Read bariba Womusu 30 Bible Online

Womusu 30 - bariba bible

Womusu 30

¹Womu ɡe Dɑfidi u kuɑ bu kɑ Yinni Gusunɔn sɑ̃ɑ yeru wukiɑ. U nɛɛ,

²Yinni Gusunɔ, kon wunɛn kpɑ̃ɑru kpɑrɑ. Domi ɑ mɑn yɑrɑ sɑɑ wɔrun di. A ǹ mɑɑ dere nɛn yibɛrɛbɑ bu mɑn yɛ̃ɛ.

³Gusunɔ nɛn Yinni, nɑ nun nɔɔɡiru sue nɑ fɑɑbɑ kɑnɑ, mɑ ɑ mɑn bɛkiɑ.

⁴A mɑn wɔrɑ ɡɔɔn nɔmɑn di, mɑ ɑ derɑ sɑ tondinɛ kɑ be bɑ ɡu.

⁵I Yinni Gusunɔ siɑro kɑ womusu, bɛɛ be i kɑ nùn yɔ̃ dim dim. I win yĩsi dɛɛrɑ te wɔlle suo.

⁶Domi win mɔru ku rɑ tɛ. Adɑmɑ u rɑ tɔnu durom kuewɑ win wɑ̃ɑru kpuro sɔɔ. Nuku sɑnkirɑnu nù n nùn deemɑ yokɑ, sisiru bururu, u rɑ deemɛ nuku doo bɑkɑbɑ.

⁷Nɑ rɑɑ nɛɛ, nɛn nuku doo bini sɔɔ, nɑ ǹ sokurɑmɔ pɑi.

⁸Yinni Gusunɔ, wunɛn sɑɑbuwɑ nɑ kɑ wɑ̃ɑ bɔri yɛndu sɔɔ nɡe wi u kukuɑ kpee bɑɑ sɔɔ. Adɑmɑ ye ɑ wunɛn wuswɑɑ beruɑ, nɛn lɑɑkɑri yɑ burisinɑ.

⁹Yen biruwɑ nɑ nɔɔɡiru suɑ nɑ nun somiru kɑnɑ.

¹⁰Nɑ nɛɛ, mbɑ kɑɑ wɑ ɑ̀ n mɑn ɡo, ɑ mɑn doke siki wɔruɔ. Nɑ̀ n ɡɔsirɑ tuɑ, kon kpĩ n nun sɑ̃? Kon kpĩ n wunɛn ɡem ɡɑri kpɑrɑ?

¹¹Yinni Gusunɔ, ɑ mɑn swɑɑ dɑkio, kpɑ ɑ mɑn durom kuɑ. Yinni, ɑ mɑn somiɔ.

¹²Wee tɛ̃, nɛn nuku sɑnkirɑru tɑ kuɑ nuku dobu. A nɛn sɑɑki ye nɑ wukiri nuku sɑnkirɑrun sɔ̃ wunɑ. Mɑ ɑ mɑn tɔ̃ɔ bɑkɑ yɑ̃nu sebusiɑ n kɑ nuku dobu ko.

¹³Nɛn bwɛ̃rɑ yɑ koo nun bɛɛrɛ wɛ̃ kɑ womusu, nɑ ǹ nɔɔ mɑrimɔ. Gusunɔ nɛn Yinni, wunɑ kon siɑrɑ sere kɑ bɑɑdommɑɔ.