Read bariba Womusu 31 Bible Online

Womusu 31 - bariba bible

Womusu 31

¹Womu ɡe Dɑfidi u wom kowobun wiruɡii kuɑ. U nɛɛ,

²Yinni Gusunɔ, wunɑ ɑ sɑ̃ɑ nɛn kuku yeru. A ku de n sekuru wɑ. A mɑn wɔro domi wunɑ ɑ sɑ̃ɑ ɡemɡii.

³A mɑn swɑɑ dɑkio. A mɑn wɔro fuuku. A de ɑ n sɑ̃ɑ nɛn kpee bɑɑ kɑ nɛn ɡbɑ̃rɑru mi kon kpĩ n kuke, kpɑ n kɑ fɑɑbɑ wɑ.

⁴A mɑn kpɑro kpɑ bu wɑ mɑ ɑ nɑɑnɛ mɔ, kpɑ nɑ n kukuɑ wunɛn mi.

⁵Mɛyɑ kɑɑ mɑn yɑrɑ sɑɑ tɑɑ ye bɑ mɑn bɛrien di, domi wunɑ ɑ mɑn kɔ̃su.

⁶Nɑ nun nɛn wɑ̃ɑru nɔmu sɔndiɑ, domi wunɑ ɑ mɑn wɔrɑ Yinni Gusunɔ, wunɛ wi ɑ nɑɑnɛ mɔ.

⁷Nɑ be bɑ bũnu sɑ̃ɑmɔ tusɑ, mɑ nɑ nun nɑɑnɛ sɑ̃ɑ.

⁸Ko nɑ n wɑ̃ɑwɑ nuku dobu sɔɔ wunɛn durom sɑɑbu, domi ɑ nɛn nɔni swɑ̃ɑru yɛ̃. Mɛyɑ ɑ mɑɑ yɛ̃ nɡe mɛ nɑ nuki sɑnkire.

⁹A mɑn wɔrɑ yibɛrɛbɑn nɔmɑn di. Wee ɑ derɑ nɑ tii mɔ.

¹⁰Yinni Gusunɔ, ɑ mɑn durom kuo. Domi nɑ wɑ̃ɑ nuku sɑnkirɑru sɔɔ. Nuku sɑnkirɑ te, tɑ derɑ nɛn bwɛ̃rɑ kɑ nɛn wuswɑɑ kɑ nɛn wɑsi kpuro burisinɛ.

¹¹Wɑhɑlɑ yɑ mɑn ɡoomɔ, mɑ weeweenu derɑ nɑ tɔkɔ mɔ̀. Nɛn dɑm mu doonɔ nɛn torɑrun sɔ̃, mɑ nɛn ɡɔmɑ dwiiyɑmɔ.

¹²Nɛn yibɛrɛbɑ bɑ mɑn sekuru doke, mɑ be bɑ sɑ̃ɑ nɛɡibu bɑ tu sosimɔ. Be bɑ mɑn yɛ̃, beyɑ bɑ nɛn bɛrum mɔ̀. Bɑ̀ n kɑ mɑn yinnɑ swɑɑɔ, bɑ rɑ duki suwɑ.

¹³Tɔmbɑ mɑn duɑri nɡe wi u ɡu. Nɑ sɑ̃ɑwɑ nɡe ɡɑ̃ɑ ni bɑ kɔ̃.

¹⁴Nɑ nɔɔmɔ kɔ̃sɑ ye tɔmbɑ ɡerumɔ nɛn sɔ̃. Mɑ be bɑ mɑn sikerenɛ kpuron bɛrum mɑn mɔ̀. Domi bɑ wesiɑnɑmɔ bu kɑ mɑn ɡo.

¹⁵Adɑmɑ Yinni Gusunɔ, wunɑ nɑ nɑɑnɛ sɑ̃ɑ. Domi wunɑ ɑ sɑ̃ɑ nɛn Yinni.

¹⁶Nɛn siɑn wɑ̃ɑru kpuro wunɛn nɔmu sɔɔrɑ tɑ wɑ̃ɑ. A mɑn wɔro sɑɑ nɛn yibɛrɛbɑ kɑ be bɑ mɑn nɔni sɔ̃ɔmɔn nɔmɑn di.

¹⁷A mɑn wunɛn yɑm bururɑm sɔ̃ɔsio. A mɑn wɔro wunɛn durom sɔ̃.

¹⁸Yinni Gusunɔ, nɑ̀ n nun sokɑ, ɑ ku de n sekuru wɑ. Adɑmɑ ɑ de tɔn kɔ̃so u sekuru wɑ, kpɑ u dɑ ɡɔribun wɑ̃ɑ yerɔ ɡɔɔ u nùn nɔɔ mɑrisiɑ.

¹⁹A ku de wee kowobu bu ɡɑri ɡere, kɑ be bɑ tii suɑ ɡɑri mɔ̀, bɑ ɡɑbu ɡɛmɑ.

²⁰Yinni Gusunɔ, wunɛn durom mu kpɑ̃, mɛ ɑ be bɑ nun nɑsie yiiye, kɑ be bɑ ben nɑɑnɛ doke wunɛ sɔɔ. Tɔmbu bɑ koo kpĩ bu wɑ durom mɛ ɑ rɑ bu kue.

²¹Domi ɑ rɑ be bɑ nun nɑsie kɔ̃su, kpɑ bɑ n wɑ̃ɑ wunɛn wuswɑɑɔ bu ku kɑ du nɑɑnɑɑnu sɔɔ, kpɑ ɑ bu bere wunɛn dirɔ tɔn kɔ̃sobun sɔ̃.

²²Yinni Gusunɔ, wunɑ kon siɑrɑ, domi ɑ mɑn wunɛn durom sɔ̃ɔsi. Nɑ rɑɑ sɑ̃ɑwɑ nɡe wuu ɡe bɑ tɑrusi,

²³sere nɛn lɑɑkɑri yɑ burisinɑ, nɑ nɛɛ, wee ɑ mɑn ɡirɑ wunɛn wuswɑɑn di. Adɑmɑ ɑ nɛn weeweenu nuɑ sɑnɑm mɛ nɑ nɔɔɡiru suɑ nɑ nun sokɑ.

²⁴Yen sɔ̃, i Yinni Gusunɔ kĩɔ, bɛɛ be i nùn nɑɑnɛ sɑ̃ɑ. Domi u be bɑ nùn nɑɑnɛ doke kɔ̃su. Adɑmɑ u rɑ be bɑ tii sue sɛɛyɑsie kɑ dɑm.

²⁵Bɛɛ be i yĩiyɔbu mɔ Yinni Gusunɔn mi, i nukuru doro, kpɑ i de bɛɛn bwɛ̃rɑ yu wurɑmɑ.