Read bariba Womusu 34 Bible Online

Womusu 34 - bariba bible

Womusu 34

¹Dɑfidi u tii ɡɔsiɑ wiiro Abimɛlɛkin wuswɑɑɔ, yerɑ durɔ wi, u nùn ɡirɑ win min di. Sɑɑ yerɑ Dɑfidi u womu ɡeni kuɑ u nɛɛ,

²nɑ kon Yinni Gusunɔ siɑrɑ sɑɑ bɑɑyere. Mɛyɑ nɛn nɔɔ ɡɑ ǹ mɑrimɔ nɑ kun nùn tɔmɛ.

³Yinni Gusunɔ sɔɔrɑ kon yɛ̃ɛri. Bɛɛ wɔnwɔndobu, i swɑɑ dɑkio, kpɑ i ɡɔ̃ru dorɑ.

⁴I kɑ mɑn Yinni Gusunɔ wɔlle suo, su win yĩsiru bɛɛrɛ wɛ̃ sɑnnu.

⁵Nɑ Yinni Gusunɔ sokɑ, mɑ u mɑn wurɑri, u mɑn yɑrɑ nɛn bɛrum kpuron di.

⁶Be bɑ nùn wuswɑɑ kisi, bɑ rɑ n nuku dobu mɔwɑ. Bɑ ǹ mɑɑ ben wuswɑɑ wukirimɔ sekurun sɔ̃.

⁷Yinni Gusunɔ u rɑ wɔnwɔndon sokuru nɔ. Mɛyɑ u rɑ mɑɑ nùn yɑre nuku sɑnkirɑnu kpuron di.

⁸Win ɡɔrɑdo u rɑ be bɑ nùn nɑsie kɔ̃su, kpɑ u bu yɑrɑ kɑrin di.

⁹I nɑ, i win durom dendɑ kpɑ i wɑ nɡe mɛ mu kpɑ̃. Doo nɔɔruɡiiwɑ wi u kuku yeru kɑsu win mi.

¹⁰Bɛɛ be i sɑ̃ɑ wiɡibu, i nùn nɑsio. Domi be bɑ nùn nɑsie, ɡɑ̃ɑnu ku rɑ bu kɔmiɛ.

¹¹Bɑɑ ɡbee sunɔ kpɛmu ɡɑ rɑ ɡɑsɔ bie ɡu di. Adɑmɑ be bɑ Yinni Gusunɔ kɑsu, ɡɑ̃ɑ ɡeenu kun bu sɑrɑrimɔ.

¹²Bɛɛ nɛn bibu, i susimɑ i nɔ, kpɑ n bɛɛ sɔ̃ɔsi nɡe mɛ i ko kɑ Yinni Gusunɔ nɑsiɑ.

¹³Wi u kĩ u wɑ̃ɑru di bɔri yɛndu sɔɔ, kpɑ u tɛ,

¹⁴u kɔ̃sɑn ɡerubu de, kpɑ u weesu deri.

¹⁵U kɔ̃sɑ suurio, kpɑ u ɡeɑ ko. U ɑlɑfiɑ nɑɑ ɡiro.

¹⁶Gemɡibɑ Yinni Gusunɔ u rɑ n nɔni wɛ̃ɛ. Mɛyɑ u rɑ mɑɑ ben wuri swɑɑ dɑki.

¹⁷Yinni Gusunɔ u rɑ kɑ kɔ̃sɑn kowobu sɑnnɛ, kpɑ u de bu ben ɡɑri duɑri tem mɛni sɔɔ.

¹⁸Yinni Gusunɔ u rɑ ɡemɡibun sokuru wure, kpɑ u bu wunɑ ben wɑhɑlɑ kpuron di.

¹⁹U rɑ n kɑ be bɑ nuki sɑnkire wɑ̃ɑ, kpɑ u be bɑ mwiɑ kpɑnɑ fɑɑbɑ ko.

²⁰Kɔ̃sɑ dɑbinɑ nu rɑ ɡemɡii deemɛ, ɑdɑmɑ Yinni Gusunɔwɑ u rɑ nùn wɔre ye kpuron di.

²¹Wiyɑ u win wɑsin ɡbin ɡbinkɑ kɔ̃su. U ǹ derimɔ bɑɑ win kuku teeru tu kɔsirɑ.

²²Adɑmɑ kɔ̃sɑ yɑ̀ n tɔn kɔ̃so deemɑ, yɑ rɑ nùn ɡowɑ. Mɛyɑ u rɑ mɑɑ ɡemɡiin yibɛrɛbɑ sɛɛyɑsie.

²³Wiyɑ u rɑ win sɔm kowobun hunde wɔre kɑrin di. Be bɑ mɑɑ nùn nɑɑnɛ sɑ̃ɑ bɑ ǹ tɑɑrɛ wɑsi.