koo mɑɑ tɔmbu dɑm kɛ̃. Wiyɑ u koo bu domɑru kuɑ u bu bɔri yɛndu wɛ̃.