Read bariba Womusu 32 Bible Online

Womusu 32 - bariba bible

Womusu 32

¹Dɑfidin womu. Doo nɔɔruɡiiwɑ wìn torɑnu bɑ suuru kuɑ, mɑ bɑ win durum wunɑ.

²Doo nɔɔruɡiiwɑ wìn kɔ̃sɑ Yinni Gusunɔ kun ɡɑrisi, mɑ u ǹ mɑɑ keetɑ mɔ win ɡɔ̃ruɔ.

³Sɑnɑm mɛ nɑ ǹ nɛn durum wure, nɛn kukunu ɡbisɑ, nɑ weeweenu kuɑ tɔ̃ɔ ɡiriru,

⁴domi wunɛn nɔmu ɡɑ mɑn sɛ̃re bururu kɑ yokɑ. Nɛn dɑm mu dɛllɑ nɡe mɛ dɑ̃ɑ wurusu su rɑ ko sɔ̃ɔ sɑ̃rerun sɑɑ.

⁵Nɑ nɛɛ, kon nɛn torɑnu wurɑ wunɛ Yinni Gusunɔn mi. Nɑ nɛn durum tuubɑ kuɑ wunɛn mi, nɑ ǹ nɛn kɔ̃sɑ beruɑ. Mɑ ɑ mɑn nɛn durum tɑɑrɛ wunɑri.

⁶Yen sɔ̃, n weenɛ bɑɑwure wi u nun nɑɑnɛ sɑ̃ɑ u nun kɑnɑ wɑhɑlɑn sɑɑ sɔɔ. Bɑɑ nim bɑkɑm mù n yibɑ mu sɑrɑ, mu ǹ yɛ̃ro turi.

⁷Wunɑ sɑ̃ɑ nɛn kuku yeru, ɑ rɑ mɑn ɡbɑre wɑhɑlɑn di. A derɑ nɑ womusu mɔ̀ wunɛn fɑɑbɑn sɔ̃.

⁸Yinni Gusunɔ, ɑ nɛɛ, kɑɑ mɑn keu ko, kpɑ ɑ mɑn swɑɑ sɔ̃ɔsi ye n weenɛ n swĩi. Kɑɑ mɑn bwisi kɛ̃, kpɑ ɑ n mɑn kɔ̃su.

⁹A mɑɑ nɛɛ, n ku ko bwisi sɑriruɡii nɡe dumɑ, ǹ kun mɛ nɡe birɑkɔ, yìn nɔɔwɔ bɑ ǹ koo ko bɑ kun yɑrukɑ kɑ kɑrɑbɑsuuru doke, bɑ n kɑ yi ɡɑwe, kpɑ yi ku rɑɑ tɔnu wɔri.

¹⁰Tɔn kɔ̃sobun wɑhɑlɑ kpɑ̃, ɑdɑmɑ wi u Yinni Gusunɔ nɑɑnɛ sɑ̃ɑ, win durom mu rɑ n yɛ̃ro wɑ̃ɑsiwɑ.

¹¹Yen sɔ̃, bɛɛ ɡemɡibu, i ɡɔ̃ru doro Yinni Gusunɔ sɔɔ, kpɑ i dɛsinu kɑrɑ. Bɛɛ bèn ɡɔ̃ru ɡɑ dɛɛre, i ɡuudɑ koowo kɑ nuku dobu, bɛɛ kpuro.